ރޭ އިދިކޮޅުން މާލޭގައި ބޭއްވި މުޒާހަރާ ކަވަރު ކުރަން އުޅުނު ބައެއް ނޫސްވެރިންނާއި އާއްމުންނަށް ފުލުހުންގެ ފަރާތުން އަނިޔާ ލިބުނު ކަމަށް ބުނާ މައްސަލަ ބެލުމަށް، ނެޝަނަލް އިންޓަގްރިޓީ ކޮމިޝަން (އެންއައިސީ) އިން މިއަދު ނިންމައިފި އެވެ.
ރޭގެ މުޒާހަރާ ކަވަރު ކުރަން އުޅުނު ޗެނަލް13 ގެ ނޫސްވެރިޔާ މުހައްމަދު ސަމާހްގެ ބޯ ފަޅައިގެން ދިއުމުގެ އިތުރުން އެ ސްޓޭޝަންގެ ކެމަރާމަނަކަށް ވެސް ވަނީ އަނިޔާ ވެފަ އެވެ. އަދި އަވަސް ނޫހުގެ ނޫސްވެރިއަކަށް ވެސް ވަނީ އަނިޔާ ވެފަ އެވެ. އެ ނޫސްވެރިންނަށް އޭޑީކޭ ހޮސްޕިޓަލުން ވަނީ ފަރުވާ ދީފަ އެވެ.
އެންއައިސީގެ އޮފިޝަލަކު "އަދަދު"އަށް މިއަދު ވިދާޅުވީ އެ މައްސަލަ އެއްވެސް ފަރާތަކުން އެ ކޮމިޝަނަށް ހުށަހަޅާފައި ނުވި ނަމަވެސް އެކަން ހިނގައިދިޔަ ގޮތް ބަލަން ނިންމާފައިވާ ކަމަށެވެ.
"އަޅުގަނޑުމެން ބަލާނީ ފުލުހުންގެ ފަރާތުން ގާނޫނާ ހިލާފު ކަމެއް މުޒާހަރާގެ ތެރޭގައި ހިނގައިވޭތޯ،" އޮފިޝަލް ވިދާޅުވި އެވެ.
އެ މައްސަލަ ބެލުމަށް ހޯދަން ޖެހޭ މައުލޫމާތު ހޯދަމުން އަންނަ ކަމަށް ވެސް އޮފިޝަލް ވިދާޅުވި އެވެ.
ނޫސްވެރިންތަކަކަށް އަނިޔާވެފައިވާއިރު މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވެސް ވަނީ ފުލުހުންގެ އަމަލު ކުށްވެރި ކޮށްފަ އެވެ.
ޕީޕީއެމް/ޕީއެންސީ އޮފީސް ދޮރުމަތިން ރޭ ފެށި މުޒާހަރާ މަޖީދީ މަގާއި ބޮޑެތި އެހެން މަގުތަކުގައި ވެސް ވަނީ ކުރިއަށް ގެންގޮސްފަ އެވެ. މުޒާހަރާގެ ބައިވެރިން ހުއްޓުވުމަށް ފުލުހުން މަސައްކަތް ކުރުމުން ކޮންމެވެސް ވަރަކަށް ކުރިމަތިލުންތައް ހިނގައި ފުލުހުން ވަނީ ޕެޕާ ސްޕްރޭ ވެސް ބޭނުން ކޮށްފަ އެވެ. މުޒާހަރާގެ ބައިވެރިން ހުއްޓުވުމަށް ފުލުހުން ކުރިމަތިލީ ޝީލްޑާއެކު އެވެ.
