ޕެރިސް (ސެޕްޓެމްބަރު 1) - ޓްރާންސްފާ މާކެޓް ބަންދުވުމުގެ ކުރިން ރެއާލް މެޑްރިޑުން ޕީއެސްޖީގެ ކީލިއަން އެމްބާޕޭ ގަންނަން ހުށަހެޅި ރެކޯޑް ބިޑަށް ވެސް އެ ކްލަބުން ފުރަގަސްދީފި އެވެ.
އަންނަ އަހަރުގެ ޖޫން މަހުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ގަންނަން މިދިޔަ ހަފްތާއެއްހާ ދުވަހު ރެއާލުން ވަނީ ތިން ބިޑެއް ކޮށްފަ އެވެ. އެ ތިން ހުށަހެޅުމަށް ވެސް ޕީއެސްޖީން ޖަވާބެއް ނުދެ އެވެ.
ރެއާލުން އެންމެ ފުރަތަމަ ކުރީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. އަދި ދެ ވަނަ އަށް ކުރީ 226 މިލިއަން ޑޮލަރުގެ (180 މިލިއަން ޔޫރޯގެ) ބިޑެކެެވެ. ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި ދެއްކީ ރެއާލުން އެންމެ ފަހުން ހުށަހެޅި ބިޑާ ދާދި އެއް އަދަދެކެވެ.
ފްރާންސާއި ސްޕެއިން ނޫސްތަކުން ރިޕޯޓްކުރި ގޮތުގައި ޕީއެސްޖީ އަށް ރޭ ރެއާލުން ހުށަހެޅީ ބޯނަހާ އެކު 267 މިލިއަން ޑޮލަރު (226 މިލިއަން ޔޫރޯ)ގެ ބިޑެކެވެ. އެ ޓްރާންސްފާ ފުރިހަމަކުރި ނަމަ އެމްބާޕޭ ވެގެންދާނީ ދުނިޔޭގެ އެންމެ އަގުބޮޑު ކުޅުންތެރިޔާ އަށެވެ. މި ވަގުތަށް ދުނިޔޭގެ އެންމެ އަގުބޮޑު ޓްރާންސްފާ އަކީ 2017 ވަނަ އަހަރު ޕީއެސްޖީން ބާސެލޯނާގެ ނޭމާ ގަތް ޓްރާންސްފާ އެވެ. ނޭމާ އެ ފަހަރު ބާސެލޯނާ ދޫކޮށް ޕީއެސްޖީ އަށް ބަދަލުވީ 262 މިލިއަން ޑޮލަރު (222 މިލިއަން ޔޫރޯ) އަށެވެ.
ރިޕޯޓްތައް ބުނާގޮތުން އެމްބާޕޭ މަޑުކުރުުވުމަކީ ޕީއެެސްޖީގެ ރައީސް ނާސިރު އެލް ހެއްލާފީގެ ނިންމުމެކެވެ.
މި ފަހަރުގެ ޓްރާންސްފާ މާކެޓް ނިމުނުއިރު މިދިޔައީ އެމްބާޕޭގެ މުސްތަގުބަލާ ބެހޭގޮތުން މުހިއްމު ނިންމުންތަކެއް ނިންމުން ކޮޅެއްގައި ނުޖެހި އެވެ. މިކަމުގައި ޕީއެސްޖީ އަށް އޮތް ގެއްލުމަކީ އެމްބާޕޭ ދެން ކްލަބް ބަދަލުކުރާއިރު، ޕީއެސްޖީން ބޮޑު އަގެއް ހޯދަން ކުރާ މަސައްކަތުގައި އުނދަގޫވުމެވެ. އެއީ އެމްބާޕޭ ޕީއެސްޖީއާ އެކު އާ ކޮންޓްރެކްޓެއްގައި ސޮއިނުކޮށް އޮއްވައި ޖެނުއަރީ މަސް ތެރޭ އެމްބާޕޭ ބޭނުން ޓީމަކާ އެކު ޕްރީ އެގްރީމެންޓެއްގައި ސޮއިކުރެވޭނެތީ އެވެ. އެއީ އަންނަ އަހަރު ޖުލައި މަހު އެ ޓީމަކާ ގުޅޭ ގޮތަށެވެ.
ސްޕެއިންގެ މީޑިއާ ރިޕޯޓްތައް ބުނާގޮތުގައި އެމްބާޕޭ މިހާރު ވަނީ އަންނަ އަހަރު ހިލޭ ޓްރާންސްފާއެއްގައި ރެއާލަށް ބަދަލުވާން ނިންމައިފަ އެވެ.
ރެއާލުން ވަނީ ދެ އަހަރެއްހާ ދުވަސް ތެރޭ މި ފަހަރުގެ ޓްރާންސްފާ މާކެޓްގައި ހަރަދެއް ކޮށްގެން ރޭ ކުޅުންތެރިއަކު ގަނެފަ އެވެ. އެއީ 30 މިލިއަން ޑޮލަރު ދީފައި ރެއާލުން ގަތް ރެެނެސްގެ މިޑްފީލްޑަރު އެޑޮއާޑް ކަމަވިންގާ އެވެ. ރެއާލުން ދެން މި ފަހަރުގެ ޓްރާންސްފާ މާކެޓްގައި ގެނައީ ހިލޭ ޓްރާންސްފާއެއްގައި ބަޔާން މިއުނިކުން އޮސްޓްރިއާގެ ފުލްބެކް ޖޯޑީ އަލްބާ އެވެ.
