ލަންޑަން (ސެޕްޓެމްބަރު 17) - ބޮރޫޝިއާ ޑޯޓްމަންޑްގައި މިހާރު ތަފާތު މޮޅު ކުޅުމެއް ދައްކަމުން އަންނަ ޒުވާން މިޑްފީލްޑަރު، ޖޫޑް ބެލިންހަމް ގަންނަން އާސެނަލަށް ލިބިފައި އޮތް ފުރުސަތު އެ ޓީމަށް ގެއްލުނީ ޓީމުގެ މެނޭޖްމަންޓަށް އައި ބަދަލުތަކުގެ ތެރެއިން ކަމަށް އާސެނަލްގެ ކުރީގެ ކެޕްޓަން ޓޯނީ އެޑަމްސް ބުނެފި އެވެ.
ބާމިންހަމް ސިޓީގައި ހުރެފައި ބެލިންހަމް މިދިޔަ އަހަރު ގިނަ ޓީމުތަކަކާ މަޝްވަރާކުރި އެވެ. އޭގެ ތެރޭގައި އާސެނަލާއި މެންޗެސްޓާ ޔުނައިޓެޑް ހިމެނެ އެވެ. މީގެ ތެރެއިންް އާސެނަލުން ބެލިންހަމްގެ ސޮއި ހޯދުމާ ވަރަށް ގާތަށް ޖެހިލި އެވެ. އެކަމަކު، އެ ޓްރާންސްފާ ނިންމުމުގައި ދިމާވީ ތަފާތު މައްސަލަ އެކެވެ.
ބްރެޒިލްގެ އެޑޫ އާސެނަލްގެ ސްޕޯޓިން ޑިރެކްޓަރަކަށް ހަމަޖައްސައި ސްކައުޓިން ކަންކަމުގެ ކޮންޓްރޯލް 2019 ވަނަ އަހަރު ނެގުމުގެ ކުރިން އާސެނަލްގެ ސްކައުޓިންގެ ޒިންމާއާ ހަވާލުވެ ހުރީ ސްވެން މިސްލިންޓަންޓް އެވެ. ސްވެން އާއި ސްޓީވް މޯރޯ އަދި ފްރާންސިސް ކަޖިޖާއޯ ވަނީ ބާމިންހަމްއާ އެކު އޭރު އުމުރުން 17 އަހަރުގެ ބެލިންހަމްގެ ޑީލްގެ ވާހަކަ ކުރިއަށް ގެންގޮސްފަ އެވެ. އެކަމަކު، ފަހުން އެޑޫ މަގާމާ ހަވާލުވެ، ބެލިންހަމްގެ މަޝްވަރާތައް ކުރިއަށް ގެންދިއުން ހުއްޓާލުމާ އެކު އެ ވަގުތުގެ ފައިދާނަގައި ޑޯޓްމަންޑުން މިދިޔަ އަހަރު ޖެނުއަރީ މަހު 30 މިލިއަން ޑޮލަރަށް ބެލިންހަމް ގަތީ އެވެ.
އިންގްލެންޑްގެ މެޗެއްގެ ތެރެއިން ބެލިންހަމް ބޯޅަ ކޮންޓްރޯލް ކުރަނީ.
"ސްކައުުޓުން ބަދަލުވެގެން ދިޔަ އެ މުއްދަތުގައި ހަގީގަތު އަހަރެމެން (އާސެނަލް) އަތުން ބެލިންހަމްގެ ޑީލް ދިޔައީ. އެޑޫ އާސެނަލާ ހަވާލުވީ ބްރެޒިލާއި ދެކުނު އެމެރިކާގައި ފުޓްބޯޅައިގެ މި ކަހަލަ މަސައްކަތް ކޮށްފައި. އޭނަގެ ކިބައިގައި އިނގިރޭސި ވިލާތާއި ޔޫރަޕްގެ ސްކައުޓިންގެ މާ ބޮޑު ތަޖުރިބާއެއް ނެތުމުުގެ މައްސަލަ އެބަދިމާވޭ،" ސްކައި ސްޕޯޓްސް ޝޯއެއްގައި ވާހަކަ ދައްކަމުން އެޑަމްސް ބުންޏެވެ.
އެޑަމްސް ބުނީ ބެލިންހަމް ކަހަލަ ކުޅުންތެރިއަކު ލިބިއްޖެނަމަ ކުރިން އޮތް އާސެނަލްގެ މެނޭޖްމަންޓުން މާ ލަސްތަކެއް ނުވެ ވަގުތުން ސޮއިހޯދާނެ ކަމަށެވެ.
"އާސެން ވެންގާ ކަހަލަ ކޯޗެއް ހުރިނަމަ ބެލިންހަމްގެ ޑީލް (ވަގުތުން) ނިންމާނެ. ހަގީގަތުގައި ކްލަބް ކުރިއަށް ގެންދާނަަމަ ބޭނުމީ އެ ފަދަ ކުޅުންތެރިން،" އެޑަމްސް ބުންޏެވެ.
މިހާރު އުމުރުން 18 އަހަރުގެ ބެލިންހަމް އަންނަނީ ޖަރުމަނު ލީގާއި ޗެމްޕިއަންސް ލީގުގައި ވެސް ޑޯޓްމަންޑް މެދުތެރޭގައި ތަފާތު ދައްކަމުންނެވެ. ބެލިންހަމް އަންނަނީ އިންގްލެންޑް ގައުމީ ޓީމުން ވެސް ގަވާއިދުން ޖާގަ ހޯދަމުންނެވެ.
އަންނަ ސީޒަނުގައި ބެލިންހަމް ހޯދަން އިނގިރޭސި ގިނަ ކްލަބްތަކުން ބިޑްކުރާނެ ކަމަށް ބެލެވެ އެވެ. އޭގެ ތެރޭގައި ލިވަޕޫލާއި ޗެލްސީ އަދި މެންޗެސްޓާ ޔުނައިޓެޑް ހިމެނެ އެވެ. ޑޯޓްމަންޑުން ބެލިންހަމް ވިއްކާލަން ކިޔާ އަގު އުޅެނީ 85 މިލިއަން ޑޮލަރުގަ އެވެ.
