އުމުރުން އަށް އަހަރުގެ ހުނަރުވެރި ލަވަކިޔުންތެރިޔާ ލައިބާ އަހުމަދު މަހްލޫފު (އެލީ) މިވަނީ އަނެއްކާ ވެސް އާ ލަވައެއްގެ ކަވާ އެއް ނެރެފަ އެވެ. މިފަހަރު އޭނާ ކިޔާފައިވަނީ އޮސްޓްރޭލިއާގެ މަޝްހޫރު ލަވަކިޔުންތެރިޔާ ޓޯންސް އެންޑް އައި ކިޔާފައިވާ "ޑާންސް މަންކީ" ގެ ކަވާ އެކެވެ. މިއީ އެލީ ނެރުނު އޭނާގެ ފުރަތަމަ އިނގިރޭސި ކަވާ އެވެ.
އަބްދުލް ބާސިތު (ބާޗީ) ގެ މިއުޒިކަކަށް އެލީގެ ހިތްގައިމު އަޑުން ކިޔާފައިވާ މި ކަވާ 31 އޮގަސްޓްގައި ޔޫޓިއުބްގައި ރިލީޒްކޮށްފައިވާއިރު 26 ހާހަށްވުރެ ގިނަ ވިއުސް ވަނީ މިިހާތަނަށް ލިބިފަ އެވެ. މި ލަވައާ ބެހޭގޮތުން އެލީގެ ބައްޕަ އަދި ޔޫތު މިނިސްޓަރު އަހުމަދު މަހްލޫފު ވިދާޅުވީ މިއީ އެލީ ތައްޔާރުވަމުންދާ ބޭރުގެ މުބާރާތެއްގެ އޮޑިޝަނަށް ތައްޔާރުވުމުގެ ގޮތުން ކުރެވުނު މަސައްކަތެއް ކަމުގަ އެވެ.
"މިއީ ހަމަ އަނެއްކާވެސް އެލީ އަށް އެންމެ ކަމުދާ އިނގިރޭސި ލަވަތަކުގެ ތެރޭގައި ހުރި ފޭވަރިޓް އެއް ލަވަ. ދެން ކިޔަމުންގޮސް ހިތަށް އެރީ ވެއްޖެއޭ މިހާރު އިނގިރޭސި ކަވާއެއް ހަދަން އެއީ އަދި ހެދިފައި ނެތީމަ. އަދި މިއީ އަޅުގަނޑުމެން ބޭރުގެ މުބާރާތަކަށް ދާންވެގެން އޮޑިޝަން އެއްގަ ބައިވެރިވެގެން އުޅޭތީ ކޮށްލި މަސައްކަތެއް،" މި ލަވަ އިހުތިޔާރު ކުރެވުނު ގޮތާއި ބެހޭގޮތުން މަހްލޫފު ވިދާޅުވި އެވެ.
އެލީ ބައިވެރިވުމަށް މަސައްކަތް ކުރަމުންދަނީ ކޮން މުބާރާތެއްގައި ކަން އަދި ހާމަ ކޮށްފައި ނުވިއަސް، ބައިވެރިވުމަށްޓަކައި އޮންލައިންކޮށް އޭނާ ތައްޔާރުވަމުންދާތާ ހަތަރު މަސްވަރު ވެދާނެކަމަށް މަހްލޫފު ވިދާޅުވި އެވެ. މިގޮތުން އޭނާ އަންނަނީ ބޭރު ކޯޗުންނާއި އެކީ ޓްރެއިނިންތައް ވެސް ފުރިހަމަ ކުރަމުންނެވެ.
ވަން ޝޮޓް އެންޓަޓެއިންމަންޓްގެ ހުނަރުވެރި ނެށުންތެރިންގެ ފައި ހަމަ ކުރުންތަކާއި އަދި ސްކޭޓް ކުރާ ކުދިންގެ ހަރަކާތްތަކާއި އެކު ލައިޓްސްއައުޓްގެ މި ވީޑިއޯގްރަފީއަށް ވަނީ އިތުރު ފުރިހަމަ ކަމެއް ލިބިގެން ގޮސްފަ އެވެ. ލަވައިގެ ކޮރިއޯގްރަފީ ހަދައިދިނީ މަޝްހޫރު ނެށުންތެރިޔާ އަދި ފޮޓޯގްރާފަރު ކަމުގައިވާ ޝަރަފުލް އަމީރު (ކުޑަ ރިޗާޑް) އެވެ.
ސްކޭޓް ޕާކުގެ ހިތްގައިމު މަންޒަރުތަކާއި އަދި މޫދު ކުޅިވަރުތަކުގެ ފޯރި އާއި މަޖާ ލަވައިން ފެނިގެންދާއިރު އެންމެ ހާއްސަ އެއް ކަމަކީ ޑައުންސިންޑްރޯމް ހުންނަ އެލީގެ ބޮޑުބޭބެވެސް އޭނާއާ އެކު ފެނިގެންދާ ކަމެވެ.
މީގެ ކުރިންވެސް އެލީގެ ދެ ލަވައަކާއި މަދަހައެއް ރިލީޒްކުރެވިފައިވާއިރު ބޮޑު ތަރުހީބެއް މި މަސައްކަތްތަކަށް ވަނީ ލިބިފަ އެވެ.
