ލަންޑަން (ސެޕްޓެމްބަރު 19) - ޗެލްސީގެ ގޯލްކީޕަރު އެޑޮއާޑް މެންޑީ އަކީ އާދަޔާހިލާފު މޮޅު ކީޕަރެއް ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
އުމުރުން 29 އަހަރުގެ މެންޑީ ޗެލްސީ އަށް ބަދަލުވީ މިދިޔަ އަހަރުގެ ސެޕްޓެމްބަރު މަހު އެވެ. ފްރާންސްގެ ރެނެސް އަށް ޗެލްސީން ވަނީ މެންޑީގެ ސޮއި ހޯދަން 28 މިލިއަން ޑޮލަރު ދައްކައިފަ އެވެ.
ޗެލްސީގައި މެންޑީ ހޭދަކުރި ފުރަަތަމަ ސީޒަނުގައި އެ ޓީމާ އެކު ޗެމްޕިއަންސް ލީގު ކާމިޔާބު ކުރިއިރު، އޭނާ އަކީ ޔުއެފާ އެވޯޑްސް އިން ހޮވި މިދިޔަ ސީޒަނުގެ އެންމެ މޮޅު ގޯލްކީޕަރެވެ. މި ސީޒަނުގައި ވެސް މިހާތަނަށް މެންޑީ އަންނަނީ މޮޅު ކުޅުމެއް ދައްކަމުންނެވެ.
ޕްރިމިއާ ލީގުގައި މިރޭ ޓޮޓެންހަމް ހޮޓްސްޕާސްއާ ދެކޮޅަށް ކުޅޭ މެޗުގެ ކުރިން ޓުޗެލް ވަނީ މެންޑީ އަށް ތައުރީފުކޮށްފަ އެވެ.
"ޗެލްސީން މެންޑީ ގެނައިތާ އަހަރެއް ފުރޭއިރު އަލަށް ޓީމަކަށް ބަދަލުވެ ހާސިލްނުކުރެވޭހާ ކަންތައްތައް މެންޑީ ވަނީ މިހާތަނަށް ޗެލްސީގައި ހުރެ ހޯދާފައި. އަހަރެން އޭނަ (މެންޑީ)އާ މެދު ވަރަށް ބޮޑަށް ހިތްހަމަޖެހޭ. އޭނަ އަކީ އާދަޔާހިލާފު މޮޅު ކީޕަރެއް،" ޓުޗެލް ބުންޏެވެ.
މި ފަހަރުގެ ސީޒަނުގައި މިހާތަނަށް ޗެލްސީން ނެރެމުން އަންނަ ރަނގަޅު ނަތީޖާތަކުގެ ފަހަތުގައި މެންޑީގެ ދައުރު ބޮޑެވެ.
ހާއްސަކޮށް ޕްރިމިއާ ލީގުގައި ރަށުންބޭރުގައި ޗެލްސީން ލިވަޕޫލާ 1-1 އިން އެއްވަރުކުރި މެޗުގައި އެއް ކުޅުންތެރިއަކު މަދުކޮށް ޗެލްސީން ދެ ވަނަ ހާފްގައި ކުޅުނުއިރު، މެންޑީ ވަނީ ލިވަޕޫލުން ފޮނުވާލި ގިނަ ހަމަލާތަކެއް ހުއްޓުވައިފަ އެވެ.
"ކޮންމެ ޓީމަކަށް ވެސް މޮޅު ގޯލްކީޕަރެެއް ބޭނުންވާނެ. އަހަރެމެންގެ އެ ފަދަ މޮޅު ކީޕަރެއް އެބަހުރި. އެއީ މެންޑީ،" ޓުޗެލް ބުންޏެވެ.
ޕްރިމިއާ ލީގުގެ މި ސީޒަނުގެ މިހާތަނަށް ޗެލްސީ ކޮޅަށް ވަނީ އެއް ގޯލެވެ. މިއީ މިދިޔަ 11 އަހަރަށް ބަލާއިރު ޗެލްސީގެ ޑިފެންސިވް ރެކޯޑް އެންމެ ރަނގަޅު ސީޒަނެވެ.
ޗެލްސީ މި ވަގުތު ލީގުގެ ހަތަރެއްގައި އޮތީ ހަތަރު މެޗުން 10 ޕޮއިންޓް ހޯދައިގެންނެވެ. މިރޭ މޮޅުވެއްޖެނަމަ އެއް ވަނައިގައި އޮތް ލިވަޕޫލާ ޕޮއިންޓްގެ ގޮތުން ހަމަކުރެވޭނެ އެވެ. އެއް ވަނަ އަށް އެރޭނީ ތިން ގޯލުން މޮޅުވެގެންނެވެ. ޓޮޓެންހަމް ދަނޑުގައި ޗެލްސީއާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 20:30 ގަ އެވެ.
