ޓެކްސީ ޑްރައިވަރަކު ކުޑަކުއްޖަަކަށް ޖިންސީ ގޯނާކުރި ކަމަށް ބުނާ މައްސަލައެއް ފެންމަތި ވެއްޖެ އެވެ.
ފުލުހުން ބުނީ އުމުރުުން 16 އަހަރުގެ އަންހެން ކުއްޖަކަށް ޓެކްސީ ޑްރައިވަރަކު ޖިންސީ ގޯނަ ކުރި މައްސަލައެއް ރޭގެ ވަގުތެއްގައި ހުށަހަޅާފައިވާ ކަމަށެވެ. އެކަން އަންނަނީ ތަހުގީގުކުރަމުންނެވެ. އެކަމަކު އަދި މީހަކު ހައްޔަރުކޮށްފައެއް ނުވެ އެވެ.
މިފަދަ ހާދިސާތައް ފަހަކަށް އައިސް އަންނަނީ އިތުރުވަމުންނެވެ. އެގޮތުން 2017 ވަނަ އަހަރު މާލޭގައި ޓެކްސީއަކަށް އެރި އަންހެނަކު ދާން ބޭނުން ނޫން ތަނަކަށް ގެންދަން އުޅުމުން ވަނީ ކާރުން ފުންމާލަން އުޅެފަ އެވެ.
ހަމަ އެ އަހަރު ވަނީ ފަސިންޖަރަކަށް އިންޒާރު ދީ ގައިގައި އަތް ލާ ޑްރައިވަރަކު ހައްޔަރުކުރި އެވެ. އޭގެ ފަހުން ފިރިހެން ކުއްޖަކަށް ޓެކްސީއެއްގައި ޖިންސީ ގޯނާ ކުރި މައްސަލައެއް ވެސް ފެންމަތިވި އެވެ. މީގެ އިތުރުން 2018 ވަނަ އަހަރު ފަސިންޖަރަކު ބުރުގާ ނާޅާ ކަމަށް ބުނެ އޭނާ މަރާލަން އިންޒާރު ދިން ޑްރައިވަރެއް ވެސް ވަނީ ހައްޔަރު ކޮށްފަ އެވެ.
