ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ށ. އަދި ރ. އަތޮޅަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން އެންމެ ފުރަތަމަ މަންޒިލްކަމުގައިވާ ށ. ފުނަދުއަށް ވަޑައިގެން ށ. އަތޮޅުގެ ކައުންސިލް މެމްބަރުންނާ ބައްދަލުކުރައްވައިފި އެވެ.
ރައީސް ސޯލިހް އެ ދަތުރުފުޅަށް ފުރާވަޑައިގެންނެވީ މިއަދު މެންދުރުގެ ވަގުތެއްގަ އެވެ. ށ. އަތޮޅާ ރ. އަތޮޅަށް ކުރައްވާ އެ ދަތުރުފުޅަށް ތިން ދުވަސް ހޭދަވާނޭއިރު އެ ދަތުރުފުޅުގައި ށ. އަތޮޅުގެ ހަތަރު ރަށަކަށް ޒިޔާރަތްކުރެއްވުމަށް ވަނީ ހަމަޖެހިފަ އެވެ. އެ ރަށްތަކަކީ ށ. ފުނަދޫ، ށ. ފޯކައިދޫ ށ. ޅައިމަގު އަދި ށ. މާއުނގޫދޫ އެވެ.
ފުރަތަމަ ބައްދަލުވުމުގައި ށ. އަތޮޅުގައި ކުރިޔަށްގެންދާ އުމްރާނީ ތަރައްގީގެ މަޝްރޫއުތަކާ ގުޅޭގޮތުން އަދި ކައުންސިލްގެ ފަރާތުން އަތޮޅުގެ ތަރައްގީއާ ގުޅިފައިވާ ހުށައެޅުންތައްވެސް ހުށަހަޅާނެ އެވެ.
އަތޮޅު ކައުންސިލާއެކު ބާއްވާ ބައްދަލުވުމަށްފަހު ރައީސް ސޯލިހު ފުނަދޫގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނާ ބައްދަލުކުރުމަށް ވަނީ ހަމަޖެހިފަ އެވެ.
އަދި އެއަށް ފަހު ފުނަދޫގައި ހުންނަ ށ. އަތޮޅު ހޮސްޕިޓަލަށް ޒިޔާރަތްކުރައްވާ ހޮސްޕިޓަލުގެ ހާލަތު ރައީސް ސޯލިހު ބައްލަވާލެއްވުމަށް ވަނީ ހަމަޖެހިފަ އެވެ. ށ. އަތޮޅުގައި މިހާރުވެސް މުހިންމު ތަރައްގީގެ މަޝްރޫއުތަކެއް ކުރިޔަށްދާއިރު އޭގެ ތެރޭގައި ފުނަދޫ ހޮސްޕިޓަލް އަޕްގްރޭޑްކުރުމުގެ މަސައްކަތް ފާހަގަކޮށްލެވެ އެވެ.
ފުނަދުއަށް ކުރައްވާ ޒިޔާރަތަށްފަހު ރައީސް ސޯލިހު ދެން ވަޑައިގަންނަވާނީ ށ. ފޯކައިދޫއަށެވެ.
