އަފްގާނިސްތާނުގެ ހާލަތާ ގުޅިގެން ކަންބޮޑުވުންފާޅުކޮށް، އިންސާނީ ހައްގުތައް ކަށަވަރުކުރުމަށް ދިވެހި ސަރުކާރުން ކޮށްދެވެން ހުރި މަސައްކަތްތައް ކޮށްދިނުމަށް ހިއުމަންރައިޓްސް ކޮމިޝަން އޮފް ދަ މޯލްޑިވްސްއިން (އެޗްއާރްސީއެމް) އިން އެދިއްޖެ އެވެ.
އެޗްއާރުސީއެމުން މިގޮތަށް އެދުނީ ރައީސް އިބްރާހިމް މުހައްމަދު ސޯލިހާއި ފޮރިން މިނިސްޓަރު އަބްދުﷲ ޝާހިދަށް ފޮނުއްވި ސިޓީގަ އެވެ.
އަފްގާނިސްތާނުގެ ކަންކަން ގާތުން ބަލަން އެޗްއާރުސީއެމުން އެދިވަޑައިގަތްއިރު އެ ގައުމުގެ ޖަލެއްގައި ދިވެހި ދެމަފިރިންނާއި އެ މީހުންގެ ހަތަރު ދަރިން އެބަތިއްބެވެ. އެ މީހުންނާ ގުޅުން ކެނޑި ހާލު ބެލޭނެ ގޮތެއް ނެތުމުގެ ކަންބޮޑުވުން ވެސް އެޗްއާރުސީއެމުން ފާޅުކުރި އެވެ.
އެޗްއާރުސީއެމުން ބުނީ އެ ގައުމާއި ރާއްޖެއަކީ ވެސް އޭޝިއާ ޕެސިފިކް ފޯރަމް (އޭޑީއެފް)ގެ މެމްބަރުންނަށްވާއިރު އަފްގާނިސްތާނުގައި މިވަގުތު ދިމާވެފައިވާ ހާލަތުގައި، ތޯލިބާނުން އަމަލުކޮށްފާނެ ގޮތަކާ މެދު އޭޕީއެފްއިން ކަންބޮޑުވުން ފާޅުކޮށްފައިވާ ކަމަށެވެ.
އެ ކޮމިޝަނުން ފޮނުވި ސިޓީގައި އެދިފައިވަނީ އެ ގައުމުގައި ތިބި ދިވެހިން ވެސް ހިމެނޭ ގޮތަށް އިންސާނީ ހައްގުތައް ނަގަހައްޓައި ރައްކާތެރިކުރަން ދިވެހި ސަރުކާރަށް ކޮށްދެވެން ހުރިމަސައްކަތްތައް ކޮށްދިނުމަށެވެ.
"އަފްގާނިސްތާނުގެ އިންސާނީ ހައްގުތަކާ ބެހޭ މުއައްސަސާތަކުގެ މުވައްޒަފުންނާއި އެ ފަރާތްތަކުގެ އާއިލާތަކާއި އެ ގައުމުގެ ކުޑަކުދިންނާއި އަންހެނުންނާއި އާންމު ރައްޔިތުންގެ އިތުރަށް އެ ގައުމުގައި ދިރިއުޅެމުންދާ އެންމެހައި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވެން ހުރި އެންމެހާ މަސައްކަތް ކޮށްދިނުމަށް،" އެޗްއާރްސީމުން ވަނީ އެދިފަ އެވެ.
އެޗްއާރުސީއެމުން ތިބީ އެ ގައުމަށް ކޮށްދެވެން ސަރުކާރަށް އޮތް ކަންކަމުގައި އެއްބާރުލުން ފޯރުކޮށްދޭން ތައްޔާރަށް ކަމަށް އެ ކޮމިޝަނުން ބުންޏެވެ.
އަފްގާނަށް ތޯލިބާނުން އަތްގަދަކޮށް އެ ގައުމުގެ ހާލަތު ގޯސްވެފައިވާއިރު މިދިޔަ ހުކުރު ދުވަހު ވަނީ އަފްގާނިސްތާނުގައި އުޅޭ އިސްލާމިކް ސްޓޭޓް (އައިއެސް) ޓާގެޓުތަކަށް އަމާޒުކޮށް އެމެރިކާ އިން ޑްރޯން ހަމަލާތަކެއް ވެސް ދީފަ އެވެ. އެ ހަމަލާގައި ގިނަ އަދަދެއްގެ ބަޔަކު ވަނީ މަރުވެފަ އެވެ.
