ދެހާސް ސޯޅަ ވަނަ އަހަރު ދައްކަން ފެށި ސިޔާސީ ޑްރާމާ "ދަ ކްރައުން" އަށް ލިބުނު ބޮޑު ސަމާލުކަމާއެކު އިނގިރޭސި ޝާހީ އާއިލާގެ އެތެރޭގެ ވާހަކަތަކަށް އެތައް ބަޔަކު ޝައުގުވެރިވި އެވެ. ޝާހީ އާއިލާގެ މާޒީ އާއި ޕްރިންސަސް ޑަޔާނާ އާއި ފިރިކަލުންގެ ދެމެދުގެ ޒާތީ އެތައް ވާހަކަ ތަކެއް ވެސް ސީރީޒުން އުފެއްދި ކޮންޓްރޮވަސީގެ ތެރޭގައި ހިމެނުނެވެ. ދަ ކްރައުން ގެ އަޑު ގަދަ ވެފައި އޮއްވައި، ޑަޔާނާ އާއި ޗާލްސްގެ ކައިވެނިފުޅު ރޫޅުނު ހާދިސާގެ މައްޗަށް ބިނާކޮށް ފިލްމެއް ހަދާ ވާހަކަ އޮސްކާ ނޮމިނޭޓެޑް ޑައިރެކްޓަރު ޕަބްލޯ ލަރެއިން މިދިޔަ އަހަރު އިއުލާން ކުރި އެވެ.
ޑަޔާނާގެ އާއިލީ ނަމުން ނަން ދީފައިވާ ފިލްމު "ސްޕެންސާ" އިއުލާނު ކުރިތާ އަހަރެއް ފަހުން އިއްޔެ ވަނީ އެ ފިލްމުގެ ފުރަތަމަ ޓްރެއިލާ ނެރެފަ އެވެ.
"ސްޕެންސާ" ގެ ލީޑް ރޯލު ކުޅެނީ ޓްވައިލައިޓްގެ ތަރި ކްރިސްޓެން ސްޓޫއާޓް އެވެ. ޓްރެއިލާ ފެށެނީ ޝާހީ ގަނޑުވަރުގެ ސްޓާފުން 1991 ވަނަ އަހަރުގެ ކްރިސްމަސް ހަފްލާ އަށް ތަން ތައްޔާރުކުރަމުންދާ މަންޒަރުތަކަކުންނެވެ. ޑަޔާނާގެ ރޯލުން ފެންނަ ކްރިސްޓެންގެ ގިނަ، ކުރު ސީން ތަކެއް އެއް މިނިޓްގެ ޓްރެއިލާ އިން ފެންނަ އިރު، ވަރަށް ބޮޑު ހާސްކަމެއްގެ ތެރެގައި ކެރެކްޓާ އުޅޭ މަންޒަރުތަކެއް ދައްކަ އެވެ.
މި ފިލްމުގެ ތިއޭޓާ ރިލީޒް ހަމަޖެހިފައި އޮތީ ނޮވެމްބަރު މަހުގެ ތެރެގަ އެވެ. އެކަމަކު އޭގެ ކުރިން ސެޕްޓެމްބަރު މަހު ގެ 3 ވަނަ ދުވަހު ވެނިސް ގައި ބާއްވާ ފިލްމު ފެސްޓިވަލުގައި މޫވީ ޕްރިމިއާ ކުރާނެ އެވެ.
ފިލްމުގައި ކުޅޭ ކެރެކްޓާއާ ބެހޭ ގޮތުން ކްރިސްޓެން މިދިޔަ ޖެނުއަރީ މަހު ދިން އިންޓަވިއު އެއްގައި ބުނެފައިވަނީ، "ސްޕެންސާ" އަކީ ފިރިކަލުން ޗާލްސް އާއި އެކު އުޅުއްވަމުން ގެންދެވި ދިރިއުޅުން ނިންމަވަން ނިންމަވަންޖެހި، ޖަޒުބާތާއި ނަފްސާނީ ހާސްކަމެއްގެ ތެރެއަށް ވެއްޓިވަޑައިގަތް ދަނޑިވަޅުގައި ޑަޔާނާ ކުރެއްވި ތަޖުރިބާގެ ހިޔާލީ މަންޒަރުތަކެއް ކަމަށެވެ. އެހެންކަމުން ޑަޔާނާގެ ހަޔާތުގެ އެ ހާދިސާތަކުގެ ގިނަ ވާހަކަތަކެއް ހިމަނާފައިވާނެ ކަމަށް ގަބޫލުކުރެވެ އެވެ.
