ވިއެނާ، އޮސްޓްރިއާ (ސެޕްޓެމްބަރު 12) - އިރާނުގެ ނިއުކްލިއާ ފެސިލިޓީތައް މޮނީޓާ ކުރުމަށް އދ. އިން ބަހައްޓާފައިވާ ކެމެރާތައް ސާވިސް ކުރަން ހުއްދަ ދޭނެ ކަމަށް އިރާނުން ބުނެފި އެވެ.
އެ ކެމެރާތައް ސާވިސް ކުރަން އިންސްޕެކްޓަރުންނަށް ފުރުސަތު ނުދެވޭނެ ކަމަށް އިރާނުން ބުނީ މި އަހަރުގެ ކުރީކޮޅު އެވެ. ނަމަވެސް އަލުން ހުއްދަ ދޭން އެއްބަސްވީ އދ. ގެ ނިއުކްލިއާ އެޖެންސީގެ ވެރިޔާ އިރާނަށް ކުރެއްވި ދަތުރަކާ ގުޅިގެންނެވެ.
"ކެމެރާ އާއި އެހެން ސާމާނު ސާވިސްކޮށް، އޭގެ ސްޓޯރޭޖް މީޑިއާ ބަދަލު ކުރުމުގެ ފުރުސަތު އައިއޭއީއޭގެ އިންސްޕެކްޓަރުންނަށް ލިބޭނެ. އެކަން ކުރާނެ ގޮތާއި ވަގުތާ މެދު ދެ ފަރާތުން ވަނީ އެއްބަސްވެފައި،" އައިއޭއީއޭ އާއި އިރާނުގެ އެޓޮމިކް އެނާޖީ އެޖެންސީ ގުޅިގެން ނެރުނު ބަޔާނެއްގައި ބުންޏެވެ.
އައިއޭއީއޭގެ ވެރިޔާ ރަފައެލް ގްރޮސީ މިދިޔަ ހޮނިހިރު ދުވަހު އިރާނަށް ވަޑައިގެން އޭއީއޯއައިގެ ވެރިޔާ މުހައްމަދު އެސްލަމީއާ ބައްދަލުކުރެއްވި އެވެ. އޭގެ ކުރިން އައިއޭއީއޭ އިން ވަނީ އިރާނުން އެ ޖަމިއްޔާއަށް އެއްބާރުލުން ނުދޭ ކަމަށް ބުނެފަ އެވެ.
"ދެ ފަރާތުން އެއްބަސްވީ މުވާސަލާތީ ގުޅުން ދެމެހެއްޓުމަށާއި ބައްދަލުވުންތައް ކުރިއަށް ގެންދިޔުމަށް،" ބަޔާނުގައި ބުންޏެވެ.
އޭގެ އިތުރުން ގްރޮސީ ވަރަށް އަވަހަށް އިތުރު ދަތުރެއް އިރާނަށް ކުރައްވާނެ ކަމަށް ވެސް ބުނެފައި ވެ އެވެ.
ދެހާސް ފަނަރަ ވަނަ އަހަރު އެކުލަވާލި އިރާނުގެ ނިއުކްލިއާ އެއްބަސްވުން އަލުން ތަންފީޒު ކުރުމާ ގުޅޭ މަޝްވަރާތައް މި ވަގުތު އޮތީ މެދުކެނޑިފަ އެވެ.
އެ އެއްބަސްވުމުގެ ދަށުން އިރާނުގެ ބައެއް ނިޔުކްލިއާ ހަރަކާތްތައް ހުއްޓާލުމުން ބަދަލެއްގެ ގޮތުގައި ދަތިކުރުމުގެ ފިޔަވަޅުތަކަށް ލުއި ދޭނެ އެވެ. ނަމަވެސް 2018 ވަނަ އަހަރު އެމެރިކާގެ އޭރުގެ ރައީސް ޑޮނަލްޑް ޓްރަމްޕް ނިންމެވީ އެއްބަސްވުމަށް އަމަލު ނުކުރުމަށެވެ.
އެއާއެކު އިރާނުން ވެސް ނިއުކްލިއާ މަސައްކަތްތައް އަލުން ފެށި އެވެ. އެކަމަކު އެމެރިކާގެ އާ ރައީސް ޖޯ ބައިޑެން ވިދާޅުވީ އެއްބަސްވުން އަލުން ތަންފީޒު ކުރަން ބޭނުންވެވަޑައިގަންނަވާ ކަމަށެވެ. އެހެންވެ، އެކަމާ ގުޅޭ މަޝްވަރާތައް މި އަހަރު ފެށި އެވެ.
އިރާނުގެ ނިއުކްލިއާ މަޝްރޫއާ ގުޅޭ ގޮތުން މި އަހަރު އުފެދިފައިވާ އެންމެ ބޮޑު ޝަކުވާއަކީ ފެސިލިޓީތައް މޮނީޓާ ކުރުމުގެ ހުއްދަ އައިއޭއީއޭ އަށް ނުދޭން އިރާނުން ނިންމި ނިންމުމެވެ. އިރާނުން ނިންމީ ކެމެރާތަކުގެ ރިއަލް-ޓައިމް ފުޓޭޖް އައިއޭއީއޭ އަށް ނުދިނުމަށެވެ.
