ޕެރިސް (އޮގަސްޓް 31) - ސްޕެއިނުގެ ގަދަބާރު ރެއާލް މެޑްރިޑުން ފްރާންސް ތަރި ކީލިއަން އެމްބާޕޭ ގަންނަން ކުރާ މަސައްކަތުގައި އޭނާ މިހާރު ކުޅެމުން އަންނަ ޕީއެސްޖީން އެއްބާރުލުމެއް ނުދޭތީ އެ ޓްރާންސްފާގެ ކަންތައްތައް މަޑުޖެހިއްޖެ އެވެ.
އަންނަ އަހަރުގެ ޖޫން މަހުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ލައްވައި އާ އެއްބަސްވުމެއްގައި ސޮއިކުރަން އެ ކްލަބުން މިހާތަނަށް ކުރި އެއްވެސް މަސައްކަތެއް ކާމިޔާބުނުވި އެވެ. އެމްބާޕޭ ގަންނަން ރެއާލުން ކުރި ދެ ބިޑް ވެސް ޕީއެސްޖީން ވަނީ އަނބުރާ ފޮނުވާލައިފަ އެވެ.
ރެއާލުން އެންމެ ފުރަތަމަ ކުރީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. އަދި ފަހުން ކުރީ 226 މިލިއަން ޑޮލަރުގެ (180 މިލިއަން ޔޫރޯގެ) ބިޑެކެެވެ. ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި ދެއްކީ ރެއާލުން އެންމެ ފަހުން ހުށަހެޅި ބިޑާ ދާދި އެއް އަދަދެކެވެ.
އެމްބާޕޭ ޕީއެސްޖީއާ އެކު ހަދާފައި އޮތް ކޮންޓްރެކްޓް ގާތްގަނޑަކަށް 10 މަސް ދުވަހުގެ ތެރޭގައި ހަމަވާއިރު، މިއަދުގެ ނިޔަލަށް އެމްބާޕޭގެ ޓްރާންސްގެ ކަންކަން ނުނިމިއްޖެނަމަ އޭނާ ކްލަބް ބަދަލުކުރާއިރު ޕީއެސްޖީން ބޮޑު އަގެއް ހޯދަން ކުރާ މަސައްކަތުގައި ބޮޑު ގޮންޖެހުމަކާ ކުރިމަތިވާނެ އެވެ. އެއީ އެމްބާޕޭ ޕީއެސްޖީއާ އެކު އާ ކޮންޓްރެކްޓެއްގައި ސޮއިނުކޮށް އޮއްވައި ޖެނުއަރީ މަސް ތެރޭ އެމްބާޕޭ ބޭނުން ޓީމަކާ އެކު ޕްރީ އެގްރީމެންޓެއްގައި ސޮއިކުރެވޭނެ އެވެ. އެއީ އަންނަ އަހަރު ޖުލައި މަހު އެ ޓީމަކާ ގުޅޭ ގޮތަށެވެ.
ފްރާންސްގެ ލަ ޕެރީސިއަން ނޫހުން ރިޕޯޓްކޮށްފައިވާ ގޮތުގައި ދާދިފަހުން ޕީއެސްޖީގެ ރައީސް ނާސިރު އަލް ހެއްލާފީ އާއި ސްޕޯޓިން ޑިރެކްޓަރު ލިއޮނާޑޯއާ އެކު އެމްބާޕޭ ބޭއްވި ބައްދަލުވުމުގައި އޭނާ ވަނީ ކްލަބް ދޫކޮށްލަން ބޭނުންވާ ވާހަކަ އަންގައިފަ އެވެ. އަދި މި ފަހަރު އޭނާ ވިއްކައިނުލައިފިނަމަ އަންނަ އަހަރު ކްލަބް ދޫކޮށްލާނީ ހިލޭ ޓްރާންސްފާއެއްގައި ކަމަށް އެމްބާޕޭ ވަނީ ޕީއެސްޖީ އަށް އަންގައިފަ އެވެ.
ސްޕެއިންގެ މެޑްރިޑަށް ނޫން ސަރަހައްދުތަކަށް ނިސްބަތްވާ ނޫސްތަކުން ރިޕޯޓްކުރާގޮތުގައި އެމްބާޕޭ ހޯދުމުގެ މަސައްކަތް މި ފަހަރުގެ ޓްރާންސްފާ މާކެޓްގައި ޕީއެސްޖީން ވަނީ ރޭ ހުއްޓާލައިފަ އެެވެ. އެކަމަކު، ސްޕެއިންގެ މެޑްރިޑްގެ ހަބަރުތަކަށް ހާއްސަ މީޑިއާ ތަކުން ރިޕޯޓްކުރާގޮތުގައި އެމްބާޕޭ ހޯދަން ރެއާލުން ކުރާ މަސައްކަތް ޓްރާންސްފާ މާކެޓްގެ އެންމެ ފަހު ވަގުތާ ހަމައަށް ކުރިއަށްދާނެ އެވެ.
އެމްބާޕޭގެ ޓްރާންސްފާގައި އަދިވެސް ގޮތެއް ނުނިމުނު ކަމުގައި ވިޔަސް ރެއާލުން ވަނީ ފްރާންސްގެ ރެނެސް އަށް ކުޅޭ ޒުވާން މިޑްފީލްޑަރު އެޑުއާޑޯ ކަމަވިންގާގެ ސޮއި ހޯދަން އެއްބަސްވުމަކަށް އައިސްފަ އެވެ. ރެއާލުން ކަމަވިންގާ ގަންނަން ރެނެސް އަށް 35 މިލިއަން ޑޮލަރު ދައްކާނެ ކަމަށް ރިޕޯޓްތައް ބުނެ އެވެ. ކަމަވިންގާގެ ސޮއި ހޯދަން މެންޗެސްޓާ ޔުނައިޓެޑާއި ޕީއެސްޖީން މަސައްކަތްކުރި އެެވެ.
