މެޑްރިޑް (ސެޕްޓެމްބަރު 3) - ޕީއެސްޖީގެ ފްރާންސް ފޯވާޑް ކީލިއަން އެމްބާޕޭ ކުރިއަށް އޮތްތަނުގައި ސްޕެއިންގެ ގަދަބާރު ރެއާލް މެޑްރިޑަށް ކުޅޭނެ ކަމަށް އެ ޓީމުގެ ކެޕްޓަން އަދި ފްރާންސްގެ ފޯވާޑް ކަރިމް ބެންޒެމާ ބުނެފި އެވެ.
މި ފަހަރުގެ ޔޫރޯގައި ވާދަކުރި ފްރާންސް ސްކޮޑުން ބެންޒެމާ ފުރުސަތު ހޯދީ ހަ ވަރަަކަށް އަަހަރު ފަހުންނެވެ. ޔޫރޯގައި ބެންޒެމާ އާއި އެމްބާޕޭގެ ކޮމްބިނޭޝަން ފެނިގެންގޮސްފައިވެ އެވެ. ބެންޒެމާ ވަނީ ދާދި ފަހުން ރެއާލްގެ ކޮންޓްރެކްޓް އާ ކޮށްފަ އެވެ. ޕީއެސްޖީއާ އެކު އެމްބާޕޭ ހަދާފައިވާ ކޮންޓްރެކްޓްގައި ބާކީ 10 ވަރަކަށް މަސް އޮތްއިރު، އެ ކްލަބުން ވަނީ ނިމިދިޔަ ޓްރާންސްފާ މާކެޓްގައި ރެއާލުން އެމްބާޕޭ ގަންނަން ހުށަހެޅި ތިން ބިޑް ވެސް އަނބުރާ ފޮނުވާލައިފަ އެވެ.
ރެއާލުން އެންމެ ފުރަތަމަ ކުރީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. އަދި ދެ ވަނަ އަށް ކުރީ 226 މިލިއަން ޑޮލަރުގެ (180 މިލިއަން ޔޫރޯގެ) ބިޑެކެެވެ. ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި ދެއްކީ ރެއާލުން ދެ ވަނަ އަށް ހުށަހެޅި ބިޑާ ދާދި އެއްވަރެއްގެ ފީ އެކެވެ. ޓްރާންސްފާގެ ފަހު ވަގުތު ރެއާލުން ހުށަހެޅީ ބޯނަހާ އެކު 267 މިލިއަން ޑޮލަރު (226 މިލިއަން ޔޫރޯ)ގެ ބިޑެކެވެ. މިއީ ދުނިޔޭގެ ރެކޯޑް އަގެއް ނަމަވެސް ޕީއެސްޖީން އެ ހުށަހެޅުމަށް އިޖާބަ ނުދިނެވެ.
އެމްބާޕޭއާ އެކު މި ވަގުތު ފްރާންސް ސްކޮޑުގައި ހުރި ބެންޒެމާ ބުނީ ރެއާލްގެ ޖޯޒީގައި އަދި އެމްބާޕޭ ފެންނާނެ ކަމަށެވެ.
"ދަނޑުމަތީގައި އަހަރެމެންގެ ކޮމްބިނޭޝަން ވަރަށް ރަނގަޅު. އަހަރެން ބޭނުން އޭނަ އަހަންނާ އެކު ރެއާލަށް ކުޅެން. އެއީ ދުނިޔޭގެ އެންމެ މޮޅު ކްލަބް. އަހަރެމެން ޖެހޭ އޭނަ މިހާރު ހުރި ކްލަބް (ޕީއެސްޖީ) އަށް ވެސް އިހުތިރާމްކުރަން،" ބެންޒެމާ ބުންޏެވެ.
އެކަމަކު، ޔަގީންކަމާ އެކު އަހަންނަށް ބުނަން ކެރޭ އެމްބާޕޭ ރެއާލަށް ކުޅޭނެ -- އެމްބާޕޭ
ސްޕެއިންގެ މީޑިއާ ރިޕޯޓްތައް ބުނާގޮތުގައި އެމްބާޕޭ މިހާރު ވަނީ އަންނަ އަހަރު ހިލޭ ޓްރާންސްފާއެއްގައި ރެއާލަށް ބަދަލުވާން ނިންމައިފަ އެވެ. އެމްބާޕޭ ބޭނުންނަމަ ޖުލައި މަހު ރެއާލާ ގުޅޭ ގޮތަށް ޖެނުއަރީ މަހުގައި ޕްރީ ކޮންޓްރެކްޓެއްގައި ސޮއިކުރެވޭނެ އެވެ.
އެކަމަކު، ޕީއެސްޖީން ކުރިއަށް އޮތް ސީޒަނުގެ ތެރޭގައި އެމްބާޕޭ ލައްވައި އާ އެއްބަސްވުމެއް ހަދަން ކުރެވެން ހުރި ހުރިހާ ކަމެއް ކުރާނެ ކަމަށް ޕީއެސްޖީގެ ސްޕޯޓިން ޑިރެކްޓަރު ލިއޮނާޑޯ ވަނީ ބުނެފަ އެވެ. ޕީއެސްޖީން މި ފަހަރު އެމްބާޕޭ ނުވިއްކި އެންމެ ބޮޑު ސަބަބަކީ އެ ކްލަބްގެ ރައީސް ނާސިރް އެލް ހެއްލާފީ އެ ގޮތަށް ނިންމުމުންނެވެ.
