ގުދުސް (ސެޕްޓެމްބަރު 5) - އުރުދުން އާއި އިޒްރޭލުގެ ޑިޕްލޮމެޓިކް ގުޅުން ރަނގަޅު ވާން ފަށާފައިވާ މި ދަނޑިވަޅުގައި އިޒްރޭލުގެ ރައީސް އިސްހާގް ހެރްޒޮގް އާއި އުރުދުންގެ ރަސްގެފާނު އަބްދުﷲ ދެ ވަނަ އާ ދެމެދު އައްމާނުގައި ސިއްރު މަޝްވަރާތަކެއް ބާއްވައިފި އެވެ.
"މިދިޔަ ހަފުތާގައި އުރުދުންގެ ރަސްގެފާނާ ބައްދަލުކޮށް ވަރަށް ދިގު މަޝްވަރާތަކެއް ކުރެވުނު،" އިޒްރޭލުގެ ޓީވީއަކުން ދެއްކި ހެރްޒޮގްގެ އިންޓަވިއުއެއްގައި ވިދާޅުވި އެވެ.
"އުރުދުން އަކީ ވަރަށް މުހިއްމު ގައުމެއް. ރަސްގެފާނު އަބްދުﷲ އަކީ އަޅުގަނޑު ވަރަށް އިހްތިރާމް ކުރާ ބޭފުޅެއް. އެއީ މި ސަރަހައްދުގެ ހަމަޖެހުމަށް މުހިއްމު ބައިވެރިއެއް އަދި ވަރުގަދަ ލީޑަރެއް،" ރައީސްގެ އޮފީހުން ފަހުން ނެރުނު ބަޔާނެއްގައި ހެރްޒޮގް ވިދާޅުވި އެވެ.
ބަޔާނުގައިވާ ގޮތުން ރަސްގެފާނުގެ ދައުވަތަކަށް ދެ ލީޑަރުން ވަނީ އުރުދުންގެ ޝާހީ ގަނޑުވަރުގައި ބައްދަލުކުރައްވައި، މުހިއްމު މައްސަލަތަކާ ގުޅޭ ގޮތުން މަޝްވަރާ ކުރައްވާފަ އެވެ.
އިޒްރޭލާއެކު ބޯޑަރު ހިއްސާ ކުރާ ގައުމުތަކުގެ ތެރެއިން އެ ގައުމާއެކު ސުލްހައިގެ އެއްބަސްވުމަކަށް އައިސްފައި ވަނީ ހަމައެކަނި އުރުދުން އާއި މިސްރެވެ.
ކުރީގެ ބޮޑު ވަޒީރު ބެންޖަމިން ނަތަންޔާހޫގެ ވެރިކަމުގައި އުރުދުންއާ އެކު އޮތް ގުޅުން ވަރަށް ބޮޑަށް ގޯސްވި އެވެ. މިދިޔަ ޖޫން މަހު އާ ބޮޑު ވަޒީރު ނަފްތާލީ ބެނެޓް މަސައްކަތް ފެއްޓެވުމާއެކު އައްމާނަށް ވަޑައިގެން ރަސްގެފާނު އަބްދުﷲ އާ ބައްދަލުކުރެއްވި އެވެ.
އޭގެ ފަހުން ޖުލައި މަހު ދެ ގައުމުން ވަނީ ވިޔަފާރީގެ އެއްބަސްވުމެއްގައި ސޮއިކޮށްފަ އެވެ. އެގޮތުން އިޒްރޭލުން އުރުދުން އަށް 50 މިލިއަން ކިއުބިކް މީޓަރުގެ ފެން ކޮންމެ އަހަރަކު ވެސް ވިއްކާނެ ކަމަށް ބުންޏެވެ.
އުރުދުން އިން ހުޅަނގު އައްސޭރިއަށް އެކްސްޕޯޓް ކުރާ މުދަލުގެ އަދަދު އިތުރު ކުރުމަށް އެ އެއްބަސްވުމުގެ ދަށުން ފުރުސަތު ލިބެ އެވެ. ހުޅަނގު އައްސޭރިއަކީ 1967 ވަނަ އަހަރުން ފެށިގެން އިޒްރޭލުން ވެރިވެގަނެގެން އުޅޭ ފަލަސްތީނުގެ ބިމެކެވެ.
