އުމުރުން 18 އަހަރު ވުމުގެ ކުރިން އެއްގަމު ދަތުރުފަތުރުގެ ގާނޫނާ ހިލާފުވުމުގެ އިތުރުން ލައިސެންސް ނެތި އެއްގަމު އުޅަނދު ދުއްވައިގެން ޖޫރިމަނާކޮށްފައިވާ ފަރާތްތަކަށް ލުއި ހޯދައިދިނުމަށް ގަވައިދު އިސްލާހުކުރަން ރައްޔިތުންގެ މަޖިލީހުން ކަމާބެހޭ ފަރާތްތަކުގެ ކިބައިން މިއަދު އެދިއްޖެ އެވެ.
ލައިސަންސް ނުނަގައި އެއްގަމު އުޅަނދުފަހަރު ދުއްވުމުގެ ސަބަބުން ޖޫރިމަނާ ކޮށްފައިވާ ފަރާތްތަކަށް ލުއި ހޯދައިދިނުމަށް އެދި މަޖިލީހަށް މައްސަލައެއް ހުށަހެޅުއްވީ ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފެވެ.
އެ މައްސަލަ ދިރާސާކުރުމަށްފަހު ގަވައިދު ކޮމިޓީގެ ރިޕޯޓު އެކުލަވާލުމުގައި ކަމާބެހޭ އިދާރާތަކާ މަޝްވަރާކޮށްފައިވާއިރު، ޖޫރިމަނާ ދެއްކުމުގެ ކުރިން ލައިސެންސް ނެގުމަށް ހުރަސްއެޅުމުގެ އިތުރުން، އެހެން ހިދުމަތްތައް ހޯދަން ވެސް ބޮޑެތި ދަތިތައް ކުރިމަތިވަމުންދާކަން އޭނާ ފާހަގަކުރެއްވި އެވެ.
ކޮމިޓީ ރިޕޯޓަށް ބަލާއިރު، ލައިސެންސް ނެތި ދުއްވައިގެން ޖޫރިމަނާކޮށްފައިވާ ކުދިންގެ އަދަދު އަހަރުން އަހަރަށް އަންނަނީ އިތުރުވަމުންނެވެ.
އެގޮތުން، 2018 ވަނަ އަހަރު 41 ކުދިން، 2019 ވަނަ އަހަރު 98 ކުދިން އަދި މިދިޔަ 232 ކުދިން ޖޫރިމަނާކޮށްފައިވާކަން ފުލުހުންގެ ތަފާސްހިސާބުތަކާ ހަވާލާދީ އެ ރިޕޯޓުގައި ބުނެފައި ވެ އެވެ.
އެކަން ހައްލުކުރަން ކޮމިޓީގެ ފަރާތުން ހުށަހަޅާފައިވަނީ ޖޫރިމަނާގެ ބަދަލުގައި ކޮމިޔުނިޓީ ސާވިސް ދިނުމަށް އަދަބު ބަދަލުކުރުމެވެ.
އެކަމަށްޓަކައި ދައުލަތުގެ ގިނަ ކުންފުނިތަކާ ކޮމިޓީން ބައްދަލުކޮށްފައިވާއިރު، އެފަދަ ޕްރޮގްރާމަކަށް އެއްބާރުލުންދޭނެ ކަމަށް އެ ކުންފުނިތަކުން ކޮމިޓީގައި ބުނެފައި ވެ އެވެ.
އެއާއެކު ކޮމިޓީން ވަނީ ގަވައިދު އިސްލާހުކުރުމަށް ފެންނަކަންކަން ރިޕޯޓުގައި ހިމަނައިފަ އެވެ.
އެގޮތުން، ކޮމިއުނިޓީ ސާވިސްގެ އުސޫލުތައް ގަވައިދުގައި ބަޔާންކުރުމާއި، އެފަދަ މަސައްކަތަކުން ޖޫރިމަނާގެ ފައިސާ އުނިކުރެވޭނެ އުސޫލު ބަޔާންކުރުމުގެ އިތުރުން ކޮމިޔުނިޓީ ސާވިސްއަށް ނުކުންނަން ޝައުގުވެރިވާ ފަރާތްތަކަށް ލައިސެންސް ނެގުމަށް އޮތް ހުރަސް ނައްތާލުމާއި ޖޫރިމަނާގެ ފައިސާ ބަހައިލައިގެން ދެއްކޭނެ އުސޫލު ގަވައިދުގައި ބަޔާންކުރުން ހިމެނެ އެވެ.
ގަވައިދުގެ ރިޕޯޓު މިއަދު މަޖިލީހުގެ ތަޅުމުން ފާސްކޮށްފައިވަނީ، އެކަމަށް ނެގުނު ވޯޓުގައި ބައިވެރިވި 49 މެމްބަރުންގެ އިއްތިފާގުންނެވެ.
