ލިވަޕޫލް (ސެޕްޓެމްބަރު 7) - މިސްރުގެ ފޯވާޑް މުހައްމަދު ސަލާހު ލިވަޕޫލާ އެކު ހަދާފައިވާ ކޮންޓްރެކްޓް އާ ކުރަން ބޮޑު މުސާރަ އަކަށް ޑިމާންޑްކޮށްފައިވާ ކަމަށް ބުނެ، ދެކެވޭ ވާހަކަތައް ލިވަޕޫލްގެ ހަބަރުތައް ގެނެސްދޭ މިޑީއާތަކުން ދޮގުކޮށްފި އެވެ.
އިނގިރޭސި ބައެއް ނޫސްތަކުން ރިޕޯޓްކޮށްފައިވާ ގޮތުގައި އުމުރުން 29 އަހަރުގެ ސަލާހު ލިވަޕޫލާ އެކު ކޮންޓްރެކްޓް އާ ކުރަން ބޭނުންވަނީ ހަފްތާ އަކު 690،000 ޑޮލަރު (500،000 ޕައުންޑް) އަށެވެ. މިއީ ދާދި ފަހުން މެންޗެސްޓާ ޔުނައިޓެޑުން ކްރިސްޓިއާނޯ ރޮނާލްޑޯ އަށް ހަފްތާ އަކު ބޯނަހާ އެކު ދޭން ނިންމި މުސާރައާ ގާތްކުރާ އަދަދެކެވެ.
ސަލާހު މި ވަގުތު ލިވަޕޫލްގެ ކޮންޓްރެކްޓްގައި ހުރީ ހަފްތާ އަކު 276،000 ޑޮލަރު (200،000 ޕައުންޑް) ލިބޭ ގޮތަށެެވެ. ލިވަޕޫލުން މަސައްކަތް ކުރަނީ އިތުރު ތިން އަހަރަށް ސަލާހު ލައްވައި ކޮންޓްރެކްޓް އާ ކުރާށެވެ. ސަލާހު މި ވަގުތު ލިވަޕޫލްގެ ކޮންޓްރެކްޓްގައި ހުރީ 2023 ވަނަ އަހަރުގެ ޖޫން މަހުގެ ނިޔަލަށެވެ.
ލިވަޕޫލްގެ ހަބަރުތައް ގެނެސްދޭ މީޑިއާތަކުން އެ ކްލަބްގެ އޮފިޝަލުންނާ ހަވާލާދީ ރިޕޯޓްކޮށްފައިވާގޮތުގައި ދައުރުވަމުން ދާ ސަލާހުގެ ބޮޑު މުސާރައިގެ ވާހަކަތަކުގައި ހަގީގަތެއް ނެތް ކަމަށެވެ. ލިވަޕޫލްގެ އޮފިޝަލުންނާއި ސަލާހުން އަދިވެސް އަންނަނީ އާ ކޮންޓްރެކްޓްގެ ގިނަ ކަންކަމާ ބެހޭގޮތުން މަޝްވަރާ ކުރަމުން ކަމަށެވެ.
ރިޕޯޓްތައް ބުނާގޮތުގައި ސަލާހު އިތުރު ތިން އަހަރަށް ލިވަޕޫލާ އެކު ސޮއިކުރަން ބޭނުންވާ މުސާރަ އުޅެނީ ހަފްތާ އަކު 350،000 ޑޮލަރުގަ އެވެ.
ލިވަޕޫލުން ސަލާހު ގަތީ 2017 ވަަނަ އަހަރު އިޓަލީގެ ރޯމާ އަށް އެންމެ ފުރަތަމަ 50 މިލިއަން ޑޮލަރު ދައްކައިފަ އެވެ. އަދި ލިވަޕޫލްގައި ސަލާހު ދައްކަމުން އަންނަ މޮޅު ކުޅުމަށް ބަލާފައި އިތުރު ހަތް މިލިއަން ޑޮލަރު ދޭން ޖެހުނެވެ.
ކުރިން ޗެލްސީ އާއި ފިއޮރެންޓީނާ އަށް ވެސް ކުޅުނު ސަލާހު ލިވަޕޫލަށް ބަދަލުވުމަށް ފަހު ވަނީ އެ ޓީމަށް ކުޅެދިން 206 މެޗުން 127 ގޯލު ޖަހައިފަ އެވެ. އެ ޓީމުގައި ހުރެ އިނގިރޭސި ޕްރިމިއާ ލީގާއި ޗެމްޕިއަންސް ލީގު އަދި ކްލަބް ވޯލްޑް ކަޕާއި ޔުއެފާ ސުޕަ ކަޕް ކާމިޔާބު ކުރި އެެވެ. އަދި ޕްރިމިއާ ލީގުގެ ރަން ބޫޓު ދެ ފަހަރު ވަނީ ހޯދައިފަ އެވެ.
ސްޕެއިންގެ މީޑިއާ ރިޕޯޓްތައް ބުނާގޮތުގައި ސަލާހުގެ ކޮންޓްރެކްޓް ކަންތައްތައް ދާ ގޮތް މޮނީޓާ ކުރުމުގައި އެންމެ އިސްކޮށް ހަރަކާތެރިވަނީ ރެއާލް މެޑްރިޑާއި ޕީއެސްޖީ އެވެ.
