ޓޫރިޒަމް މިނިސްޓްރީ ތެރެއިން ގޮތް ނޭނގޭ ޕާރުސަލެއް ފެނިގެން ރިޕޯޓްކުރުމުން އެމްއެންޑީއެފްގެ ބޮން ސްކޮޑް މިއަދު ހަރަކާތްތެރިވި އިރު އޭގެ ތެރޭގައި ހުރީ ކަދުރު ކަން "އަދަދު"އަށް އެނގިއްޖެ އެވެ.
އެ ޕާރުސަލް ވަނީ ފުލުހުންނާ ހަވާލުކޮށްފަ އެވެ.
އެކަމަކު އެ ޕާރުސަލް ލިބުނީ ކިހިނެއް ކަމެއް ޓޫރިޒަމުން އަދި ނުބުނެ އެވެ.
ވެލާނާގޭ ފަސް ވަނަ ފްލޯގައި ހިންގާ ޓޫރިޒަމް މިނިސްޓްރީން ގޮތް ނޭނގޭ ޕާރުސަލެއް މިއަދު ފެނުމާ އެކު އެމްއެންޑީއެފްގެ ބޮން ސްކޮޑުން ހަރަކާތްތެރިވި އެވެ. އެއީ ނުރައްކާތެރި އެއްޗަކަށް ވެދާނެތީ ޓޫރިޒަމް މިނިސްޓްރީން މުވައްޒަފުން ވެސް ބޭރަށް ނެރުނެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވީ އެ ޕާރުސަލްގައި ނުރައްކާތެރި އެއްވެސް އެއްޗެއް ނެތް ކަމަށެވެ. އެހެންކަމުން މިނިސްޓްރީ އާއްމު ހާލަތަށް ގެނެސްފައިވާ ކަމަށް އޭނާ ވިދާޅުވި އެވެ.
"އެ ޕާރުސަލްގައި އެއްވެސް ނަމެއް ވެސް ނެތް ހަވާލުވާން ޖެހޭ މީހާގެ. އެހެންވެ އެކޮޅުން ރިޕޯޓް ކުރީ ވެސް. އެކަމަކު އޭގައި ނުރައްކަލެއް ނެތް،" އޭނާ ވިދާޅުވި އެވެ.
މިދިޔަ ޖުލައި މަހުގެ ތެރޭގައި ސުޕްރީމް ކޯޓު ކައިރިން ފެނުނު ރިމޯޓް ކާރަކާ މެދު ޝައްކު ކުރެވި އެމްއެންޑީއެފްގެ ބޮން ސްކޮޑް ގޮސް ބެލި އެވެ. އެކަމަކު އެއީ ނުރައްކާތެރި އެއްޗެއް ނޫން ކަަމަށް އެމްއެންޑީއެފުން ފަހުން ބުނެފައިވެ އެވެ.
މިދިޔަ މެއި މަހުގެ ތެރޭގައި މަޖީދީމަގުގައި ވަނީ ސައިކަލެއްގައި ބޮމެއް ހަރުކޮށްގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާއެއް ދީފަ އެވެ. އެ ހަމަލާއަށް ފަހު ސަލާމަތީ ކަންކަން ކުރިއަށް ވުރެން ވެސް ވަރުގަދަކުރަމުން އަންނަ ކަމަށް ސިފައިންނާއި ފުލުހުން ވަނީ ބުނެފަ އެވެ.
