ނަފްސާނީ ދުޅަހެޔޮކަމުގެ ދާއިރާއިން މާސްޓާސް ޑިގްރީގެ 46 ސްކޮލަޝިޕަށް ހަޔާ އެޑިޔުކޭޝަން މިނިސްޓްރީން ހުޅުވާލައިފި އެވެ.
މި ދާއިރާ އިން މީހުން ބިނާ ކުރުމުގެ ސްކޮލަޝިޕްތައް ހުޅުވާލާނެ ކަން އިއުލާން ކުރެއްވީ ނޭޝަނަލް ސްކިލް ޑިވެލޮޕްމަންޓް މާސްޓާ ޕްލޭން އިފްތިތާހު ކުރުމުގެ ރަސްމިއްޔާތުގައި ރައީސް އިބްރާހީމް މުހައްމަދު ސޯލިހެވެ.
ނަފްސާނީ ދާއިރާގެ ޕްރޮފެޝަނަލުން ނެތުމުގެ އުނިކަން ކަމާބެހޭ ފަރާތްތަކުންނާއި އާއްމުން އަންނަނީ ވަރަށް ބޮޑަށް ފާހަގަކުރަމުންނެވެ. ސަރުކާރުން އެ ދާއިރާ އަށް މިހާ ބޮޑު ސަމާލުކަމެއް ދިނީ އެ ސަބަބާ ހުރެ އެވެ.
މި ކޯސްތަކުގެ ކިޔެވުމުގެ ހުރިހާ ހަރަދެއް ދޭނީ ދިވެހި ސަރުކާރުންނެވެ. މީގެ އިތުރުން ސަރުކާރުން ނިންމާފައިވަނީ ކޯސް ފުރިހަމަކުރުމަށް ފަހު، އެ ކޯސް އެލޮކޭޓްކޮށްފައިވާ މުއައްސަސާއަކަށް ވަކި މުއްދަތެއްގައި ހިދުމަތްކުރަން ޖެހޭ ގޮތަށެވެ.
މިނިސްޓްރީން ހުޅުވާލާފައިވާ ސްކޮލަޝިޕްތައް:
- މާސްޓާސް އިން އެޑިކްޝަން ސްޓަޑީޒް / އެޑިކްޝަން މެނޭޖްމެންޓް
- މާސްޓާސް އިން ނާސިން (ސައިކިއޭޓްރިކް ނާސިން/ މެންޓަލް ހެލްތް ނާސިން)
- މާސްޓާސް އިން ކްލިނިކަލް ސައިކޮލޮޖީ
- މާސްޓާސް އިން ކައުންސެލިން / ސައިކޯތެރަޕީ
- މާސްޓާސް އިން ސައިކިއޭޓްރީ
- މާސްޓާސް އިން ލާނިން ޑިސްއެބިލިޓީސް
ސްކޮލާޝިޕަށް ހުޅުވާލާފައިވާ މުއައްސަސާތައް:
މާސްޓާސް އިން އެޑިކްޝަން ސްޓަޑީޒް އާއި އެޑިކްޝަން މެނޭޖްމެންޓްގެ ދާއިން ހުޅުވާލާފައި ވަނީ ހެލްތު މިނިސްޓްރީންނެވެ. އެއީ ޖުމްލަ ފަސް ޖާގަ އެވެ. މާސްޓާސް އިން ނާސިން (ސައިކިއޭޓްރިކް ނާސިން އާއި މެންޓަލް ހެލްތު ނާސިން) ގެ ދާއިރާއިން ހުޅުވާލާފައި ވަނީ އައިޖީއެމްއެޗުން ހަތަރު ޖާގަ އާއި ހެލްތު މިނިސްޓްރީން ފަސް ޖާގަ އަދި ޖެންޑާ މިނިސްޓްރީން ދެ ޖާގަ އެވެ.
މާސްޓާސް އިން ކްލިނިކަލް ސައިކޮލޮޖީގެ ދާއިރާއިން އިއުލާން ކޮށްފައި ވަނީ އައިޖީއެމްއެޗުން ދެ ޖާގަ އާއި ހެލްތް މިނިސްޓްރީން ހަ ޖާގަ އަދި ޖެންޑާ މިނިސްޓްރީން ދެ ޖާގަ އަށެވެ.
މާސްޓާސް އިން ކައުންސެލިން އާއި ސައިކޮތެރަޕީގެ ދާއިރާއިން އައިޖީއެމްއެޗަށް ދެ ޖާގަ ދީފައިވާއިރު ހެލްތު މިނިސްޓްރީ އަށް ހަތް ޖާގަ އަދި ޖެންޑާ އަށް އެއް ޖާގަ ދީފައިވެ އެވެ.
މާސްޓާސް އިން ސައިކިއޭޓްރީ ހުޅުވާލާފައި ވަނީ އައިޖީއެމްއެޗުން ދެ ޖާގަ އަށެވެ. މީގެ އިތުރުން މާސްޓާސް އިން ލާނިން ޑިސްއެބިލިޓީސް އިން ހުޅުވާލާފައި ވަނީ އެޑިޔުކޭޝަން މިނިސްޓްރީން އަށް އެއް ޖާގަ ލިބޭ ގޮތަށެވެ.
ސްކޮލަޝިޕްތަކާ ގުޅޭ އިތުރު މައުލޫމާތު ހަޔާ އެޑިއުކޭޝަން މިނިސްޓްރީގެ ވެބްސައިޓުންނާއި މިނިސްޓްރީގެ 3026950 ނަންބަރު ފޯނުން ސާފު ކުރެވޭނެ ކަމަށް މިނިސްޓްރީން ބުނެ އެވެ.
