މެންޗެސްޓާ (ސެޕްޓެމްބަރު 18) - މެންޗެސްޓާ ސިޓީގެ ސަޕޯޓަރުން އޭނާއާ މެދު ހިތްހަމަ ނުޖެހޭނަމަ އެ ޓީމު ދޫކޮށްލަން ތައްޔާރަށް ހުރި ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޔުއެފާ ޗެމްޕިއަންސް ލީގުގައި އާރްބީ ލައިޕްޒިގު އަތުން ސިޓީ މޮޅުވި މެޗު ބަލަން އެ ޓީމުގެ ދަނޑަށް ސަޕޯޓަރުން މަދުން ވަނުމުން ގާޑިއޯލާ ވަނީ އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވީހާ ވެސް ގިނަ ސިޓީ ސަޕޯޓަރުން މެޗުތައް ބަލަން ދަނޑަށް އަންނަން ދައުވަތު ދީފަ އެވެ.
ސިޓީގެ އިއްތިހާދު ސްޓޭޑިއަމަށް 55،000 މީހުންނަށް ވަދެވޭއިރު، ލައިޕްޒިގު މެޗަށް ވަނީ 38،000 ސަޕޯޓަރުންނެވެ.
ގާޑިއޯލާ އެދުނީ އިނގިރޭސި ޕްރިމިއާ ލީގުގައި މިރޭ ސައުތެމްޓަނާ ދެކޮޅަށް ކުޅޭ މެޗު ބަލަން ގިނަ ސަޕޯޓަރުން އައުމަށެެވެ. އެކަމާ ހިތްހަމަ ނުޖެހިގެން ސިޓީގެ ސަޕޯޓަރުންގެ ގްރޫޕްގެ ޖެނެރަލް ސެކްރެޓަރީ ކެވިން ޕާކާ ބުނީ ގާޑިއޯލާ ވިސްނަން ޖެހޭނީ ޓީމުގެ ކޯޗިންގެ ކަންކަމާ މެދު ކަމަށާއި ސަޕޯޓަރުންގެ ކަންކަން ހުރި ގޮތް ނޭނގޭނެ ކަމަށެވެ.
ސައުތެމްޓަނާ ދެކޮޅަށް ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ގާޑިއޯލާ ވަނީ ޕާކާގެ އެ ވާހަކަތަކަށް ރައްދުދީފަ އެވެ. ގާޑިއޯލާ ބުނީ އޭނާ ދެއްކި ވާހަކައެއްގެ ގޯސް މާނައެއް ނަގައިގެން ޕާކާ ރައްދުދިނުން ބަލައިނުގަނެވޭ ކަމަށެވެ. ސަޕޯޓަރުންނަށް ދައުވަތުދީފައި މީގެ ކުރިން ވެސް ވާހަކަ ދައްކާފައިވާނެ ކަމަށް ގާޑިއޯލާ ބުންޏެވެ.
"އަހަރެން ދެއްކި ވާހަކަ އަށް މައާފަކަށް ނޭދޭނަން. އަހަރެން ބުނި ވާހަކަ އަކީ ސަޕޯޓް ބޭނުންވާ ވާހަކަ. އަހަރެން މި ބަލަނީ ސަޕޯޓަރުން އަންނާނެ އަދަދަކަށް ނޫން. އަހަރެން މި ދައުވަތު ދެނީ ޓީމަށް އެހީވެދޭން ސަޕޯޓްކުރަން އަންނަން،" ގާޑިއޯލާ ބުންޏެވެ.
"އެންމެ މުހިއްމީ ކްލަބް. ކްލަބެއްގެ އެންމެ މުހިއްމު އެއް ބަޔަކީ ސަޕޯޓަރުން. ކްލަބް ދަމަހައްޓަނީ ސަޕޯޓަރުން. އަހަރެން މި ކްލަބް ދެކެ ލޯބިވޭ. އެކަމަކު، މި ކްލަބްގެ ސަޕޯޓަރުން އަހަންނާ މެދު ނުރުހޭނަމަ ޓީމު ދޫކޮށްލާފައިދާން އަހަރެން ފަސްނުޖެހޭނަން،"
ގާޑިއޯލާ އަށް ރައްދުދިންއިރު ސަޕޯޓަރުންގެ ގްރޫޕްގެ ފަރާތުން ޕާކާ ވަނީ ޕްރިމިއާ ލީގުގެ މެޗުތަކުގައި ސިޓީގެ ދަނޑަށް ސަޕޯޓަރުން ވަން އަދަދުގެ ތަފާސްހިސާބުތައް ދައްކައިފަ އެވެ. އެ ގޮތުން ނޯވިޗް ސިޓީ މެޗަށް 51،437 މިހުން ވަންއިރު، އާސެނަލް މެޗު ބަލަން 52.276 ސަޕޯޓަރުން ވަނެވެ. ގާޑިއޯލާ ބުނީ އޭނާ ދެއްކި ވާހަކަ ޕާކާ ރަނގަޅަށް އަޑުއަހާލުން ބުއްދިވެރި ކަމަށެވެ.
ސިޓީގެ ކޯޗުކަމާ ހަވާލުވީ ވަރަށް ރަނގަޅަށް އެ ޓީމުގެ ތާރީހު ވެސް އެނގިހުރެ ކަމަށް ގާޑިއޯލާ ބުންޏެވެ. އަދި ސިޓީގެ ފަރާތުން ލިވަޕޫލާއި މެންޗެސްޓާ ޔުނައިޓެޑް، ބާސެލޯނާ، ބަޔާން މިއުނިކް އަދި ރެއާލް މެޑްރިޑް ފަދަ ސަޕޯޓަރުން ގިނަ ކްލަބްތަކުގެ ފަރާތުން ފެންނަ ފަދަ ކަންތައްތަކަށް އުއްމީދުކޮށް އެ ވާހަކަ ދައްކަން އަދި ބޭނުންނުވާ ކަމަށް ގާޑިއޯލާ ބުންޏެވެ.
ގާޑިއޯލާ ބުނީ އޭނާ ދައްކާ ވާހަކަ އޮޅުވާލައިގެން މާނައޮޅޭ ގޮތަށް ދައްކާނެ މީހުން ވެސް ތިބޭނެ ކަމަށާއި ގޯސް ވާހަކައެއް ދެއްކިއްޖެނަމަ މައާފަށް އެދޭނެ ކަމަށެވެ.
ސިޓީ އާއި ސައުތެމްޓަން ކުޅޭ މެޗު ފަށާނީ ރާއްޖެ ގަޑިން މިރޭ ހަތެއް ޖަހާއިރު އެވެ.
