ގުދުސް (ސެޕްޓެމްބަރު 6) - ކުރީގެ ހަނގުރާމަވެރިޔަކު ހިމެނޭ ގޮތަށް ފަލަސްތީނުގެ ހަ މީހަކު އިޒްރޭލުގެ ޖަލަކުން ފިލައިފި އެވެ.
އިޒްރޭލު ޕްރިޒަން ސާވިސް އިން ބުނީ އެކަމުގެ އެލާޓް ލިބުނީ ހޯމަ ދުވަހު ދަންވަރު 03:00 ހާއިރު ކަމަށާއި ގިލްބޯއާ ޖަލު ކައިރިން ޝައްކު ކުރެވޭ ބަޔަކު ފެނިގެން މީހުން ރިޕޯޓު ކުރި ކަމަށެވެ.
ޖަލުން ފިލި ހަ މީހުންގެ ތެރޭގައި ހިމެނޭ ޒަކަރިއްޔާ ޒުބެއިދީ އަކީ ހުޅަނގު އައްސޭރީގެ ޖެނިން ސިޓީ އަށް ނިސްބަތްވާ ކުރީގެ ހަނގުރާމަވެރިޔެކެވެ.
އެ މީހުން ހޯދުމަށް ބޮޑު އޮޕަރޭޝަނެއް ފަށާފައި ވާއިރު، ފުލުހުންނާއި ސިފައިން އަދި ޖާސޫސީ އިދާރާ އިން ވެސް އެ މަސައްކަތުގައި ބައިވެރިވެ އެވެ.
އިޒްރޭލުގެ މީޑިއާ ރިޕޯޓުތައް ބުނާ ގޮތުން ބެލެވޭ ގޮތުގައި އެ މީހުން ވަނީ ހުޅަނގު އައްސޭރި އަށް އެތެރެވެފަ އެވެ. ހުޅަނގު އައްސޭރިއަކީ 1967 ވަނަ އަހަރުން ފެށިގެން އިޒްރޭލުން ވެރިވެގަނެގެން އުޅޭ ފަލަސްތީނުގެ ބިމެކެވެ.
ސިފައިން ބުނީ ޖަލުން ފިލި މީހުން ހޯދުމުގެ އޮޕަރޭޝަނުގެ ދަށުން ފައުޖުތައް ތިބީ ހުޅަނގު އައްސޭރީގައި ތައްޔާރީ ހާލަތުގައި ކަމަށެވެ.
އިޒްރޭލް ޕްރިޒަން ސާވިސް އިން ނެރުނު ވީޑިއޯއަކުން ފެންނަ ގޮތުގައި އެ މީހުން ޖަލުން ފިލާފައި ވަނީ ސިންކެއްގެ ދަށުން ހިމަ އަދި ފުން ވަޅުގަނޑެއް ކޮނެ، ޖަލުން ބޭރަށް ދެވޭނެ ބިމުއަޑީގެ މަގެއް ހަދައިގެންނެވެ.
"ސަލާމަތާ ގުޅުން ހުރި ކުށްތަކުގައި" ގިލްބޯއާ ޖަލުގައި ބަންދުކޮށްފައި ތިބި 400 ގައިދީން އެހެން ތަނަކަށް ބަދަލު ކުރަން މިހާރު ވަނީ ނިންމާފަ އެވެ.
