ވޮޝިންޓަން، އެމެރިކާ (ސެޕްޓެމްބަރު 15) - ބައިނަލްއަގްވާމީ ޑިމާންޑުތަކާ އެއް ގޮތަށް އަމަލު ނުކުރާހާ ހިނދަކު ތާލިބާން ސަރުކާރު ބަލައިނުގަތުމަށް އެމެރިކާ އިން ޕާކިސްތާނަށް ގޮވާލައިފި އެވެ.
ކޮންގްރެސްގެ ގިނަ މެމްބަރުން ވަނީ ޕާކިސްތާނަށް ޕްރެޝަރު އިތުރު ކުރުމަށް އަޑު އުފުލާފަ އެވެ. އެއާއެކު ސެކެޓްރީ އޮފް ސްޓޭޓް އެންޓަނީ ބްލިންކެން ވިދާޅުވީ ތާލިބާނު ސަރުކާރު ބަލައިގަތުމާ މެދު ހުރިހާ ގައުމަކުން ވެސް ފުންކޮށް ވިސްނަންޖެހޭ ކަމަށެވެ.
"ޕާކިސްތާނު ހިމެނޭހެން، ކޮންމެ ގައުމަކުން ވެސް ބަލަންވީ ބައިނަލްއަގްވާމީ މުޖުތަމައިން އެދޭ ކަންކަން ތާލިބާނުން ހާސިލްކުރަނީ ކިހާ މިންވަރަކަށްތޯ. އެކަމަށް ބެލުމަށް ފަހު ނޫނީ އެ ސަރުކާރު ބަލައިގަނެގެން ނުވާނެ ނުވަތަ އެހީތެރިކަމެއް ވެސް ދީގެން ނުވާނެ،" ކޮންގްރެސްގެ ފޮރިން އެފެއާޒް ކޮމިޓީގައި ބްލިންކެން ވިދާޅުވި އެވެ.
ބްލިންކެން ވިދާޅުވީ ބައިނަލްއަގްވާމީ މުޖުތަމައިން އިސްކަންދީގެން ބަލާނީ އަފްގާން ރައްޔިތުން ގައުމު ދޫކޮށް ދިޔުމަށް އޮތް މިނިވަންކަމާއި، އަންހެނުންނާއި އަންހެން ކުދިން އަދި މައިނޯރިޓީގެ ހައްގުތައް ކަށަވަރު ކުރުން ފަދަ ކަންކަމަށެވެ.
"އެހެންވީމަ ބައިނަލްއަގްވާމީ މުޖުތަމައުގައި މެޖޯރިޓީ އޮތް ފަޅީގައި ޕާކިސްތާން އޮންނަން އެބަ ޖެހޭ."
ބްލިންކެން ވިދާޅުވީ ޕާކިސްތާނުގެ ސިޔާސަތުތަކުގެ ސަބަބުން މީގެ ކުރިން އެމެރިކާގެ މަސްލަހަތަށް ގެއްލުން ލިބިފައިވާ ކަމަށެވެ. އެގޮތުން ތާލިބާނުންގެ މެމްބަރުންނާއި، ޓެރަރިސްޓުން ކަމަށް އެމެރިކާއިން ކަނޑައަޅާފައިވާ ހައްގާނީ ނެޓްވޯކުގެ މެމްބަރުންނަށް ވެސް ޕާކިސްތާނުން ހިމާޔަތް ދިން ކަމަށް ތުހުމަތު ކުރެއްވި އެވެ.
ކޮންގްރެސްގެ ބައެއް މެމްބަރުން ގޮވާލެއްވީ ޕާކިސްތާނާއި އެމެރިކާއާ ދެމެދުވާ އަސްކަރީ ގުޅުން ކުޑަ ކުރުމަށެވެ. އެގޮތުން އެމެރިކާގެ ހަތިޔާރަށް އެކްސެސް ލިބޭ، ނޭޓޯގައި ނުހިމެނޭ އެކުވެރި ގައުމުތަކުގެ ލިސްޓުން ޕާކިސްތާން އުނިކުރުމަށް މެމްބަރުން ބާރު އެޅުއްވި އެވެ.
ނަވާރަ ސަތޭކަ ނުވަދިހައިގެ އަހަރުތަކުގައި ތާލިބާން އުފެދިގެން އައިއިރު، ތާލިބާން ލީޑަރުންނާ، ޕާކިސްތާނާ ދެމެދު ގާތް ގުޅުމެއް އޮތެވެ. އޭގެ ފަހުން 1996 އިން 2001 އަށް ވެރިކަން ކުރި ތާލިބާން ސަރުކާރު ބަލައިގަތް ތިން ގައުމުގެ ތެރޭގައި ވެސް ޕާކިސްތާން ހިމެނެ އެވެ.
އެހެން ނަމަވެސް، ސެޕްޓެމްބަރު 11، 2001 ގެ ހަމަލާ އަށް ފަހު ޕާކިސްތާނުން ވަނީ އެމެރިކާ އިން "ޓެރަރިޒަމާ ދެކޮޅަށް ކުރާ ހަނގުރާމައިގައި" އެއްބާރުލުން ދޭން ވައުދުވެފަ އެވެ.
