ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް)ގެ ނަން ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭ)އަށް ބަދަލުކޮށް، ޖަމިއްޔާ ރީބްރޭންޑްކުރަން ނިންމައިފި އެވެ.
ގޭމްއިން މި ގޮތަށް ނިންމީ އިއްޔެ މާފުށީ، ކާނި ހޮޓެލްސްގައި ބޭއްވި އެ ޖަމިއްޔާގެ އަހަރީ އާންމު ޖަލްސާގަ އެވެ. މި ޖަލްސާގައި ބައިވެރިވި މެމްބަރުން ޖަމިއްޔާގެ ނަން ބަދަލުކުރަން ފާސްކުރި ނަމަވެސް، މި ނަން ރަސްމީ ވާނީ ޖަމިއްޔާތަކުގެ ރަޖިސްޓްރާއަށް ހުށަހަޅައިގެންނެވެ.
ޖަމިއްޔާގެ ނަން ބަދަލުކުރަން ނިންމުމާ ގުޅިގެން ގޭމްގެ ރައީސް އަބްދުﷲ ނަޝީދު (ކާނި އަބްލޯ) ވިދާޅުވީ، މިއީ ގެސްޓްހައުސްތަކަށް ހާއްސަވެފައި އޮތް ޖަމިއްޔާގައި ހޮޓާތަކަށް ވެސް ހިދުމަތް ދޭން ގެނައި ބަދަލެއް ކަމަށެވެ.
އަދި މި ބަދަލުގެ ސަބަބުން ރާއްޖޭގައި ހުންނަ ހޮޓާތަކަށް ވެސް ރެޕްރެޒެންޓޭޝަން ލިބޭނެ ކަމަށް ވިދާޅުވި އެވެ.
ގޭމް އިން ވަނީ މި ބަދަލާއެކު، 10 ކޮޓަރިއަށް ވުރެ ގިނަ ކޮޓަރި ހުންނަ ގެސްޓްހައުސްތައް ހޮޓާތަކަށް ބަދަލުކުރަން ނިންމާފަ އެވެ. އަދި މިއީ މިއީ ޓޫރިޒަމް މިނިސްޓްރީން އިއުލާނުކުރަން ނިންމާފައިވާ ޓޫރިސްޓް ފެސިލިޓީ ކްލެސިފިކޭޝަނަށް ފައްތަން ގެނައި ބަދަލެއް ކަމަށް އަބްދުﷲ ނަޝީދު ވިދާޅުވި އެވެ.
މި ޖަލްސާގައި ޖަމިއްޔާއިން ވަނީ މިހާރަށް ވުރެ "އެކްޓިވް" ކޮށް ޖަމިއްޔާއިން ހަރަކާތްތެރިވާން މަސައްކަތްތަކެއް ކުރަން ނިންމާފަ އެވެ. އެގޮތުން ރީބްރޭންޑް ކުރުމުގެ މަސައްކަތާއި، މާކެޓިންގެ މަސައްކަތް ވަނީ "އޯޓިއޯ ކްރިއޭޓިވްސް" އާ ހަވާކޮށްފަ އެވެ.
އޭގެ އިތުރުން މިހާރަށް ވުރެ ގިނަ ފެއާތަކަށް ދިޔުމަށާއި، ހޮޓާތަކާއި ގެސްޓްހައުސްތަކަށް ހާއްސަ މަޖައްލާތައް ނެރެން ނިންމި އެވެ. އަދި ޖަމިއްޔާގެ ހިންގުން އިތުރަށް ހަރުދަނާކުރުމަށް ފުލްޓައިމް މަސައްކަތް ކުރާނެ ސެކްރެޓަރީ ޖެނެރަލެއްގެ މަގާމު ކަނޑައަޅަން ވެސް ނިންމި އެވެ.
