ސައުދީ ސަރުކާރުގެ އެހީގައި މާލޭގައި އިމާރާތް ކޮށްފައިވާ ސަލްމާން މިސްކިތް ހުޅުވުމުގެ މަޝްވަރާއަށް އެ ގައުމުގެ އިސް ބޭފުޅުންތަކެއް ރާއްޖެ ވަޑައިގެންފި އެވެ.
ކުރީގެ ސަރުކާރުގައި ފެށި މިސްކިތް ނުހުޅުވި ލަސްވެފައިވާތީ ފާޑުކިއުން ވަނީ އަމާޒުވެފަ އެވެ. ކުރިން ހަމަޖައްސާފައި އޮތީ ޖުލައި 4ގައި އެ ޓީމު ރާއްޖެ އަންނަ ގޮތަށެވެ. އެކަމަކު އެ ތާރީހު ލަސްކޮށްލީ ޝާހީ ބޭފުޅަކު ވެސް ވަޑައިގަތުމަށް ނިންމެވުމުން ކަމަށް ރައީސް އޮފީހުން ބުންޏެވެ.
ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ މިސްކިތް ހުޅުވުމުގެ މަޝްވަރާތައް މިއަދު އައި ޓީމުން ކުރިއަށް ގެންދާނީ މާދަމާ ކަމަށެވެ.
މި ވަފުދުގައި ރާއްޖެ ވަޑައިގަތީ އެ ގައުމުގެ އިސްލާމިކް އެފެއާޒް އަންޑާ ސެކްރެޓަރީ، އައްވާދު ސަބްތީ މުހައްމަދު އަލެނެޒީ އެވެ. އަދި ރާއްޖޭގެ ފަރާތުން މި މަޝްވަރާގައި ބައިވެރިވާނީ ފޮރިން މިނިސްޓްރީ އާއި އިސްލާމިކް މިނިސްޓްރީ އާއި ހައުސިން މިނިސްޓްރީގެ އިތުރުން ރައީސް އޮފީހުގެ ފޮރިން ރިލޭޝަންސްގެ އިސްވެރިންނެވެ.
މިސްކިތް ހުޅުވުމުގެ މަޝްވަރާތައް ކުރަމުން އަންނައިރު މި މަހު ވަނީ މިސްކިތަަށް ބޭނުންވާ މުވައްޒަފުން ނަގަން ވެސް ފަށައިފަ އެވެ.
އެ މިސްކިތުގެ ފުރަތަމަ އަދި ދެވަނަ ފަންގިފިލާގައި 4،000 މީހުންނަށް ނަމާދު ކުރެވޭނެ އެވެ. މީގެއިތުރުން 40 ޖާގައިގެ ހަތަރު ކްލާސްރޫމާއި 15 ޖާގައިގެ ފަސް ސެނިމާ ރޫމް ހިމެނެ އެވެ. ލައިބްރަރީ އަދި 350 މީހުންގެ ޖާގައިގެ އޮޑިޓޯރިއަމް ހިމެނޭއިރު 300 މީހުންގެ ޖާގައިގެ މަލްޓި ޕާޕަސް ހޯލެއް ހިމެނެ އެވެ.
ސައުދީ ރަސްގެފާނުގެ އެހީގައި އިމާރާތްކުރި އެ މިސްކިތުގެ މަސައްކަތް ކުރިއަށް ގެންދިޔައީ ތުރުކީގެ ޓާމެކްސް ކުންފުނިންނެވެ. އެ ކުންފުންޏާ އެކު ކުރީގެ ސަރުކާރުން އެއްބަސްވުމުގައި ސޮއިކުރީ ފެބުރުއަރީ 28، 2017ގަ އެވެ.
