ރޯމް (ސެޕްޓެމްބަރު 5) - މި ފަހަރުގެ ޔޫރޯގެ ކުއާޓާ ފައިނަލުގައި ބެލްޖިއަމާ ދެކޮޅަށް ކުޅުނު މެޗުގެ ތެރެއިން ފަޔަށް ސީރިއަސް އަނިޔާއެއް ލިބުނު އިޓަލީގެ ފުލްބެކް ލިއޮނާޑޯ ސްޕިނަޒޯލާ، މި އަހަރު ނިމުމުގެ ކުރިން ކުޅުމަށް އެނބުރި އާދެވޭނެ ކަމަށް ބުނެފި އެވެ.
އުމުރުން 28 އަހަރުގެ ސްޕިނަޒޯލާ އަކީ ޔޫރޯގައި އެންމެ ތަފާތު މޮޅު ކުޅުމެއް ދެއްކި އެއް ފުލްބެކް އެވެ. ޔޫރޯގައި އިޓަލީން ފުރަތަމަ ކުޅުނު ފަސް މެޗުގައި ވެސް ފުރަތަމަ އެގާރައިގައި ސްޕިނަޒޯލާ ކުޅުނެވެ. ގްރޫޕް ސްޓޭޖުގައި އިޓަލީން ތުރުކީއާ ދެކޮޅަށް ކުޅުނު މެޗާއި ނޮކައުޓް ބުރުގައި އޮސްޓްރިއާ ބަލިކުރި މެޗުގެ މޮޅު ކުޅުންތެރިޔާގެ މަގާމު ހޯދީ ސްޕިނަޒޯލާ އެވެ.
ކުރިން ޔުވެންޓަސް އަށް ކުޅުނު އަދި މިހާރު ރޯމާގައި ހުރި ސްޕިނަޒޯލާ މި ދުވަސްވަރު ކުރިއަށް ގެންދަނީ ރިހެބިލިޓޭޝަންގެ ކަންކަމެވެ. އަންނަ މަސް ތެރޭގައި އިންޑިވިޖުއަލް ޓްރެއިނިންތަކަށް ނުކުތުމަށް ފަހު މަހެއްހާ ދުވަސް ތެރޭ ޓީމު ޓްރެއިނިންގައި ބައިވެރިވެވޭނެ ކަމަށް ސްޕިނަޒޯލާ ވަނީ ބުނެފަ އެވެ.
"މޮރީނިއޯ (ރޯމާ ކޯޗު) އާއި މަންޗިނީ (އިޓަލީ ކޯޗު) އަށް އެނގޭނެ ނޮވެމްބަރުގައި އަހަރެން ޓީމު ޓްރެއިނިން އަށް ނުކުމެ ޑިސެމްބަރުގައި މެޗުތައް ކުޅެވޭނެ ވަރަށް ފިޓްވާނެކަން،" ސްޕިނަޒޯލާ ބުންޏެވެ.
ޔޫރޯގައި ބެލްޖިއަމާ ދެކޮޅަށް އިޓަލީން ކުޅުނު މެޗުގެ ތެރެއިން ސްޕިނަޒޯލާ (ކ) ބޯޅަ ފޮނުވާލަނީ
އަނިިޔާގައި ހުރިއިރު ވެސް ޓީމުގެ ކުޅުންތެރިންގެ ފަރާތުން ލިބުނު އެއްބާރުލުމަށް ސްޕިނަޒޯލާ ވަނީ ޝުކުރު އަދާކޮށްފަ އެވެ. އިޓަލީން ވަނީ ޔޫރޯގެ ޗެމްޕިއަންކަން ހޯދުމަށް ފަހު ބޭއްވި އުފާފާޅުކުރުމުގެ ކޮންމެ އިވެންޓެއްގައި ވެސް ސްޕިނަޒޯލާގެ ހަނދާން އާ ކޮށްފަ އެވެ. އަދި ޕްރީ ސީޒަނުގެ ތެރޭގައި ރޯމާ އިން ވަނީ ސްޕިނަޒޯލާ އަށް ހާއްސަ އިވެންޓެއް ބާއްވައިފަ އެވެ.
ސްޕިނަޒޯލާ ބުނީ ފުޓްބޯޅައިގެ ޓީމްވޯކްގެ މިސާލެއް އިޓަލީ ޓީމާއި ރޯމާ އިން ދައްކަމުން އަންނަ ކަމަށެވެ.
ޔުވެންޓަސް އެކެޑަމީން ތަމްރީންވި ސްޕިނަޒޯލާ ވަނީ އެ ޓީމަށް ކުޅުނުއިރު، ލޯން އެއްބަސްވުމެއްގެ ދަށުން އެކި އަހަރު މަތިން އިޓަލީގެ ހަ ޓީމަކަށް ކުޅެފަ އެވެ. އޭނާ މިހާރު ކުޅެމުން އަންނަ ރޯމާ އަށް ބަދަލުވީ 2019 ވަނަ އަހަރު އެވެ. ރޯމާ އިން އޭނާގެ ސޮއި ހޯދީ 30 މިލިއަން ޑޮލަރުގެ ފީއެއް ދައްކައިފަ އެވެ.
