ވޮޝިންޓަން، އެމެރިކާ (އޯގަސްޓު 28) - އެމެރިކާގެ ރައީސް ޖޯ ބައިޑެން އާއި އިޒްރޭލުގެ ބޮޑު ވަޒީރު ނަފްތާލީ ބެނެޓްގެ ފުރަތަމަ ބައްދަލުވުމުގައި، އިރާނުން ނިއުކްލިއާ ހަތިޔާރު ހޯދަން ކުރާ މަސައްކަތް ހުއްޓުވަން މަޝްވަރާ ކުރައްވައިފި އެވެ.
ހުކުރު ދުވަހު ބޭއްވި ބައްދަލުވުމަކީ ދެ ލީޑަރުންގެ ފުރަތަމަ ބައްދަލުވުމެވެ. އިޒްރޭލުގެ ކުރީގެ ބޮޑު ވަޒީރު ބެންޖަމިން ނަތަންޔާހޫގެ 15 އަހަރުވީ ދިގު ވެރިކަމުގައި އެމެރިކާގެ ޑިމޮކްރެޓުންނާއި ދުރުވެ، ރިޕަބްލިކަނުންނާ އެކު ގާތް ގުޅުމެއް ބޭއްވި އެވެ.
އެހެންވެ، ބެނެޓް ވިދާޅުވެފައި ވަނީ އެމެރިކާ އާއި އިޒްރޭލުގެ ގުޅުން "ރީސެޓް" ކުރައްވާނެ ކަމަށެވެ. އޭގެ އިތުރުން އިރާނުން ނިއުކްލިއާ ހަތިޔާރު އުފެއްދުން ހުއްޓުވުމަށް އެމެރިކާގެ އެއްބާރުލުން އޮންނާނެކަން ޔަގީން ކުރުމަކީ ވެސް ބެނެޓްގެ އަމާޒެކެވެ.
ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން އުމުރުން 49 އަހަރުގެ ބެނެޓް ވިދާޅުވީ އަމާޒަށް ވާސިލްވެވިއްޖެ ކަމަށެވެ. އަދި އިރާނަށް ދުވަހަކު ވެސް ނިއުކްލިއާ ހަތިޔާރެއް ނުލިބޭނެ ކަމުގެ ޔަގީންކަން ބައިޑެން ދެއްވި ކަމަށް ވިދާޅުވި އެވެ.
"އަޅުގަނޑަށް ފެނުނީ އިޒްރޭލް ދެކެ ލޯބިވާ ލީޑަރެއް. ބޭނުންވާ ކަންކަން ސާފުކޮށް އެނގިވަޑައިގަންނަވާ އަދި އަޅުގަނޑުމެން އެދޭ ކަންކަން އަޑު އައްސަވާ ލީޑަރެއް،" ބައިޑެންއާ ގުޅޭ ގޮތުން ބެނެޓް ވިދާޅުވި އެވެ. ބައިޑެން ވިދާޅުވީ ބެނެޓްއާ އެކު "ގާތް ރަހުމަތްތެރިކަމެއް" އުފެދިއްޖެ ކަމަށެވެ.
އިރާނުގެ ނިއުކްލިއާ މަޝްރޫއާ ގުޅޭ ގޮތުން 2015 ވަނަ އަހަރު ހެދި އެއްބަސްވުމުން ވަކިވާން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ނިންމެވި އެވެ. އެ އެއްބަސްވުން އަލުން އިއާދަކުރުމާ ގުޅޭ މަޝްވަރާތައް ފަށާފައި ވާއިރު، އެއީ އިޒްރޭލުން ހިތްހަމަނުޖެހޭ ކަމެކެވެ.
