އެމެރިކާގެ ކެލިފޯނިއާގެ ޖަންގަލިތަކުގައި ރޯވެފައިވާ އަލިފާންގަނޑު ސުކޯޔާ ނޭޝަނަލް ޕާކަށް ފެތުރި ދުނިޔޭގެ އެންމެ ބިޔަ ގަސް އަނދައިގެން ދިޔުމުގެ ބިރު ބޮޑުވެއްޖެ އެވެ.
އަލިފާން ނިއްވަން މަސައްކަތް ކުރާ މީހުން ވަނީ އެ ޕާކުގައި ހުރި ތާރީހީ ގަސްތައް ހިމާޔަތް ކުރުމަށް އެ ގަސްތަކުގެ ބުޑުގައި އަލިފާން ނުހިފާ ފަދަ ތަކެތި އޮޅާފަ އެވެ.
އޮފިޝަލުން ބުނީ ޕާކު ތެރޭގައި ހުންނަ ޖަޔަންޓް ފޮރެސްޓާ ހަމައަށް ފޯރައިފި ނަމަ، ދުނިޔޭގެ އެންމެ ބިޔަ ގަސްތައް ނެތިދިޔުމުގެ ބިރު އެބަ އޮތް ކަމަށެވެ.
ޖަޔަންޓް ފޮރެސްޓް ޖަންގައްޔަކީ 2،000 ސުކޯޔާ ގަސް ހުންނަ ތަނެކެވެ. އޭގެ ތެރޭގައި ދުނިޔޭގެ އެންމެ ބިޔަ ގަސް، ޖެނެރަލް ޝާމަން ވެސް ހިމެނެ އެވެ. އެއީ 83 މީޓަރު އުސް، ބިމުގެ އެންމެ ބޮޑު ޖާގައެއް ނަގާ ގަހެވެ. އެއީ ގާތްގަނޑަކަށް 2،500 އަހަރުވީ ގަހެކެވެ.
އެ ސަރަހައްދުގައި އަލިފާންގަނޑު ފެތުރޭތާ މިހާރު ހަފުތާއެއް ވެއްޖެ އެވެ. ތިންސަތޭކަ ފަންސާހަށް ވުރެ ގިނަ އަލިފާން ނިއްވާ މީހުންނާޢި ހެލިކޮޕްޓަރުތަކުން ކުރާ މަސައްކަތުން ވެސް މާ ބޮޑު ކުރިއެރުމެއް ނުލިބެ އެވެ.
ޖެނެރަލް ޝާމަން އާއި އެހެން ބިޔަ ގަސްތައް ހިމާޔަތް ކުރުމަށް، ގަހުގެ ބުޑުގައި ވަނީ އެލުމީނިއަމް ފޮއިލް އޮޅާފަ އެވެ. ތަޖުރިބާކާރުން ބުނާ ގޮތުގައި އެ ތަނުގައި ހުރި ސުކޯޔާ ގަހަކީ އާއްމުކޮށް ހުޅު ހިފާ ގަހެއް ނޫނެވެ.
އެންމެ ބިޔަ ގަހުގެ ބުޑުގައި އެލުމިނިއަން ފޮއިލް އަޅާފައި.
އެ ގަސްތައް ހުރި ނެޝަނަލް ޕާކުގައި ރަލިފާން ރޯވީ ހޮނު އެޅުމުގެ ސަބަބުންނެވެ. މި އަހަރުގެ ހޫނު މޫސުމުގައި ކެލިފޯނިއާގެ އެކި ހިސާބުގައި ރޯވެފައި ވެ އެވެ.
އެގޮތުން އެ ސްޓޭޓުގައި މި އަހަރު 7،400 އަލިފާންގަނޑު ރޯވި އެވެ. އޭގެ ސަބަބުން 2.2 މިލިއަން އޭކަރުގެ ސަރަހައްދު ވަނީ އަނދާ އަޅިއަށް ވެފަ އެވެ.
ދުނިޔެ ހޫނުވެ، ވާރޭ ނުވެހި ގިނަ ދުވަސްވުމުގެ ސަބަބުން ޖަންގަލިތަކުގައި ރޯވުމަށް އެންމެ އެކަށޭނަ މާހައުލު އުފެދެ އެވެ. ފަހަކަށް އައިސް އެފަދަ އަލިފާންގަނޑުތަކުގައި ލިބޭ ގެއްލުން ދަނީ ދުނިޔޭގެ ހުރިހާ ހިސާބެއްގައި ވެސް ބޮޑުވަމުންނެވެ.
