ގާޒާ ސިޓީ، ފަލަސްތީން (ސެޕްޓެމްބަރު 4) - ގާޒާ އާއި މިސްރާ ދެމެދު ހަދާފައިވާ ބިމުއަޑީގެ ޓަނަލެއް ވެއްޓި ފަލަސްތީނުގެ ތިން މީހުން މަރުވެއްޖެ އެވެ.
"ރަފާހްގެ ދެކުނުން ބޯޑަރު ކައިރިން ބިމުއަޑިން ތިން މީހުންގެ ހަށިގަނޑު ނެގީ ސިވިލް ޑިފެންސް ޓީމުތަކުން،" ގާޒާގެ އިންޓީރިއާ މިނިސްޓްރީގެ ތަރުޖަމާނު އިޔާދް އަލް ބޮޒޮމް ނެރުނު ބަޔާނެއްގައި ވިދާޅުވި އެވެ.
ގާޒާ ކޮންޓްރޯލް ކުރާ ހަމާސް ޖަމާއަތާ ގާތް މީހަކު އޭއެފްޕީ އަށް ބުނީ ބުރާސްފަތި ދުވަހު ޓަނަލުން ބަޔެއް ވެއްޓުނީ، މިސްރާ ވީ ފަޅިން އެ ތަނުގެ ތެރެއަށް ގޭސްތަކެއް ފޮނުވުމުންނެވެ.
އިޒްރޭލުން ބުނާ ގޮތުގައި ގާޒާ އާއި މިސްރާ ގުޅޭ ބޯޑަރު ކައިރިން ބިމުއަޑީގެ ޓަނަލެއް ހަދާފައި ވަނީ ހަމާސްގެ ހަނގުރާމަވެރިން ވަގަށް ހަތިޔާރު އެތެރެ ކުރުމަށެވެ.
އެކަމަކު ފަލަސްތީނުގެ ރައްޔިތުން ބުނާ ގޮތުގައި އެ ޓަނަލަކީ ދުވަހުން ދުވަހަށް ބޭނުންވާ ސަޕްލައި އެއްވެސް ދަތިކަމެއް ނެތި އެތެރެ ކުރަން އޮންނަ މަގެއް ކަމަށެވެ.
ދެހާސް ހަތް ވަނަ އަހަރުން ފެށިގެން ގާޒާގެ ބޯޑަރު ބަލަހައްޓަނީ އިޒްރޭލާއި މިސްރުންނެވެ. އެހެންކަމުން ގާޒާއަށް ވަދެ ނިކުމެ ހެދުމަކީ އުނދަގޫ ކަމެކެވެ.
މިސްރުން ވަނީ 2013 ވަނަ އަހަރުން ފެށިގެން ގާޒާއަށް ދާން ބިމުއަޑިން ހަދާފައިވާ ގިނަ އެތައް ސަތޭކަ ޓަނަލެއް ހަލާކުކޮށްފަ އެވެ. އިޒްރޭލުން ވެސް ވަނީ ގާޒާ އިން އިޒްރޭލުގެ ސަރަހައްދަށް ދާން ބިމުއަޑިން ހަދާފައި ޓަނަލްތައް ހަލާކުކޮށްފަ އެވެ.
މިދިޔަ މޭ މަހު އިޒްރޭލާއި ހަމާސްއާ ދެމެދު ކުރި 11 ދުވަހުގެ ހަނގުރާމައިގައި އިޒްރޭލުން ބުނީ ހަމަލާތައް ޓާގެޓު ކުރަނީ ބިމުއަޑީގެ ޓަނަލް ނެޓްވޯކަށް ކަމަށެވެ.
