ހުޅުމާލޭގައި މީހުން ދިރިއުޅޭ ފްލެޓެއްގައި މިރޭ ރޯވެ، އެއް ކޮޓަރި ބޭނުން ނުކުރެވޭ ވަރަށް ހަލާކުވެ، 13 މީހަކު ވަގުތީ ހިޔާތަކަށް ބަދަލުކޮށްފި އެވެ.
އަލިފާން ރޯވީ މިރޭ 19:17 ހާއިރު ހުޅުމާލޭ ޗައިނާ ޓައުން ސަރަހައްދުގައި ހުންނަ 147 ވަނަ ނަންބަރު ފްލެޓުގަ ދެ ވަނަ ފަންގިފިލާގަ ހުރި އެޕާޓްމަންޓެއްގަ އެވެ. އެ އެޕާޓްމަންޓުގައި އަށް މީހުން ދިރިއުޅެ އެވެ.
އެ ހާދިސާގައި އެއްވެސް މީހަކަށް ގެއްލުންވެފައެއް ނުވެ އެވެ. އެކަމަކު އަލިފާން ރޯވުމުގެ ސަބަބުން ލިބުނު ޝޮކަށް ފަރުވާ ހޯދުމަށް އެކަކު ހޮސްޕިޓަލަށް ގެންގޮސްފައިވެ އެވެ.
މި ނޫހާ ވާހަކަ ދައްކަމުން އަލިފާން ރޯވި އެޕާޓްމަންޓުގައި ދިރިއުޅެމުންދިޔަ މީހަކު ބުނީ ރޯވީ ތިން ކޮޓަރީގެ އެޕާންމަންޓުގެ އެއް ކޮޓަރީގައި ކަމަށެެވެ. އަދި އެ ކޮޓަރި ބޭނުން ނުކުރެވޭ ވަރަށް ހަލާކުވެފައި ހުރިއިރު އޭނާއަށް އަށް ބެލެވެނީ ހާދިސާ ހިނގީ ކަރަންޓު ޝޯޓެއްވެގެން ކަމަށް ވެސް ވާހަކަ ދެއްކި މީހާ ބުންޏެވެ.
ނެޝަނަލް ޑިޒާސްޓާ މެނޭޖްމަންޓް ސެންޓަރުން ބުނީ އަލިފާން ރޯވި އެޕާޓްމަންޓާއި ދުމުގެ ސަބަބުން އަސަރު ކުރި މީހުންނާއެކު ޖުމްލަ ދެ އާއިލާއެއްގެ 13 މީހަކު ވަގުތީ ހިޔާތަކަށް ބަދަލުކޮށްފައިވާ ކަމަށެވެ.
އެމްއެންޑީއެފުން ބުނީ ރޯވި އަލިފާންގަނޑު ގާތްގަނޑަކަށް ބައިގަޑިއިރެއްހާއިރު ތެރޭގައި ކޮންޓްރޯލްކޮށްފައިވާ ކަމަށެވެ. ނަމަވެސް އަލިފާންގަނޑު ފެތުރި ފްލެޓުގެ ތިން ވަނަ ފަންފިލާއަށް ވެސް ގެއްލުން ލިބިފައިވާ ކަމަށް އެމްއެންޑީއެފުން ބުންޏެވެ.
މާލޭ ސިޓީ ކައުންސިލްގެ ހުޅުމާލޭ ދާއިރާގެ މެމްބަރު އިބްރާހިމް ސުޖާއު ވިދާޅުވީ އަލިފާންގަނޑު އަވަސްކަމާއެކު ކޮންޓްރޯލް ކުރެވި، ގެއްލުން ކުޑަކުރެވުނީ ސިފައިން ކުރި މަސައްކަތުން ކަމަށެވެ.
