އަންނަ އޮކްޓޫބަރު މަހު މާލޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތަށް ޓީމު އެކުލަވާލުމުގެ މަސައްކަތުގެ ތެރެއިން ބަންގްލަދޭޝް އާއި ސްރީލަންކާ އިން ޔޫރަޕްގައި ކުޅޭ އެ ގައުމުތަކަށް ނިސްބަތްވާ ކުޅުންތެރިން ޓެސްޓްކުރަން ނިންމައިފި އެވެ.
ކިރްގިސްތާންގައި ބާއްވާ ތުރީ ނޭޝަންސް ކަޕްގައި ވާދަކުރަން ބަންގްލަދޭޝްގެ އިނގިރޭސި ކޯޗު ޖޭމީ ޑޭ އެކުލަވާލި 23 ކުޅުންތެރިންގެ ސްކޮޑުން ވަނީ އެމެރިކާ އާއި ޔޫރަޕްގައި ކުޅޭ ބަންގްލަދޭޝަށް ނިސްބަތްވާ ދެ ކުޅުންތެރިއަކަށް ފުރުސަތު ދީފަ އެވެ. އެ ގޮތުން ސްކޮޑުގައި ހިމަނާފައިވަނީ ކެނަޑާގެ ސެމީ ޕްރޮފެޝަނަލް ލެވަލްގައި ކުޅެމުން އަންނަ ފޯވާޑް ރަހްބާރު ވާހިދު ހާން، 25، އާއި ފްރާންސްގެ ފަސް ވަނަ ޑިވިޝަނުގައި ކުޅެމުން އަންނަ ޒުވާން މިޑްފީލްޑަރު ތަހުމީދު އިސްލާމް، 18، އެވެ.
ބަންގްލަދޭޝް އިން މީގެ ކުރިން ވެސް ވަނީ ޔޫރަޕްގެ އެކި ގައުމުތަކުގައި ކުޅޭ ކުޅުންތެރިންނަށް ގައުމީ ސްކޮޑުން ފުރުސަތު ދީފަ އެވެ. އެ ގޮތުން ޑެންމާކްގައި މީގެ ކުރިން ކުޅުނު ޖަމާލް ބުޔާން އަށް މީގެ ތިން އަަހަރުކުރިން ފުރުސަތު ދިންއިރު، މިދިޔަ އަހަރު ވަނީ ފިންލެންޑަށް އުފަން ތާރިގް ކާޒީ އަށް ގައުމީ ޓީމުން ޖާގަ ދީފަ އެވެ. ފިންލެންޑްގެ އުމުރުފުރާ ގައުމީ ޓީމަށް ކުޅުނު ތާރިގަށް ބަންގްލަދޭޝް ޓީމުން ފުރުސަތު ދިނީ މިދިޔަ އަހަރު އޭނާ އަށް ރަސްމީކޮށް އެ ގައުމުގެ ރަށްވެހިކަން ދިނުމަށް ފަހު އެވެ. ތާރިގު އަންނަނީ ބަންގްލަދޭޝްގެ ޗެމްޕިއަން ބަޝުންދަރަ ކިންގްސް އަށް މޮޅު ކުޅުމެއް ދައްކަމުންނެވެ.
ބަންގްލަދޭޝްގެ ކޯޗު ޑޭ އެ ގައުމުގެ މީޑިއާ އަށް ބުނީ ކިރްގިސްތާންގައި އަންނަ މަހު އޮންނަ ތުރީ ނޭޝަންސް ކަޕްގައި ޓީމު ޓެސްޓް ކޮށްލެވޭނެ ކަމަށާއި ސާފް ޗެމްޕިއަންޝިޕަށް ސްކޮޑު އެކުލަވާލުމުގައި މި މުބާރާތުގެ ބޭނުން ހިފާނެ ކަމަށެވެ.
ލަންކާ އިން ސާފް ޗެމްޕިއަންޝިޕަށް އިއުލާނުކުރި 29 ކުޅުންތެރިންގެ ސްކޮޑުން ވަނީ ޔޫރަޕްގައި ކުޅޭ ތިން ކުޅުންތެރިއަކަށް ފުުރުސަތު ދީފަ އެވެ.
އެއީ އިންގްލެންޑްގެ ކުއީންސްޕާކް ރޭންޖާސް (ކިއުޕީއާރް) އަށް ކުޅޭ 18 އަހަރުގެ ވިންގް ޑިލޯން ޑި ސިލްވާ އާއި ޖަރުމަނު ލީގުގެ ޔޫނިއަން ބާލިން އަށް ކުރިން ކުޅުނު އަހުމަދު ވަސީމް ރަޒާކް އަދި އިންގްލެންޑްގެ ސެމީ ޕްރޮފެޝަނަލް ލެވަލްގެ ކްލަބް ވައިޓްހޯކް އަށް ކުޅޭ މާވިން ހަމިލްޓަން އެވެ.
މީގެ ތެރެއިން ވަސީމް ވަނީ މިދިޔަ ޖޫން މަހު ވޯލްޑް ކަޕް ކޮލިފައިން މެޗެއްގައި ލެބަަނަން ކޮޅަށް ދެ ގޯލު ޖަހައިފަ އެވެ. ބަންގްލަދޭޝްގައި 2018 ވަނަ އަހަރު ބޭއްވި ސާފް ސުޒުކީ ކަޕުގައި ވާދަކުރި ލަންކާ ޓީމަށް ވަސީމް ގެންނަން މަސައްކަތްކުރި އެވެ. އެކަމަކު، އެ ފަަހަރު އެކަން ކާމިޔާބުވާގޮތެއް ނުވި އެވެ.
ސާފް ޗެމްޕިއަންޝިޕްގައި ލަންކާ އަށް ކޯޗުކޮށްދޭނީ ކުރިން ނިއު ރޭޑިއަންޓްގައި ހުރި ކޯޗު ބޮސްނިއާގެ އާމިރް އަލަގިޗް އެވެ.
