ގުދުސް (އޯގަސްޓު 29) - މިދިޔަ ހަފްތާގައި ގާޒާގެ ބޯޑަރު ސަރަހައްދުގައި ހިނގި ހަމަނުޖެހުމުގައި އިޒްރޭލް ސިފައިން ބަޑި ޖެހި އުމުރުން 12 އަހަރުގެ ފަލަސްތީނު ކުއްޖާ މަރުވެއްޖެ އެވެ.
އުމަރް ހަސަން އަބޫ އަލް ނައިލް އަށް އަނިޔާވީ އިޒްރޭލް ސިފައިން ބަޑި ޖެހުމުން މިދިޔަ ހަފްތާގެ ހޮނިހިރު ދުވަހު އެވެ. ބަޑި ޖަހާފައި ވަނީ ގާޒާ އާއި އިޒްރޭލު ވަކިކުރާ ބޯޑަރު ކައިރީ ބޭއްވި އެއްވުމަކަށެވެ.
ގާޒާގެ ހެލްތު މިނިސްޓްރީން ނެރުނު ބަޔާނެއްގައި ބުނީ ލިބުނު ޒަހަމްތަކަށް ފަރުވާދެމުން ދަނިކޮށް އެއް ހަފްތާ ފަހުން އެ ކުއްޖާ މަރުވެފައިވާ ކަމަށެވެ. ހޮނިހިރު ދުވަހު ބޭއްވި ޖަނާޒާގައި 100 މީހުން ބައިވެރިވި އެވެ.
އޯގަސްޓު 21 ވަނަ ދުވަހު ގާޒާ އާއި އިޒްރޭލު ވަކިކުރާ ބޯޑަރު ކައިރީ ހިނގި ހަމަނުޖެހުމުގައި 40 މީހުންނަށް އަނިޔާވި އެވެ. އޭގެ ތެރެއިން 32 އަހަރުގެ ފަލަސްތީނު ފިރިހެނަކު މިދިޔަ ބުދަ ދުވަހު މަރުވި އެވެ.
އިޒްރޭލުގެ ފުލުހެއް ގަޔަށް ވެސް އެ ދުވަހު ބަޑި ޖެހި އެވެ. އޭނާގެ ހާލު ސީރިއަސް ކަމަށް އިޒްރޭލުން ބުނެ އެވެ.
އިޒްރޭލުގެ ސިފައިން ބުނީ އެއްވި މީހުންގެ ތެރެއަށް ބަޑި ޖެހީ، ގޮވާ ޒާތުގެ ތަކެތި އުކައި، ބޯޑަރު ފާރު މަތިން އަރަން މަސައްކަތް ކުރުމުން ކަމަށެވެ.
އެ ހަމަނުޖެހުމަށް ފަހު އިޒްރޭލުން ވަނީ ގާޒާ އަށް ވައިގެ ހަމަލާތަކެއް ވެސް ދީފަ އެވެ. މިދިޔަ ހަފްތާގެ އާދީއްތަ ދުވަހު ހަމަލާ ދިނީ ހަމާށްގެ ހަތިޔާރު އުފައްޒާ ފެކްޓްރީއަކަށް ކަމަށް އިޒްރޭލުން ބުންޏެވެ.
އޭގެ ފަހުން ހޯމަ އަދި އަންގާރަ ދުވަހު ވެސް ހަމަލާ ދިނެވެ. އެ ހަމަލާތައް ދިނީ އިޒްރޭލަށް "އަލިފާން ފުއްޕާހަން" ފޮނުވުމުން ކަމަށް ބުންޏެވެ. އެއަށްފަހު ބުދަ ދުވަހު ވެސް ބޯޑަރު ކައިރީ ހަމަނުޖެހުން ހިނގި އެވެ.
