މަންމައާއެކު ދުވާރު މަތިން ހިނގާފައި ދަނިކޮށް މަތިން ވެއްޓުނު ސިމެންތި ބަސްތާއަކުން ޖެހި މަރުވި އުމުރުން 8 އަހަރުގެ ރައުޝަން ޖިއާންގެ އާއިލާއަށް 4.5 މިލިއަން ރުފިޔާގެ ބަދަލެއް ޑަބްލިއު ކޮންސްޓްރަކްޝަންގެ ފަރާތުން ނަގައިދިނުމަށް ސިވިލް ކޯޓުން އިއްޔެ ހުކުމްކޮށްފި އެވެ.
ބަންގްލަދޭޝަށް ނިސްބަތްވާ ޖިއާންގެ މަންމަ ޑރ. ފަރްޒާނާ ހުސެއިން އާއި ބައްޕަ ކަމާލުއްދީން ޖާވިދުއަށް އެ ފައިސާ ދެ މަސް ދުވަހުގެ ތެރޭގައި ދެއްކުމަށް ޑަބްލިއު ކޮންސްޓްރަކްޝަންގެ މައްޗަށް ފަނޑިޔާރު އަލީ ނަސީރު ކުރި ހުކުމުގައި އަމުރުކޮށްފައިވެ އެވެ.
ޖިއާންގެ އާއިލާއަށް ބަދަލު ނަގައިދީފައި ވަނީ ތިން ކަމެއްގެ މައްޗަށް ބިނާކޮށެވެ. އެއީ ޖިއާން މަރުވުމުގެ ސަބަބުން ދަރިފުޅުގެ ލޯތްބާއި ދެމީހުންގެ ތެރޭގައި އޮންނާނެ ގުޅުން ނެތިދިޔުމުން ލިބުނު ގެއްލުމަށް ނަގައިދިން 1،028،000ރ. އާއި އާއިލާއަށް ލިބުނު ތަދާއި ވޭނުގެ ބަދަލުގެ ގޮތުގައި ނަގައިދިން 2،196،361ރ. އާއި ޖިއާންގެ ދުނިޔޭގައި ހުރި ނަމަ މަސައްކަތްކޮށްގެން ލިބޭނެ ކަމަށް ލަފާ ކުރާ 1،290،361ރ. އާއި ފަރްޒާނާގެ ބޭސް ފަރުވާއަށް ހަރަދުވި 42،318ރ. އެވެ.
ޖިއާން: މަރުވީ ޑަބްލިއު ކޮންސްޓްރަކްޝަން ކުންފުނީގެ މުވައްޒަފުންގެ އިހުމާލުން --
ޑަބްލިއު ކޮންސްޓްރަކްޝަންގެ ފަރާތުން އެ ބަދަލު ނަގައިދީފައި މީހަކު ނުވަތަ ބަޔަކު ކުރާ ގާނޫނާ ހިލާފު އަމަލަކުން ލިބޭ ގެއްލުމުގެ ބަދަލު ތިން ވަނަ ޕާޓީއެއްގެ ފަރާތުން ނަގައިދޭ ވައިކޭރިއަސް ލަޔަބިލިޓީގެ އުސޫލުގެ ދަށުންނެވެ. އެ މައްސަލައިގައި އެ ކުންފުނީގެ ތިން މުވައްޒަފަކު އިހުމާލުވާ ކަމަށް ކަނޑައަޅައި ޖިނާއީ ކޯޓުން ކުރިން ހުކުމްކޮށްފައި އޮތުމުން އެކަމުގައި ޑަބްލިއު ކޮންސްޓްރަކްޝަން ވެސް ޒިންމާ އުފުލަންޖެހޭނެ ކަމަށް ގާޒީ އަލީ ނަސީރު ކަނޑައެޅުއްވި އެވެ.
"ދައުވާ ކުރާ ފަރާތްތަކުގެ ދަރިފުޅު ނިޔާވުމާ ގުޅިގެން ދައުވާ ލިބޭ ފަރާތްތަކަށް ލިބިފައިވާ ގެއްލުމުގެ މަދަނީ މަސްއޫލިއްޔަތު ވައިކޭރިއަސް ލަޔަބިލިޓީގެ ދަށުން، އެ އަމަލުތައް ކުރި ފަރާތްތައް ތަބާވާ އިދާރާގެ ހައިސިއްޔަތުން ޑަބްލިއު ކޮންސްޓްރަކްޝަންގެ ފަރާތުން އުފުލަންޖެހޭ ކަމަށް މަދަނީ މިންގަނޑުތަކުން ޝަރީއަތަށް ސާބިތުވެއްޖެ،" ގާޒީ އަލީ ނަސީރު އިއްވި ހުކުމުގައިވެ އެވެ.
ޖިއާންގެ އާއިލާގެ ފަރާތުން ހަގީގަތުގައި ނަގައިދޭން އެދުނީ ޖުމްލަ 17 މިލިއަން ރުފިޔާ އެވެ. ނަމަވެސް ކޯޓުން ކަނޑައެޅީ އެ ހުރިހާ ފައިސާތަކެއް ނަގައިދެވެން ނެތް ކަމަށެވެ.
ޖިއާން މަރުވީ ޑިސެމްބަރު 16، 2018 ގައި އެއިރު ހަދަމުންދިޔަ މ. ނަލަހިޔާ މަންޒިލް ކައިރިން ހިނގާފައި ދަނިކޮށް ބަސްތާއެއް ވެއްޓިގެނެވެ. އެ މަސައްކަތް ކުރަމުންދިޔައީ ޕޭވްމަންޓުގެ ބައެއް ނަގައި، ގަވާއިދާ އެއްގޮތަށް ޖަހަންޖެހޭ ބޯޑުތައް ނުލަ އެވެ.
