ރާމަﷲ، ހުޅަނގު އައްސޭރި (ސެޕްޓެމްބަރު 9) - އިޒްރޭލުގެ ސެކިއުރިޓީ ވަރުގަދަ ޖަލަކުން ފިލި ފަލަސްތީނުގެ ހަ ގައިދީން ހޯދުމަށް އިޒްރޭލު ސިފައިން ހުޅަނގު އައްސޭރި ފުރާލައިފި އެވެ.
ޖަލުން ފިލި މީހުން ހޯދަން މަސައްކަތް ކުރާތާ މިހާރު ތިން ދުވަސް ވެއްޖެ އެވެ. އެ މީހުންގެ އާއިލާތަކުގެ ބައެއް މީހުން ވެސް މިހާރު ވަނީ ހައްޔަރުކޮށްފަ އެވެ.
އިޒްރޭލް ސިފައިންގެ ބަޔާނެއްގައި ބުނީ ފިލައިގެން އުޅޭ ގައިދީންތައް ހޯދުމަށް ހުޅަނގު އައްސޭރީގައި ތިބޭ ސިފައިންގެ އަދަދު އިތުރު ކުރަން ނިންމާފައިވާ ކަމަށެވެ.
އިޒްރޭލް ސިފައިންނާއި ފަލަސްތީނުގެ ޒުވާނުންނާ ދެމެދު ނަބްލޫސްގައި ބުރާސްފަތި ދުވަހު ހަމަނުޖެހުން ހިނގި އެވެ. ފަލަސްތީނުގެ ރެޑް ކްރެސެންޓުން ބުނީ 60 މީހުންނަށް އަނިޔާވި ކަމަށެވެ.
ގައިދީން ފިލުމުން އެ މީހުންނަށް ހިތްވަރުދީ އުފާ ފާޅުކުރުމުގެ ގޮތުން ފަލަސްތީނުގެ ރައްޔިތުން ވަނީ އެއްވުންތައް ބާއްވާފަ އެވެ.
ރިޕޯޓުތައް ބުނާ ގޮތުން އިޒްރޭލުގެ އެހެން ޖަލުތަކުގައި ވަނީ ހަމަނުޖެހުން އުފެދެން ފަށާފަ އެވެ. އެގޮތުން ކްޒިއޮޓް އާއި ރާމޮން ޖަލުގައި ގައިދީން ހުޅުޖަހާފައި ވެ އެވެ.
