ފުލުހުންގެ ހިދުމަތުގައި މަސައްކަތް ކުރައްވާ ސީނިއާ ހަތް އޮފިސަރަކު މަގާމުން ވަކި ކުރުމަށް ޕޮލިސް ބޯޑުން ނިންމާފައިވާ ނިންމުން ކޮމިޝަނާ އޮފް ޕޮލިސް މުހައްމަދު ހަމީދު ތަންފީޒު ކުރައްވާނެ ކަމަށް ދެކޭ ކަމަށް އެ ބޯޑުން ބުނެފި އެވެ.
ފުލުހުންގެ ސީނިއާ އޮފިސަރުންތަކެއް ވަކި ކުރުމަށް ނިންމީ ކޮރަޕްޝަނާއި ލާއިންސާނީ އަނިޔާ ފަދަ ޖަރީމާތަކުގެ ތުހުމަތު ކުރެވޭ އޮފިސަރުންގެ މައްސަލަތައް ބަލައި، ވަކި މުއްދަތެއްގެ ތެރޭގައި އެ މައްސަލަތަކާމެދު ގޮތެއް ނިންމަންޖެހޭނެ ކަމަށް އަލަށް ތައާރަފްކޮށްފައިވާ ފުލުހުންގެ ހިދުމަތުގެ ގާނޫނުން ލާޒިމުކޮށްފައި އޮއްވަ އެވެ.
ގާނޫނުގައިވާ ގޮތުން ޕޮލިސް ބޯޑުގެ ނިންމުން ތަންފީޒު ކުރައްވަން ޖެހެނީ ޕޮލިސް ކޮމިޝަރަށެވެ. ނަމަވެސް ބޯޑުގެ ނިންމުމަށް މިއަދަށް 35 ދުވަސް ހަމަވެފައިވާއިރު ވެސް އެ ނިންމުން ހަމީދު ތަންފީޒު ނުކުރައްވަ އެވެ.
އެކަމަކު "އަދަދު" އިން ސުވާލު ކުރުމުން ޕޮލިސް ބޯޑުގެ ޑިރެކްޓާ އައިމިނަތު ނާޝިދާ ވިދާޅުވީ ގާނޫނުން އެ ބޯޑުގެ މައްޗަށް ލާޒިމްކޮށްފައިވާ މަސްއޫލިއްޔަތު އަދާކޮށް ނިމިފައިވާ ކަމަށެވެ. ފުލުހުންގެ ހިމެނޭ ގޮތަށް އެހެން މުއައްސަސާތަކުން ވެސް ގާނޫނަށް އަމަލު ކުރާނެ ކަމަށް ޕޮލިސް ބޯޑުން ދެކޭ ކަމަށް ނާޝިދާ ވިދާޅުވި އެވެ.
"ދިވެހި ފުލުހުންގެ ހިދުމަތުގެ ގާނޫނުގެ 3 ވަނަ މާއްދާގެ ނ. ގައިވާ މަސައްކަތް ބޯޑުން ގާނޫނުގައި ކަނޑައަޅާފައިވާ މުއްދަތުގައި ފުރިހަމަކޮށް ނިންމައި، އެ ނިންމުން ތަންފީޒުކުރުމަށް އެ މާއްދާގެ ކ. ގައިވާ ގޮތުގެމަތީން އޯގަސްޓު 9، 2021 ގައި ޕޮލިސް ބޯޑުން ވަނީ ކޮމިޝަނާ އޮފް ޕޮލިސް އަށް ފޮނުވާފައި. އަދި ދައުލަތުގެ އެހެން މުއައްސަސާތަކުން ވެސް ގާނޫނުގައިވާ ގޮތުގެމަތީން އަމަލުކުރާނެކަމުގައި ޕޮލިސް ބޯޑުން ދެކެން،" ނާޝިދާ ވިދާޅުވި އެވެ.
މިދިޔަ އޯގަސްޓު 9، ގައި ބޯޑުން ވަކި ކުރަން ނިންމި އޮފިސަރުންނަކީ އެސިސްޓެންޓް ކޮމިޝަނާ ފަރުހާދު ފިކުރީ އާއި އެސިސްޓެންޓް ޕޮލިސް ކޮމިޝަނަރުންގެ މަގާމުގައި ތިއްބެވި މުހައްމަދު ޖަމްޝީދާއި އަހްމަދު މުހައްމަދު (ޓޫފޯ) އާއި ޗީފް ސުޕްރިންޓެންޑެންޓް އޮފް ޕޮލިސްގެ މަގާމުގައި ތިއްބެވި އަހްމަދު ޝުހާދާއި އަބްދުﷲ ޝަރީފާއި ސުޕްރިންޓެންޑެންޓް އޮފް ޕޮލިސްގެ މަގާމުގައި ތިއްބެވި މުހައްމަދު ދާއޫދު އަދި އިސްމާއިލް ޝަމީމެވެ.
އެ ހަތް އޮފިސަރުންގެ މައްސަލައިގައި ވާހަކަ ދައްކަވަމުން ފުލުހުންގެ މީޑިޔާ އޮފިޝަލަކު މި ނޫހަށް ކުރިން ބުނެފައި ވަނީ "ޕޮލިސް ބޯޑުގެ ރިޕޯޓާ ގުޅޭ ގޮތުން ސީޕީ އަދި ވަކި ގޮތެއް ނުނިންމަވާ" ކަމަށެވެ. އަދި ބައެއް ކަންކަން ސާފު ކުރެއްވުމަށް ކޮމިޝަނާ ހަމީދު ބޯޑާ ބައްދަލު ކުރައްވާފައިވާ ކަމަށް ވެސް އޭނާ ވިދާޅުވި އެވެ. ނަމަވެސް ސާފު ކުރައްވަން ބޭނުންވަނީ ކޮން މައުލޫމާތެއްކަން ފުލުހުން ނުބުނެ އެވެ.
"އެ ރިޕޯޓާ ގުޅޭ ގޮތުން ފިޔަވަޅުތައް އެޅުމަށް ކުރަންޖެހޭ ކަންކަން ދަނީ ބަލަމުން. މީގެ އިތުރުން ޕޮލިސް ބޯޑުން އިތުރު ކަންކަން ސާފު ކުރެއްވުމަށްޓަކައި ކޮމިޝަނާ އޮފް ޕޮލިސް ވަނީ އޯގަސްޓް 26 ވަނަ ދުވަހު ޕޮލިސް ބޯޑުގެ މެމްބަރުންނާ ބައްދަލު ކުރައްވާ މައުލޫމާތު ސާފު ކުރައްވައިފައި،" މީީޑިއާ އޮފިޝަލް ކުރިން ބުނެފައިވެ އެވެ.
ޕޮލިސް ބޯޑާ ހަމީދު ބައްދަލު ކުރެއްވި ފަހުން، އޯގަސްޓު 30، ގައި އޭނާ ހޯމް މިނިސްޓަރު އިމްރާން އަބްދުﷲ އާއެކު ނ. އަތޮޅަށް ވަޑައިގެންނެވި ރަސްމީ ދަތުރެއްގައި ވަކި ކުރަން ނިންމާފައިވާ އޮފިސަރުންގެ ތެރޭގައި ހިމެނޭ ފަރުހާދު ވަނީ ބައިވެރިކުރައްވައިފަ އެވެ.
