ކޮވިޑުން ދިފާއުވުމަށް ޖަހާ ވެކްސިންގެ ދެވަނަ ޑޯޒް ރާއްޖޭން އިއްޔެއާ ހަމަޔަށް ޖަހާފައި ވަނީ އާބާދީގެ 60 ޕަސެންޓް މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ސަރުކާރުގެ އަމާޒަކީ މިދިޔަ މަހުގެ ނިޔަލަށް ވެކްސިނަށް ޝަރުތު ހަމަވާ އާބާދީގެ 90 ޕަސެންޓަށް ޖަހައި ނިންމުމެވެ. އެ އަދަދަށް ވެކްސިން ރާއްޖެ އަށް ވަނީ ގެނެސްފަ އެވެ.
ހެލްތު މިނިސްޓްރީގެ ޑެޕިއުޓީ ޑިރެކްޓަރު ޖެނެރަލް ތަސްލީމާ އުސްމާން "އަދަދު" އަށް ވިދާޅުވީ ރާއްޖޭގެ ޖުމްލަ އާބާދީން ފުރަތަމަ ޑޯޒް ޖަހާފައި ވަނީ 71.57 ޕަސެންޓު މީހުން ކަމަށެވެ. އެއީ 390،065 މީހުންނެވެ. ވެކްސިންގެ ދެވަނަ ޑޯޒް ފުރިހަމަ ކޮށްފައި ވަނީ 60.51 ޕަސެންޓެވެ. އެއީ 331،405 މީހުންނެވެ.
މާލެ ސަރަހައްދުގައި އުމުރުން 18 އަހަރާއި 60 އަހަރާ ދެމެދުގެ މީހުންނަށް ސިނޯފާމާއި އެސްޓްރާޒެނަކާ ވެކްސިން ޖަހަމުން އަންނައިރު، އުމުރުން 12 އަހަރާއި 17 އަހަރާ ދެމެދުގެ ކުދިންނަށާއި އެޗްޕީއޭ އިން ކަނޑައަޅާފައިވާ ހާއްސަ ކެޓަގަރީތަކުގެ މީހުންނަށް މިހާރު އަންނަނީ ފައިޒާ ވެކްސިން ޖަހައިދެމުންނެވެ.
އެގޮތުން ސްކޫލު ދަރިވަރުންގެ ވެކްސިން ޖަހާފައިވާ އަދަދަށް ބަލާއިރު ފުރަތަމަ ޑޯޒު ޖެހި ކުދިންގެ އަދަދު އަށް ވަނީ 35،989 އަރައިފަ އެވެ. އެއީ ރާއްޖޭގެ މި އުމުރުފުރައިގެ އާބާދީގެ ތެރެއިން 60 ޕަސެންޓު އާބާދީއަށް ވުރެ އިތުރު އަދަދެކެވެ.
ދެވަނަ ޑޯޒް ޖަހާފައި ވަނީ 22،093 ދަރިވަރުން ކަމަށް އެޑިއުކޭޝަނުން މައުލޫމާތުދެ އެވެ. މިހާތަނަށް 218 ސްކޫލެއްގައި ދަރިވަރުންނަށް ވެކްސިންގެ ފުރިހަމަ ޑޯޒް ޖަހަން ފަށާފައިވާއިރު ވެކްސިންގެ ދަ ވަނަ ޑޯޒް 141 ސްކޫލަކުން ވަނީ ޖަހަން ފަށާފަ އެވެ.
މާލެ ސަރަހައްދުގައި 6 ސެންޓަރެއްގައި ވެކްސިން ދިނުން ކުރިއަށް ގެންދާއިރު، ގޭގެއަށް ގޮސްގެން ވެކްސިން ދިނުމަށް 3 މޮބައިލް ޓީމެއް އަންނަނީ ހަރަކާތްތެރިވަމުންނެވެ. މީގެ އިތުރުން އަތޮޅުތަކުގައި 176 ވެކްސިން ސެންޓަރުން އަންނަނީ ވެކްސިން ޖަހައި ދެމުންނެވެ.
ރާއްޖޭގައި ކޮވިޑް ވެކްސިނޭޝަން ޕްރޮގްރާމް މިދިޔަ ފެބުރުއަރީ މަހުގެ ތެރޭގައި ފެށީ އިންޑިއާއިން ހަދިޔާކުރި 200،000 ޑޯޒުންނެވެ. ޗައިނާއިން ވެސް 200،000 ޑޯޒާއި ހެޔޮއެދޭ އެހެން ފަރާތްތަކުން ވެސް ވެކްސިން ލިބުނެވެ.
އޭގެ އިތުރަށް ރާއްޖެ އިން ވަނީ ޖުމްލަ 1،000،000 ޑޯޒަށް ފައިސާ ދައްކައިފަ އެވެ. އޭގެ ތެރޭގައި ސިންގަޕޫރުގެ އެސްޓްރާޒެނެކާ އަށް 700،000 ޑޯޒާއި އިންޑިއާގެ ސިރަމް އިންސްޓިޓިއުޓަށް 300،000 ޑޯޒު ހިމެނެ އެވެ. މީގެތެރެއިން ރާއްޖެ އަށް ލިބުނީ އެސްޓްރާޒެނެކާ ވެކްސިނެވެ.
ރާއްޖޭގެ ކޮވިޑް ހާލަތަށް ބަލާއިރު، ބަލި ޖެހުނު މީހުންގެ އަދަދު މިހާރު ވަނީ 83576 އަށް އަރާފަ އެވެ. އަދި މި ވަގުތު އެކްޓިވް ކޭސްގެ ގޮތުގައި 1663 މީހަކު އެބަތިބިއިރު ބަލި ޖެހިގެން ފަރުވާ ހޯދަމުންދާ މީހުންގެ ތެރެއިން ހޮސްޕިޓަލުގައި އެނދުމަތިކޮށްގެން ފަރުވާ ދެމުން ދަނީ 21 މީހުންނަށެވެ.
ރާއްޖޭގައި ކޮވިޑުގައި 229 މީހުން މިހާތަނަށް މަރުވެފައިވާ އިރު 80 ޕަސެންޓް މީހުން ވެކްސިންގެ އެންމެ ޑޯޒެއް ވެސް ފުރިހަމައެއް ނުކުރެ އެވެ.
