ސައޮ ޕައޮލޯ، ބްރެޒިލް (ސެޕްޓެމްބަރު 2) - އިނގިރޭސިވިލާތުން ދަތުރުފަތުރު ކުރުމުގައި ސަމާލުވާން ކަނޑައަޅާފައިވާ ރެޑް ލިސްޓުގައި އޮތް ގައުމުތަކަށް ކުޅޭ ކުޅުންތެރިން ރިލީސްނުކުރަން އިނގިރޭސި ޕްރިމިއާ ލީގުގެ ކްލަބްތަކުން ނިންމި ނިންމުން ތަންފީޒުކުރުމާ އެކު ބްރެޒިލް ގައުމީ ޓީމުން އެކަމާ ވަރަށް ބޮޑަށް ހިތްހަމަނުޖެހިއްޖެ އެވެ.
ރެޑް ލިސްޓުގައި އޮތް ގައުމުތަކުގެ ތެރޭގައި ބްރެޒިލާއި ދެކުނު އެމެރިކާގެ ގިނަ ގައުމުތަކެއް ހިމެނެ އެވެ. ރެޑް ލިސްޓުގައި އޮތް ގައުމަކަށް ގޮސްފައި އެނބުރި އިންގްލެންްޑަށް އައިސް 10 ދުވަހުގެ ކަރަންޓީނު ވާން ޖެހޭނެ އެވެ. މީގެ ފުޓްބޯޅަ ކުޅުންތެރިން ވެސް އިސްތިސްނާ ނުވާތީ އެއްވެސް ޕްރިމިއާ ލީގުގެ ކްލަބަކުން ރެޑް ލިސްޓުގެ ގައުމަކަށް ކުޅުންތެރިން ފޮނުވަން ބޭނުމެއް ނުވި އެވެ. މަދު ޓީމުތަކެއް ނޫނީ އެހެން ހުރިހާ ކްލަބަކުން އަންނަނީ އެ ނިންމުން ތަންފީޒުކުރަމުންނެވެ.
ކުރިއަށް އޮތް އަށް ވަރަކަށް ދުވަހުގެ ތެރޭގައި ބްރެޒިލް ކޮލިފައިންގެ ތިން މެޗެއް ކުޅޭއިރު، ޕްރިމިއާ ލީގުގެ ކްލަބްތަކަށް ކުޅޭ ނުވަ ކުޅުންތެރިއަކަށް ބްރެޒިލް ޓީމާ ގުޅެވޭނެ ގޮޮތެއް އަދި ނެތެވެ. އެއީ ކުޅުންތެރިން ރިލީސްކުރަން ކްލަބްތަކުން ދެކޮޅު ހަދާތީ އެވެ.
އެ ކުޅުންތެރިންނަކީ ލިވަޕޫލްގެ އެލިސަން ބެކާ، ރޮބާޓޯ ފިރްމީނޯ، ފަބީނިއޯ، މެންޗެސްޓާ ސިޓީގެ ގަބްރިއެލް ޖީސޫސް އާއި އެޑަސަން މޮރާއެސް، ޗެލްސީގެ ތިއާގޯ ސިލްވާ، މެންޗެސްޓާ ޔުނައިޓެޑްގެ ފްރެޑް، އެވަޓަންގެ ރިޗާލިސަން އަދި ލީޑްސް ޔުނައިޓެޑްގެ ރަފީނިއާ އެވެ.
ކުޅުންތެރިންނާއި ކްލަބަށް ފީފާގެ އަދަބެއް؟
މިދިޔަ އަހަރު ފީފާ އިން ކަނޑައެޅި ވަގުތީ އުސޫލެއްގައިވަނީ ކޮވިޑްގެ ކަންކަން އޮތްގޮތުން އޭރުގެ ހާލަތަށް ބަަލައި ކްލަބްތަކުން ބޭނުންނުވާ ނަމަ ގައުމީ ޓީމަށް ކުޅުންތެރިން ރިލީސް ނުކުރުމުގެ އިހުތިޔާރު ދީފަ އެވެ. އެހެން ނަމަވެސް މިހާރު އެ އުސޫލަށް އަމަލުކުރުން ހުއްޓާލާން ނިންމާފައިވާއިރު، ކުރިއަށް އޮތް ގައުމީ ޓީމުތަކުގެ މެޗުތައް ކުޅެން ގައުމީ ޓީމަށް ކުޅުންތެރިން ދޫކުރަން ފީފާ އުސޫލުގެ ދަށުން ކްލަބްތަކަށް މަޖުބޫރުވާނެ އެވެ. އެކަމަކު، ކަރަންޓީނު އުސޫލު އޮތްގޮތުން ރެޑް ލިސްޓް ގައުމުތަކަށް ކުޅުންތެރިން ދޫނުކުރަން ގިނަ ކްލަބްތަކުން ވަނީ ނިންމައިފަ އެވެ.
ކުޅުންތެރިން ރިލީސްކުރަން ކްލަބްތަކުން ދެކޮޅު ހަދަމުންދާ މައްސަލައިގައި ހުރިހާ ފަރާތަކަށް އިންސާފުވެރި ހައްލެއް ހޯދަން ފީފާގެ ރައީސް ޖިއާނީ އިންފަންޓީނޯ ވަނީ ދާދި ފަހުން އިލްތިމާސް ކުރައްވައިފަ އެވެ. އިންފަންޓީނޯ އެދިވަޑައިގެންނެވީ ގައުމީ ޓީމުތަކަށް ކުޅުންތެރިން ދޫކުރުމަށެވެ. އަދި ދާދި ފަހުން ފީފާ އިން ވަނީ އެ ގޮތަށް އަމަލުނުކުރާ ކްލަބްތަކަށް ފިޔަވަޅު އަޅާނެ ކަމަށް ބުނެފަ އެވެ.
ބްރެޒިލްގެ ފުޓްބޯޅަ ފެޑެރޭޝަނުން ވަނީ ގައުމީ ޓީމަށް ކުޅުންތެރިން ދޫނުކުރާ ކްލަބްތަކުގެ ކުޅުންތެރިން ވަކި މުއްދަތަކަށް ކްލަބަށް ނުކުޅެވޭ ގޮތަށް ސަސްޕެންޑްކުރަން އެދިފަ އެވެ. އެ ގޮތުން ބްރެޒިލްގެ ހުށަހެޅުމަކީ 5-10 ދުވަހުގެ މުއްދަތަކަށް ކުޅުންތެރިން ސަސްޕެންޑްކުރާށެެވެ. އެކަމަކު، ފީފާއިން މިކަމުގައި އަޅާނެ ފިޔަވަޅެއް ރަސްމީކޮށް ނުނިންމަ އެވެ.
ދެކުނު އެމެރިކާގެ ކޮލިފައިންގައި މި ވަގުތު ފުރިހަމަ ރެކޯޑަކާ އެކީ އޮތް ބްރެޒިލް މިރޭ ޗިލީއާ ބައްދަލުކުރާނެ އެވެ. އޭގެ ފަހުން އާދިއްތަ ދުވަހުގެރޭ އާޖެންޓީނާއާ ކުޅުމަށް ފަހު އަންނަ ބުރާސްފަތި ދުވަހު ކުޅޭނީ ޕެރޫއާ އެވެ.
