ރާމަﷲ، ފަލަސްތީން (ސެޕްޓެމްބަރު 8) - އިޒްރޭލުގެ ސެކިއުރިޓީ ވަރުގަދަ ޖަލަކުން ފިލި ފަލަސްތީނުގެ ހަ މީހުންގެ އާއިލާއަށް ނިސްބަތްވާ ބައެއް ފަރާތްތައް އިޒްރޭލުން ހައްޔަރުކޮށްފި އެވެ.
އުތުރު އިޒްރޭލުގައި ހުންނަ ގިލްބޯއާ ޖަލުން ހަ މީހުން ފިލީ މިދިޔަ ހޯމަ ދުވަހު އެވެ. އެ މީހުން ފިލަން ބޭނުން ކުރީ ބިމު އަޑިން ކޮނުނު ހަނި މަގެކެވެ.
އެ ހަ މީހުން އަތުލައިގަތުމަށް އިޒްރޭލުން ހިންގާ ވަރުގަދަ އޮޕަރޭޝަނުގައި ޑްރޯން ބޭނުން ކުރަމުން ދާއިރު، މަގުތައް ބަންދުކޮށް ޗެކް ޕޮއިންޓުތައް ވަނީ ގާއިމްކޮށްފަ އެވެ.
ފިލި މީހުންގެ ތެރެއިން ގިނަ މީހުން ނިސްބަތްވަނީ ހުޅަނގު އައްސޭރީގެ ޖެނިން އަވަށަށެވެ. އެހެންވެ އެ ތަނުގައި އިޒްރޭލު ސިފައިން އަންނަނީ ގިނަ އަދަދަކަށް ހަރަކާތްތެރިވަމުންނެވެ.
ފަލަސްތީނު ގައިދީންގެ ކުލަބުން ބުނީ ޖަލުން ފިލުމަށް ރޭވި ރޭވުމުގެ "މާސްޓާމައިންޑު"ގެ ގޮތުގައި ބެލެވޭ މަހްމޫދް އަރްދާހްގެ ދެ ބޭބެ ހައްޔަރުކޮށްފައިވާ ކަމަށެވެ.
އޭގެ އިތުރުން ވެސް ތިން މީހަކު ވަނީ ހައްޔަރުކޮށްފަ އެވެ. އެއީ މަހްމޫދް އަރްދާހްގެ ތިމާގެ ޑރ. ނިދާލް އަރްދާހް އާއި ޖަލުން ފިލި މުނާދިލް އިންފިއާތުގެ ބައްޕަ އާއި އިތުރު ގައިދީއެއްގެ ބޭބެ އެވެ.
އިޒްރޭލު ސިފައިން ބުނީ ރޭ ދަންވަރު ބަޔެއް މީހުން ހައްޔަރު ކުރި ކަމަށެވެ. ނަމަވެސް ތަފްސީލް ހާމައެއް ނުކުރެ އެވެ. އިޒްރޭލުން އުޅެނީ 1967 ވަނަ އަހަރުން ފެށިގެން ފަލަސްތީނުގެ ހުޅަނގު އައްސޭރިއަށް އަރައިގެންނެވެ.
