ގުދުސް (ސެޕްޓެމްބަރު 11) - އިޒްރޭލުގެ ސެކުއިރުޓީ ވަރުގަދަ ޖަލަކުން ފިލި ފަލަސްތީނުގެ ހަ ގައިދީންގެ ތެރެއިން ހަތަރު މީހަކު ހޯދައިފި އެވެ.
އިޒްރޭލު ފުލުހުން ބުނީ އޭގެ ތެރެއިން ދެ މީހުން ހައްޔަރު ކުރީ ހުކުރު ދުވަހު ކަމަށާއި އަނެއް ދެ މީހުން ހައްޔަރު ކުރީ ހޮނިހިރު ދުވަހު ހެނދުނު ކަމަށެވެ.
ހުކުރު ދުވަހު ދެ މީހުން ހައްޔަރު ކުރީ ނަޒަރެތު ސިޓީން ކަމަށާއި ހޮނިހިރު ދުވަހު ހެނދުނު ދެ މީހުން ހައްޔަރު ކުރީ ޓްރަކު ޕާކުކުރާ ސަރަހައްދަކުން ކަމަށް ފުލުހުންގެ ބަޔާނެއްގައި ބުންޏެވެ.
ފުރަތަމަ ހައްޔަރު ކުރީ އުމުރުން 48 އަހަރުގެ ޔައުގޫބް ގަދްރީ އާއި 45 އަހަރުގެ މަހްމޫދު އަބްދުﷲ އަރްދާހް އެވެ. އެ ދެ މީހުންނަކީ ވެސް އިސްލާމިކް ޖިހާދު ގްރޫޕުގެ މެމްބަރުންނެވެ.
ފަހުން ހައްޔަރު ކުރި ދެ މީހުންނާ ގުޅޭ ތަފްސީލް އަދި ހާމައެއް ނުކުރެ އެވެ. އިޒްރޭލުގެ މީޑިއާއިން ރިޕޯޓު ކުރާ ގޮތުގައި ގިލްބޯއާ ޖަލުން ފިލަން ރޭވި މޭސްތިރިއަކީ އަރްދާހް އެވެ.
އޭނާ ހައްޔަރު ކުރިކަން އިއުލާނު ކުރުމާއެކު ގާޒާ އިން ދެކުނު އިޒްރޭލަށް ރޮކެޓު ހަމަލާއެއް ފޮނުވި ކަމަށް އިޒްރޭލު ސިފައިން ބުންޏެވެ. ނަމަވެސް އިޒްރޭލުގެ އަޔަން ޑޯމް ޑިފެންސް ސިސްޓަމުން ވަނީ އެ ރޮކެޓު ހުއްޓުވާފަ އެވެ.
"ފިލައިގެން އުޅުނު ދެ ގައިދީން ލޮކޭޓު ކުރުމަށް ފަހު، ފުލުހުން ވަނީ އެ މީހުން ފަހަތުން ހެލިކޮޕްޓަރެއް ފޮނުވާފައި،" ފުލުހުންގެ ބަޔާނުގައި ބުންޏެވެ.
"ނަަޒަރެތުގެ ދެކުނުން އެ މީހުން ހައްޔަރު ކުރަން މަސައްކަތް ކުރުމުން އެއްވެސް ވަރަކަށް ދެކޮޅު ހަދާފައެއް ނުވޭ."
އިޒްރޭލުގެ މީޑިއާ އިން ބުނީ ޑަސްބިން ހާވައިގެން ކާތަކެތި ހޯދަމުން ދިޔަ ފިރިހެނުންގެ ވާހަކަ ފުލުހުންނަށް ރިޕޯޓު ކުރީ އާއްމު ރައްޔިތެކެވެ.
މިދިޔަ ހޯމަ ދުވަހު ފަލަސްތީނުގެ ހަ ގައިދީން ޖަލުން ފިލީ ސިންކެއްގެ ދަށުން، ފުން، ހިމަ މަގެއް ކޮނެގެންނެވެ. އެ މީހުން ހޯދަން އިޒްރޭލުން ވަނީ އިތުރު ސިފައިން ހުޅަނގު އައްސޭރި އަށް ފޮނުވާފަ އެވެ.
އިޒްރޭލުން ބުނާ ގޮތުގައި އެ ހަ މީހުންނަކީ ވެސް ފަލަސްތީނުގެ ގްރޫޕުތަކާ ގުޅިގެން އިޒްރޭލާ ދެކޮޅަށް ހަމަލާ ދިން ނުވަތަ ހަމަލާ ދޭން ރޭވި މީހުންނެވެ.
