އިދިކޮޅު ކޯލިޝަން، ޕީޕީއެމް އަދި ޕީއެންސީގެ ރައްޔިތުންގެ މަޖިލީހުގެ މެންބަރުން ރައީސް އިބްރާހިމް މުހައްމަދު ސޯލިހާ ބައްދަލު ކުރެއްވުމަށް ރައީސް އޮފީހަށް ވަޑައިގެންފި އެވެ.
ދާދިދެންމެ، ރައީސް އޮފީހަށް ވަދެވަޑައިގެންނެވީ، ނައިފަރު ދާއިރާގެ މެންބަރު އަހުމަދު ޝިޔާމާއި ގުރައިދޫ ދާއިރާގެ މެންބަރު ގައްސާން މައުމޫނާއި މާވަށު ދާއިރާގެ މެންބަރު މުހައްމަދު ސައީދު އާއި ފެލިދޫ ދާއިރާގެ މެންބަރު ފަޒުލް ރަޝީދާއި ފަރެސްމާތޮޑާ ދާއިރާގެ މެންބަރު ހުސެއިން ލަތީފު މުހައްމަދެވެ.
އެ ބޭފުޅުން ރައީސް ސޯލިހާ ބައްދަލު ކުރެއްވުމަށް ރައީސް އޮފީހަށް ވަޑައިގެންފައިމިވަނީ އެ ކޯލިޝަންގެ ލީޑަރު، ރައީސް އަބްދުﷲ ޔާމީންގެ މައްޗަށް އުފުލާފައިވާ ހުކުމާމެދު ސުވާލު އުފެދޭ ފަދަ އޯޑިއޯތަކެއް އިއްޔެ ލީކްވެފައިވަނިކޮށެވެ.
ކުރިމިނަލް ކޯޓުގެ ބައެއް ގާޒީންގެ އަޑު އިވޭ އެ އޯޑިއޯ ލީކްވުމާ ގުޅިގެން އިދިކޮޅުގެ އިސް ބޭފުޅުން ގެންދަވަނީ ޔާމީން ދޫކޮށްލެއްވުމަށް ސަރުކާރަށް ގޮވާލައްވަމުންނެވެ.
ނަމަވެސް، އިދިކޮޅުގެ މަޖިލިސް މެންބަރުން ރައީސް ސޯލިހާ ބައްދަލު ކުރެއްވުމަށް ރައީސް އޮފީހަށް ވަޑައިގެންނެވީ ސީދާ ކޮން ކަމަކާ ގުޅޭ ގޮތުން މަޝްވަރާ ކުރެއްވުމަށް ކަމެއް ސާފެއް ނުވެ އެވެ.
މީގެއިތުރުން، މި ދުވަސްވަރު އެމްޑީޕީގެ ބައެއް މަޖިލިސް މެންބަރުން އިސްކޮށް ތިއްބަވައިގެން ބަރުލަމާނީ ނިޒާމު ގެނައުމަށް ގޮވާލައި، ޕެޓިޝަނެއްގައި ވެސް ގެންދަނީ ސޮއި ކުރައްވަމުންނެވެ. އެ ޕެޓިޝަންގައި ބައިވެރިނުވުމަށް އިދިކޮޅުން ވަނީ ނިންމާފަ އެވެ.
