ކުރިމިނަލް ކޯޓުގެ ގާޒީންތަކެއްގެ އޯޑިއޯތަކެއް ލީކްވެ، އޭގައި ކަންބޮޑުވާ ފަދަ ވާހަކަތަކެއް ހުރުމުން އެކަން ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަމުން އަންނައިރު، އެ އޯޑިއޯތައް ތަހުލީލުކުރުމަށް އެކަމުގައި ތުހުމަތުކުރެވޭ ގާޒީންގެ އޯޑިއޯ ސާމްޕަލް ނަގައިފި އެވެ.
ސޯޝަލް މީޑިއާގައި ލީކްވެފައިވަނީ ކުރީގެ ރައީސް އަބްދުﷲ ޔާމީންގެ މައްޗަށް ކުރިމިނަލް ކޯޓުން ފަސް އަހަރުގެ ޖަލު ހުކުމެއް އިއްވި ބެންޗުގައި ހިމެނިވަޑައިގަންނަވާ ގާޒީންތަކެއް ދެއްކެވި ވާހަކަތަކެކެވެ.
އެ ބެންޗުގައި ތިއްބެވީ އޭރު ކުރިމިނަލް ކޯޓުގެ އިސް ގާޒީ އަދި މިހާރު ސުޕްރީމް ކޯޓުގެ ފަނޑިޔާރު އަލީ ރަޝީދާއި ކުރިމިނަލް ކޯޓުގެ މިހާރުގެ އިސްގާޒީ އަހުމަދު ޝަކީލާއި ގާޒީ އަހުމަދު ސަމީރާއި ގާޒީ ހުސެއިން ފާއިޒު ރަޝީދާއި އަދި ގާޒީ އަލީ އާދަމެވެ.
ލީކްވީ، ގާޒީ ފާއިޒާއި އަލީ އާދަމް އަދި ސަމީރު ކަމަށް ބެލެވޭ ބައެއްގެ އަޑު އިވޭ އޯޑިއޯތަކެވެ.
އެ ބޭފުޅުން ވާހަކަ ދައްކަވާފައިވަނީ ޔާމީނަށް އިއްވި ހުކުމާ ގުޅޭ ގޮތުންނެވެ. އެގޮތުން، ގާޒީ ފާއިޒު ކަމަށް ބެލެވޭ މީހާ ވަނީ އެ ހުކުމާ ގުޅިގެން އެކި ކަހަލަ ނުފޫޒުތައް އޮތް ކަމަށް ދޭހަވާ ފަދައިން ވާހަކަ ދައްކަވާފަ އެވެ.
އެ އޯޑިއޯތަކާ ގުޅިގެން ޖޭއެސްސީން ތަހުގީގެއް ފަށައި، ތުހުމަތުވާ ގާޒީންނާ ސުވާލުކޮށްފައިވާއިރު، އެކަމުގެ ތުހުމަތުވާ ގާޒީންވަނީ އެވާހަކަތައް ދޮގުކޮށްފަ އެވެ.
އެކަމާ ގުޅިގެން ޖޭއެސްސީން މިރޭ ނެރުނު ބަޔާނެއްގައި ބުނީ އެ ތަހުގީގު އިތުރަށް ކުރިއަށް ގެންދިއުމަށްޓަކައި، އެ އޯޑިއޯތައް ތަހުލީލު ކޮށްދިނުމަށް ފުލުހުންގެ ކިބައިން އެދިފައިވާ ކަމަށެވެ.
"...ކޮމިޝަނުގެ ފަރާތުން އެދުމާ ގުޅިގެން، އޯޑިއޯތަކުގައި އެ ފަނޑިޔާރުންކަމަށް ބުނާ ފަނޑިޔާރުންގެ ރުހުމާއެކު މިއަދު އޯޑިއޯ ސާމްޕަލް ޕޮލިހުންނަށް ފަނޑިޔާރުން ވަނީ ދެއްވާފައި،" ޖޭއެސްސީން ބުންޏެވެ.
އެ އޯޑިއޯތައް ލީކުވުމާއެކު އިދިކޮޅުން ދަނީ ކަންބޮޑުވުންފާޅުކޮށް ސަރުކާރަށް ބޮޑެތި ފާޑުކިޔުންތައް އަމާޒުކުރަމުންނެވެ.
ސުޕްރީމް ކޯޓުން އިސްވެ ޖުޑީޝަލް ތަހުގީގެއް ހިންގަން ޔާމީންގެ ވަކީލުން ގޮވާލާފައިވާއިރު، މަޖިލީހުގައި އިދިކޮޅަށް ނިސްބަތްވާ މެމްބަރުން ވަނީ އެ މައްސަލައިގައި ރައީސް އިބްރާހިމް މުހައްމަދު ސޯލިހުގެ ޗީފް އޮފް ސްޓާފް އަލީ ޒާހިރާ ބައްދަލުކުރައްވައިފަ އެވެ.
އެ ބައްދަލުވުމުގައި އަލީ ޒާހިރު ވަނީ ފަނޑިޔާރުންނަށް ނުފޫޒު ފޯރުވާކަމުގެ ތުހުމަތުތައް ދޮގު ކުރައްވައި، އޯޑިއޯތަކުގެ މައްސަލަ ތަހުގީގުކޮށްދިނުމަށް ފުލުހުންގެ އިތުރުން ޖުޑީޝަލް އެޑްމިނިސްޓްރޭޝަންގައި އެދިވަޑައިގެންފައިވާކަމުގެ ޔަގީންކަން ދެއްވައިފަ އެވެ.
އެ އޯޑިއޯތައް މިނިވަންކަމާއެކު ތަހުގީގުކޮށްދިނުމަށް އެދި އިދިކޮޅުން މިއަދު ރައްޔިތުންގެ މަޖިލީހަށް މައްސަލައެއް ވެސް ހުށަހެޅި އެވެ.
ނަމަވެސް، ސަރުކާރުގެ ކޮންޓްރޯލް އޮންނަ މަޖިލީހުން ވަނީ އެ މައްސަލަ ބަލައިނުގަނެ، ބާރުކޮށްލައިފަ އެވެ.
އެއާއެކު، އެ މައްސަލަ ހުށަހެޅުއްވި މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ އެ މައްސަލަ މަޖިލީހުގެ ކަމާގުޅޭ ތިން ކޮމިޓީއަކަށް މިއަދު ހުށަހަޅުއްވައިފަ އެވެ.
