ރާމަﷲ، ފަލަސްތީން (އޯގަސްޓު 30) - އިޒްރޭލުގެ ޑިފެންސް މިނިސްޓަރު ބެނީ ގާންޓްޒް އާއި ފަލަސްތީނުގެ ރައީސް މަހްމޫދު އައްބާސް އާދީއްތަ ދުވަހު ހުޅަނގު އައްސޭރީގައި ބައްދަލުކުރައްވައިފި އެވެ.
މިއީ މިދިޔަ ޖޫން މަހު އިޒްރޭލުގެ ބޮޑު ވަޒީރު ކަމަށް ނަފްތާލީ ބެނެޓް ވަޑައިގެންނެވި ފަހުން އިޒްރޭލާއި ފަލަސްތީނާ ދެމެދު ބޭއްވި ފުރަތަމަ ރަސްމީ ބައްދަލުވުމެވެ.
އޮފިޝަލުން ބުނީ ގާންޓްޒް ހުޅަނގު އައްސޭރީގެ ރާމަﷲ ސިޓީއަށް ވަޑައިގެންނެވީ އުމުރުން 85 އަހަރުގެ ފަލަސްތީނުގެ ރައީސްއާ އެކު ސެކިއުރިޓީ އާއި އިގްތިސާދާ ގުޅޭ މަޝްވަރާ ކުރެއްވުމަށް ކަމަށެވެ.
ފާއިތުވި ހަފްތާ ބަންދުގައި އިޒްރޭލުގެ ބޮޑު ވަޒީރު ބެނެޓް ވަނީ އެމެރިކާ އަށް ވަޑައިގެން ވައިޓް ހައުސްގައި އެމެރިކާގެ ރައީސް ޖޯ ބައިޑެންއާ ބައްދަލުކުރައްވާފަ އެވެ.
"ޑިފެންސް މިނިސްޓަރު ބެނީ ގާންޓްޒް ވަނީ އާދީއްތަ ދުވަހުގެ ހަވީރު ފަލަސްތީނުގެ ރައީސް މަހްމޫދު އައްބާސްއާ ބައްދަލުކުރައްވައި، ސެކިއުރިޓީ، މަދަނީ އަދި އިގްތިސާދާ ގުޅޭ ސިޔާސަތުތަކުގައި މަޝްވަރާ ކުރައްވާފައި،" އިޒްރޭލް ޑިފެންސް މިނިސްޓްރީގެ ބަޔާނެއްގައި ބުންޏެވެ.
ގާންޓްޒް އަކީ އިޒްރޭލުގައި ވެރިކަން ކުރާ ކޯލިޝަން ސަރުކާރުގައި ހިމެނޭ ސެންޓްރިސްޓް ޕާޓީއެއްގެ ލީޑަރެވެ. ބަޔާނުގައި ބުނެފައި ވަނީ ފަލަސްތީނުގެ އިގްތިސާދި ވަރުގަދަ ކުރެވޭނެ ފިޔަވަޅުތައް އިޒްރޭލުން އަޅާނެކަމުގެ ޔަގީންކަން ގާންޓްޒް ދެއްވި ކަމަށެވެ.
އޭގެ އިތުރުން ހުޅަނގު އައްސޭރި އާއި ގާޒާގެ ސެކިއުރިޓީ އާއި އިގްތިސާދީ ހާލަތްތައް ބަދަލުކުރެވޭނެ ގޮތްތަކާ ގުޅޭ ގޮތުން ވެސް މަޝްވަރާ ކުރި ކަމަށް ބަޔާނުގައި ވެ އެވެ.
"ދެ ލީޑަރުން އެއްބަސްވެވަޑައިގެންނެވީ އިތުރަށް މަޝްވަރާތައް ބޭއްވުމަށް،"
އެ ބައްދަލުވުމުގައި ވަނީ އިޒްރޭލާއި ފަލަސްތީނުގެ އެހެން އިސް އޮފިޝަލުން ވެސް ބައިވެރިވެފަ އެވެ. އެގޮތުން ފަލަސްތީނުގެ ސަރަހައްދުތަކުގައި ދިރިއުޅޭ މީހުންގެ މަދަނީ ކަންކަން ބަލަހައްޓަން އިޒްރޭލު ސިފައިން ކަނޑައަޅާފައިވާ ގޮފީގެ ވެރިޔާ ގަސަން އަލްޔަން އާދި ފަލަސްތީނު ސަރުކާރުގެ އިސް އޮފިޝަލް ހުސެން އަލް ޝެއިހް އަދި ފަލަސްތީނުގެ ޖާސޫސީ ވެރިޔާ މަޖިދް ފަރަޖް ބައިވެރިވެވަޑައިގެންނެވި އެވެ.
ފަލަސްތީނާއި އިޒްރޭލާ ދެމެދު ބައްދަލުވުމެއް ބޭއްވިކަން ޓްވިޓާ މެދުވެރިކޮށް އަލް ޝެއިހް ވަނީ ކަށަވަރުކޮށްދެއްވާފަ އެވެ. އިޒްރޭލުގެ ޑިފެންސް މިނިސްޓްރީން ބުނީ އެ ބައްދަލުވުމަށް ފަހު ދެ ލީޑަރުން އެކަނި ބައިވެރިވެވަޑައިގެންނެވި ކުޑަ ބައްދަލުވުމެއް ވެސް ބޭއްވި ކަމަށެވެ.
އިޒްރޭލާއި ފަލަސްތީނު ސަރުކާރާ ދެމެދު އޮތް ގުޅުން ފަހަކަށް އައިސް ވަނީ ވަރަށް ބޮޑަށް ގޯސްވެފަ އެވެ. ފަލަސްތީނު ސަރުކާރަކީ އިޒްރޭލުން ވެރިވެގަނެފައިވާ ހުޅަނގު އައްސޭރީގައި ވެރިކަން ކުރާ ސަރުކާރެވެ. ހުޅަނގު އައްސޭރިއާ ވަކިން އޮންނަ ގާޒާގައި ވެރިކަން ކުރަނީ ހަމާސް ގްރޫޕުންނެވެ.
