އިދިކޮޅު ކޯލިޝަނުން މިރޭ މާލޭގައި ބޭއްވި މުޒާހަރާ ކަވަރު ކުރަން އުޅުނު ނޫސްވެރިއެއްގެ ބޯފެޅި އިތުރު ނޫސްވެރިއަކަށް އަނިޔާވެގެން ހޮސްޕިޓަލުގައި ފަރުވާ ދޭން ފަށައިފި އެވެ.
ޗެނަލް13 ގެ ނޫސްވެރިޔާ މުހައްމަދު ސަމާހްގެ ބޯ ފަޅައިގެން ދިޔައީ މުޒާހަރާގެ ބައިވެރިން ޗާންދަނީމަގު/މަޖީދީމަގު ކަންމަތީ އަޑުއުފުލަމުން ދަނިކޮށް އިންޒާރު ދިނުމަށް ފަހު ފުލުހުން މުޒާހަރާ ރޫޅާލަން އުޅުމުގެ ތެރެއިންނެވެ. ބޯފެޅުނީ ސީދާ ކިހިނެއް ވެގެން ކަމެއް ނޭނގެ އެވެ. ސަމާހުގެ އިތުރުން އެ ސްޓޭޝަންގެ ކެމަރާމަނަކަށް ވެސް ވަނީ އަނިޔާ ވެފަ އެވެ.
އެ ދެ ނޫސްވެރިންނަށް ވެސް އޭޑީކޭ ހޮސްޕިޓަލުން މިހާރު އަންނަނީ ފަރުވާ ދެމުންނެވެ.
ޗެނަލް13 ގެ ނޫސްވެރިއަކަށް އަނިޔާވެ ވެއްޓިފައި: އެ ނޫސްވެރިންނަށް އޭޑީކޭގައި އަންނަނީ ފަރުވާ ދެމުން--
މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ކުރި ޓްވީޓެއްގައި ބުނީ ފުލުހުންގެ ފަރާތުން ނޫސްވެރިންނަށް އަނިޔާވި ކަމުގެ މައުލޫމާތު ލިބޭ ކަމަށާއި އެކަމާ ކަންބޮޑުވާ ކަމަށެވެ.
ޕީޕީއެމް/ޕީއެންސީ އޮފީސް ދޮރުމަތިން މިރޭ ފެށި މުޒާހަރާ މަޖީދީ މަގާއި ބޮޑެތި އެހެން މަގުތަކުގައި ވެސް ވަނީ ކުރިއަށް ގެންގޮސްފަ އެވެ. މުޒާހަރާގެ ބައިވެރިން ހުއްޓުވުމަށް ފުލުހުން މަސައްކަތް ކުރުމުން ކޮންމެވެސް ވަރަކަށް ކުރިމަތިލުންތައް ހިނގައި ފުލުހުން ވަނީ ޕެޕާ ސްޕްރޭ ވެސް ބޭނުން ކޮށްފަ އެވެ.
އިންސާފު ގާއިމުކޮށް މިވަގުތު ފަސް އަހަރުގެ ޖަލު ހުކުމެއް ތަންފީޒުކުރަމުން ގެންދަވާ އިދިކޮޅު ކޯލިޝަންގެ ލީޑަރު އަދި ކުރޫގެ ރައީސް އަބްދުﷲ ޔާމީން މިނިވަންކުރަން ގޮވާލައި، މިރޭ ކުރި މުޒާހަރާގައި އެ ކޯލިޝަންގެ ލީޑާޝިޕްގެ ބޭފުޅުން ވެސް ބައިވެރިވެވަޑައިގެންނެވި އެވެ.
ޔާމީންގެ މައްޗަށް މަނީ ލޯންޑަރިންގެ ކުށް ސާބިތުވެ، ފަސް އަހަރުގެ ޖަލު ހުކުމެއް އިއްވި ކްރިމިނަލް ކޯޓުގެ ބެންޗުގެ ތިއްބެވި ބައެއް ފަނޑިޔާރުން، އެ ޝަރީއަތާ ގުޅޭގޮތުން ދެއްކެވި ވާހަކައެއް ކަމަށް ބުނާ އޯޑިއޯތަކެއް ލީކުވުމާ ގުޅިގެން އިދިކޮޅުގެ ހަރަކާތްތަކަށް ވަނީ އިތުރު ހިތްވަރެއް ލިބިފަ އެވެ.
އެ އޯޑިއާތަކުގެ ވާހަކަ ދައްކަނީ ޔާމީންގެ މައްޗަށް ކުރި ހުކުމަށް ނުފޫޒު ފޯރުވުމުގެ ވާހަކަ ތަކެކެވެ. އެކަން ޖުޑީޝަލް ސާވިސް ކޮމިޝަނުން ބަލަމުން އަންނައިރު، އިދިކޮޅުން ދަނީ އެ އޯޑިއޯތަކާއެކު ޔާމީން ޖަލަށްލާފައިވަނީ ނުހައްގުން ކަމަށް ބުނެ އެމަނިކުފާނު މިނިވަންކުރަން ތަކުރާރުކޮށް ގޮވާލަމުންނެވެ.
އެގޮތުން، އިދިކޮޅުގެ ހިނގާލުމެއް މިދިޔަ ހުކުރު ދުވަހު ބާއްވާފައިވާއިރު، އަންނަ ހުކުރަށް ވެސް އިދިކޮޅުން ވަނީ ހަރަކާތެއް ބާއްވާނެކަމަށް އިއުލާނުކޮށްފަ އެވެ.
