ކުރީގެ ރައީސް އަބްދުﷲ ޔާމީންގެ ދިފާއުގައި މިއަދު ސުޕްރީމް ކޯޓު ދޮށަށް އެއްވި އެމަނިކުފާނުގެ ސަޕޯޓަރުންތަކެއް ފުލުހުން އެ ސަރަހައްދުން ފޮނުވާލައިފި އެވެ.
އެމީހުން ސުޕްރީމް ކޯޓު ދޮށަށް އެއްވެފައި ވަނީ ގއ. ވޮޑަމުއްލާއިން އެކުއިޒިޝަން ކޮސްޓުގެ ގޮތުގައި ލިބުނު ފައިސާ މަނީ ލޯންޑާކުރި މައްސަލައިގައި އެމަނިކުފާނުގެ މައްޗަށް އިއްވި ފަސް އަހަރު ދުވަހުގެ ޖަލު ހުކުމުގެ އިސްތިއުނާފް އަޑުއެހުމެއް އެ ކޯޓުގައި ކުރިޔަށް ދަނިކޮށެވެ.
ޕީޕީއެމް އަދި ދިވެހި ގައުމީ ދިދަތައް ހިފައިގެން ތިބި މުޒާހަރާގެ ބައިވެރިން ވަނީ ސުޕްރީމް ކޯޓުގެ އަޑުއެހުން ނިންމާލުމާއެކު މާ ގިނަ އިރުތަކެއް ނުވެ އެ ސަރަހައްދު ދޫކޮށް ދާން ފަށާފަ އެވެ. އޭގެ ކުރިން ފުލުހުން ވަނީ އެ ސަރަހައްދު ދޫކޮށް ދިޔުމަށް އެމީހުންނަށް އަންގައި، ބެރިކޭޑް ޖަހައި، ސުޕްރީމް ކޯޓަށް ދެވޭ މަގުތައް ބަންދުކޮށްފަ އެވެ.
ސުޕްރީމް ކޯޓު ކައިރި ފުލުހުން ފޯރިމަރަނީ. ފޮޓޯ: އަދަދު
ގާތްގަނޑަކަށް 40 އަކަށް މީހުން ބައިވެރިވި އެ މުޒާހަރާގެ ބައިވެރިޔަކު "އަދަދު" އަށް ކިޔައިދިން ގޮތުގައި މިއަދުގެ އެ އެއްވުމަކީ ވަކި ޕާޓީއަކުން ވަކި ލީޑަރަކު ބުނެގެން އިންތިޒާމުކޮށްގެން ބޭއްވި އެއްވުމެއް ނޫނެވެ.
"އަޅުގަނޑުމެން ބޭނުންވީ، ރައީސް ޔާމީނަށް އިއްވާފައިވާ ހުކުމަކީ ޣައިރުގާނޫނީ ހުކުމެއްކަމާއި، އެމަނިކުފާނަށް ކުރާ އަނިޔާ ހުއްޓާލަން ގޮވާލާ އަޑުއުފުލަން، ސުޕްރީމް ކޯޓު ދޮށަށް ދިޔައީ އެހެންވެ. އެކަމަކު އަދި އެއްވެސް ކަމެއް ނުވޭ،" މުޒާހަރާގެ ބައިވެރިޔަކު ބުންޏެވެ.
މުޒާހަރާގެ ބައިވެރިން ފާމުދޭރި މަގުން ދެކުނަށް އެއްވިިއިރު، އެ ސަރަހައްދުގައި ތިބެގެން އެމީހުން ވަނީ ރައީސް ޔާމީންއަށް ސަޕޯޓްކޮށް އަޑުއުފުލައިފަ އެވެ. އަދި ކޯޓުގެ އަޑުއެހުން ނިމުމާއެކު މުޒާހަރާގެ ބައިވެރިން ވަނީ ފަރީދީ މަގުން ގޮސް ޗާންދަނީ މަގަށް އަޅާލައި، މަޖީދީ މަގުން އިރަށް ހިނގާލުމެއް ބާއްވައިފަ އެވެ.
ރައީސް ޔާމީންގެ މައްޗަށް ވޮޑަމުއްލާ މައްސަލައިގައި ފަސް އަހަރު ދުވަހުގެ ޖަލު ހުކުމަކާ، ފަސް މިލިއަން ޑޮލަރުގެ ޖޫރިމަނާއެއް ދެއްކުމަށް ކްރިމިނަލް ކޯޓުން ހުކުމް އިއްވީ 2019 ވަނަ އަހަރުގެ ޑިސެމްބަރު މަހުގަ އެވެ.
ސުޕްރީމް ކޯޓު ކައިރި ފުލުހުން ފޯރިމަރަނީ. ފޮޓޯ: އަދަދު
އިސްތިއުނާފުގައި އޮތް އެ ހުކުމުގައި ހިމެނޭ ފަސް މިލިއަން ޑޮލަރުގެ ޖޫރިމަނާ އެމަނިކުފާނު ނުދައްކަވާތީ އެ މައްސަލަވެސް ދައުލަތުން ވަނީ ސިވިލް ކޯޓަށް ހުށަހަޅާފަ އެވެ.
ވޮޑަމުލާގެ މައްސަލައިގެ އިތުރުން ރ. ފުއްގިރި މައްސަލައިގައިވެސް އެމަނިކުފާނާއި ދެކޮޅަށް ވަނީ ދައުވާ އުފުލާފަ އެވެ. އަދި ވ. އާރަށުގެ މައްސަލައިގައިވެސް އެމަނިކުފާނާ ދެކޮޅަށް ދައުވާ ކުރަން މިހާރު ވަނީ ފޮނުވާފަ އެވެ.
