ކާބުލް، އަފްގާނިސްތާން (އޯގަސްޓު 30) - އަފްގާނިސްތާނުގެ އަންހެނުންނަށް ޔުނިވާސިޓީގައި ކިޔެވޭނެ ކަމަށާއި ނަމަވެސް ދެ ޖިންސުގެ މީހުން އެކުވެ ކުލާސްތައް ހިންގުން މަނާ ވާނެ ކަމަށް ތާލިބާން ސަރުކާރުގެ ވަގުތީ ހަޔާ އެޑިއުކޭޝަން މިނިސްޓަރު ބުނެފި އެވެ.
ތާލިބާނުން 20 އަހަރަށް ފަހު ވެރިކަމަށް އައީ މީގެ ދެ ހަފުތާ ކުރިންނެވެ. ނަވާރަ ސަތޭކަ ނުވަދިހައިގެ އަހަރުތަކުގައި އެ މީހުން ވެރިކަން ކުރިއިރު އަންހެނުންނާއި އަންހެން ކުދިން ކިޔެވުން އޮތީ މަނާކޮށްފަ އެވެ. ނަމަވެސް މި ފަހަރު އެކަން ބަދަލުވާނެ ކަމަށް ތާލިބާނުން ކުރިން ވެސް ބުންޏެވެ.
"އިސްލާމީ ޝަރީއަތުގައި އޮންނަ ގޮތުގެ މަތިން ރައްކާތެރިކަމާއެކު އަފްގާނިސްތާނުގެ ރައްޔިތުން މަތީ ތައުލީމު ހޯދާނެ. އެއީ އަންހެނުންނާއި ފިރިހެނުން މަސްހުނިވެގެން ނުތިބޭ މާހައުލެއްގައި،" ވަގުތީ ހަޔާ އެޑިއުކޭޝަން މިނިސްޓަރު އަބްދުލް ބާގީ ހައްގާނީ އާދީއްތަ ދުވަހު ބުންޏެވެ.
އޭނާ ބުނީ ތާލިބާނުން ބޭނުންވަނީ "އިސްލާމީ، ގައުމީ އަދި ތާރީހީ އާދަކާދަތަކާ އެއް ގޮތަށް ރަނގަޅު، އިސްލާމީ ކަރިކިއުލަމެއް އުފައްދަން ކަމަށާއި އެއީ ހުޅަނގުގެ ގައުމުތަކާ ވާދަކުރެވޭ ވަރުގެ ކަރިކިއުލަމަކަށް ވާން ޖެހޭނެ" ކަމަށެވެ.
ޔުނިވާސިޓީގެ އިތުރުން ޕްރައިމެރީ އަދި ސެކަންޑަރީ ސްކޫލުތަކުގައި ވެސް އަންހެން ކުދިންނާއި ފިރިހެން ކުދިން ކިޔަވާނީ ވަކިންނެވެ. މީގެ ކުރިން ވެސް އަފްގާނިސްތާނުގައި އާއްމުކޮށް އަމަލު ކުރަމުން ގޮސްފައި ވަނީ އެގޮތަށެވެ.
ތާލިބާނުންގެ އާ ވެރިކަމުގައި އަންހެނުންނާއި އަންހެން ކުދިންގެ ހައްގުތަކަށް އިހްތިރާމް ކުރާނެ ކަމަށް ވައުދުވެފައި ވާއިރު، އެއާ އެއް ގޮތަށް އަމަލު ކުރާނެތޯ ވަނީ ސުވާލު އުފެދިފަ އެވެ. މަތީ ތައުލީމާ ގުޅޭ ގޮތުން އާދީއްތަ ދުވަހު ބޭއްވި ބައްދަލުވުމުގައި ވެސް އެއްވެސް އަންހެނަކު ބައިވެރިވެފައެއް ނުވެ އެވެ.
"ތާލިބާނުންގެ ހަޔާ އެޑިއުކޭޝަން މިނިސްޓްރީން މަޝްވަރާ ކުރީ ހަމައެކަނި ފިރިހެން ޓީޗަރުންނާއި ދަރިވަރުންނާ،" ޔުނިވާސިޓީ ލެކްޗަރާއެއްގެ ގޮތުގައި މަސައްކަތް ކުރާ އަންހެނަކު އޭއެފްޕީ އަށް ބުންޏެވެ.
ފާއިތުވި 20 އަހަރުގެ ތެރޭގައި އަފްގާނިސްތާނުގައި މަތީ ތައުލީމް ހޯދާ މިންވަރު ވަނީ ވަރަށް ބޮޑަށް އިތުރުވެފަ އެވެ. ނަމަވެސް ފަހަކަށް އައިސް ތައުލީމް ފޯރުކޮށްދޭ ތަންތަނަށް ނުރައްކާތެރި ހަމަލާތައް އަމާޒު ކުރުން ވަނީ އިތުރުވެފަ އެވެ.
ތާލިބާނުން ބުނީ އެ ހަމަލާތަކުގައި ފަހަތުގައި ވަނީ އެ މީހުން ނޫން ކަމަށެވެ. އޭގެ ތެރެއިން ބައެއް ހަމަލާތަކުގެ ޒިންމާ އުފުލާފައި ވަނީ އިސްލާމިކް ސްޓޭޓް (އައިއެސް) އިންނެވެ.
