ސަރުކާރުގެ ގިނަ އޮފީސްތަކެއް ހިންގާ ވެލާނާގެއިން ގޮތް ނޭނގޭ ޕާރުސަލެއް ފެނިގެން އެމްއެންޑީއެފްގެ ބޮން ސްކޮޑް ހަރަކާތްތެރިވާން ފަށައިފި އެވެ.
މޯލްޑިވްސް ނެޝަނަލް ޑިފެންސް ފޯސް (އެމްްއެންޑީއެފް)ގެ މީޑިއާ އޮފިޝަލް ވިދާޅުވީ ރިޕޯޓް ލިބުނީ ގޮތް ނޭނގޭ އެއްޗެއް ޓޫރިޒަމް މިނިސްޓްރީ ތެރެއިން ފެނުނު ކަމަށެވެ. އެނގިފައިވާ ގޮތުގައި އެއީ އެ މިނިސްޓްރީއަށް މިއަދު ގެންދިޔަ ޕާރުސަލެކެވެ.
"އޮފީސްތަކުން ގޮތް ނޭނގޭ ތަކެއްޗާ ހަވާލުނުވުމަށް އެމްްއެންޑީއެފް އިން އިލްތިމާސް ކުރަން،" މީޑިއާ އޮފިޝަލް ވިދާޅުވި އެވެ.
މިދިޔަ ޖުލައި މަހުގެ ތެރޭގައި ސުޕްރީމް ކޯޓު ކައިރިން ފެނުނު ރިމޯޓް ކާރަކާ މެދު ޝައްކު ކުރެވި އެމްއެންޑީއެފްގެ ބޮން ސްކޮޑް ގޮސް ބެލި އެވެ. އެކަމަކު އެއީ ނުރައްކާތެރި އެއްޗެއް ނޫން ކަަމަށް އެމްއެންޑީއެފުން ފަހުން ބުނެފައިވެ އެވެ.
މިދިޔަ މެއި މަހުގެ ތެރޭގައި މަޖީދީމަގުގައި ވަނީ ސައިކަލެއްގައި ބޮމެއް ހަރުކޮށްގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާއެއް ދީފަ އެވެ. އެ ހަމަލާއަށް ފަހު ސަލާމަތީ ކަންކަން ކުރިއަށް ވުރެން ވެސް ވަރުގަދަކުރަމުން އަންނަ ކަމަށް ސިފައިންނާއި ފުލުހުން ވަނީ ބުނެފަ އެވެ.
