ސަރުކާރުގެ އިދާރާތަކަށް ހިދުމަތް ހޯދަން ދިއުމުގެ ބަދަލުގައި އޮންލައިންކޮށް ހިދުމަތަށް އެދެވޭނެ ޕްލެޓްފޯމެއް މިއަދު އިފްތިތާހު ކޮށްފި އެވެ.
މިއަދު ބޭއްވި ރަސްމިއްޔާތެއްގައި ގަވް.އެމްވީ މެސެޖްގެ ހިދުމަތް އިފްތިތާހު ކޮށްދެއްވީ ރައީސް އިބްރާހިމް މުހައްމަދު ސޯލިހު އެވެ.
ދެހާސް ދިހަ ވަނަ އަހަރުން ފެށިގެން ތައާރަފް ކޮށްފައިވާ ޖެމްސް ސިސްޓަމްގެ ތެރެއިން ސަރުކާރުގެ އެއް އިދާރާއިން އަނެއް އިދާރާއަށް ލިޔެކިޔުން ފޮނުވަނީ އެ އޮންލައިން ޕްލެޓްފޯމް މެދުވެރިކޮށެވެ. މިއަދު ތައާރަފް ކުރި ގަވް.އެމްވީ މެސެޖްގެ ހިދުމަތާއެކު ޖެމްސް މިވަނީ އާއްމު ރައްޔިތުންނަށް ހުޅުވާލައިފަ އެވެ.
އެ ހިދުމަތް ތައާރަފު ކުރުމުގެ ރަސްމިއްޔާތުގައި ޓެކްނޮލޮޖީ މިނިސްޓަރު އައިމިނަތު ޝައުނާ ވިދާޅުވީ އެ ޕްލެޓްފޯމަކީ ރައްޔިތުން ސަރުކާރަށް ހުށަހަޅަން ޖެހޭ ސިޓީ އާއި ޝަކުވާފަދަ ލިޔެކިޔުންތައް އިންޓަނެޓް މެދުވެރިކޮށް ސަރުކާރަށް ހުށަހަޅާނެ ސަރުކާރުގެ ރަސްމީ ޑިޖިޓަލް ހިދުމަތް ކަމަށެވެ.
"ސަރުކާރުގެ ވަކިވަކި އިދާރާތަކަށް އެކިއެކި ނިޒާމު މެދުވެރިކޮށް ރަސްމީ މުއާމަލާތް ކުރުމުގެ ބަދަލުގައި އެއް ޑިޖިޓަލް ހިދުމަތް މެދުވެރިކޮށް ކޮންމެ އިދާރާއަކަށް މުއާމަލާތު ކުރެވޭ ހިދުމަތެއްވެސް މެ. އީ ފާސް މެދުވެރިކޮށް ރާއްޖޭގައި ދިރިއުޅޭ ކޮންމެ މީހަކަށް ދިވެހިން އަދި ބިދޭސީންނަށް ވެސް ބޭނުން ކުރެވޭ ގޮތަށް އޮތް ޑިޖިޓަލް ހިދުމަތެއްކަން ވެސް އަޅުގަނޑު މިއަދު ފާހަގަ ކުރަން،" މިނިސްޓަރު ވިދާޅުވި އެވެ.
މިއަދުގެ ރަސްމިއްޔާތުގައި މިނިސްޓަރު ޝައުނާ ވާހަކަ ދައްކަވަނީ: ވިދާޅުވީ ޓެކްނޮލޮޖީގެ ބޭނުން ހިފާނެ ކަމަށް. -- ފޮޓޯ: ރައީސް އޮފީސް
މިނިސްޓަރު ވިދާޅުވީ އެ ސިސްޓަމް މެދުވެރިކޮށް ރައްޔިތުން ވަކިވަކި މިނިސްޓްރީތަކަށް ހުށަހަޅާ ޝަކުވާތަކާއި ސިޓީތައް ވަގުތުން ވަގުތަށް ފެންނާނެ ކަމަށެވެ.
ކުރިއަށް އޮތް ދެ އަހަރަށް ބޮޑު ޕްލޭންތަކެއް
ކުރިއަށް އޮތް ދެ އަހަރުގެ ތެރޭގައި ޑިޖިޓަލް ދާއިރާއިން ސަރުކާރުން ގިނަ ކަންތައްތަކެއް ކުރަން ނިންމާފައިވާ ކަމަށް ޝައުނާ ވިދާޅުވި އެވެ. އެގޮތުން ހިދުމަތްތައް ހޯދަން ފަސޭހަކޮށް ޑިޖިޓަލް އިގުތިސާދަކާ ދިމާލަށް ދިއުމަށްޓަކައި އެންސީއައިޓީ، ގަވަމެންޓް ޑިޖިޓަލް ސާވިސްގެ ގޮތުގައި ބަދަލު ކުރުމަށް މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވި އެވެ.
ކުރަން ނިންމާފައިވާ ބައެއް ކަންކަން
- އައިޑެންޓިޓީ ކާޑް ޑިޖިޓަލް ކުރުން
- ޑިޖިޓަލް ކޮންމެ ހިދުމަތެއްގައި ބޭނުން ކުރެވޭ ގޮތަށް އީފާސް ބަދަލު ކުރުން
- ޑިޖިޓަލް މުޖުތަމައުއަކަށް ބޭނުންވާނެ ގާނޫނީ އޮނިގަނޑެއް އެކުލަވާލުން
- ވަކިވަކި އިދާރާތަކަށް ހިދުމަތް ހޯދަން ނުގޮސް އެއް ޕްލެޓްފޯމެއްގެ ތެރެއިން ހިދުމަތް ހޯދޭނެ އިންތިޒާމު ހަމަޖެއްސުން
- ސަރުކާރުގެ އިދާރީ ހިންގުން ވެސް ޑިޖިޓަލް ކުރުން
- ގޭގައި ތިބެގެން މަސައްކަތް ކުރެވޭނެ ނިޒާމެއް ގާއިމު ކުރުން
- ހެލްތު ކެއާ އާއި ސޯޝަލް ސާވިސް ޑިޖިޓަލް ކުރުން
މިނިސްޓަރު ވިދާޅުވީ އަމާޒަކީ ޓެކްނޮލޮޖީ ފަހާ ދުވުމުގެ ބަދަލުގައި އޭގެ ބޭނުން ހިފައި ރާއްޖޭގެ ތަރައްގީއަށް އިންގިލާބީ ބަދަލެއް ގެނައުން ކަމަށެވެ.
