ބާލިން (އޮގަސްޓް 28) - ޖަރުމަނު ލީގުގައި ރޭ އާލިން ބްރައުޓް ހާލަންޑް ފަހު ވަގުތު ޖެހި ގޯލުން ބޮރޫޝިއާ ޑޯޓްމަންޑް 3-2 އިން ހޮފެންހައިމް އަތުން މޮޅުވެއްޖެ އެވެ.
ލީގުގެ ފުރަތަަމަ މެޗުން ޑޯޓްމަންޑް މޮޅުވި ނަމަވެސް ދެ ވަނަ ހަފްތާގައި ފްރެއިބާގް އަތުން ވަނީ ބަލިވެފަ އެވެ. އެހެންވެ ރޭގެ މެޗުން މޮޅުވެގެން އަލުން ފޯމަކަށް އެޅެން އެ ޓީމަށް އޮތީ މަޖުބޫރުވެފަ އެވެ. ހޮފެންހައިމް އަތުން ޑޯޓްމަންޑަށް މޮޅެއް ލިބުނީ ވަރަށް މަސައްކަތުންނެވެ.
ޑޯޓްމަންޑްގެ މަޝްހޫރު ދަނޑު ސިގްނަލް އިޑޫނާ ޕާކްގައި ކުޅުނު މެޗުގެ ފަސް ގޯލު ވެސް ފެނުނީ ދެ ވަނަ ހާފްގަ އެެވެ. އިނގިރޭސި ޒުވާން މިޑްފީލްޑަރު ޖޫޑް ބެލިންހަމް ދިން ބޯޅައަކުން މެޗުގެ 49 ވަނަ މިނިޓްގައި ޑޯޓްމަންޑަށް ލީޑުނަގައިދިނީ އެމެރިކާގެ މިޑްފީލްޑަރު ޖިއޮވާނީ ރޭނާ އެވެ. މެނުއަލް އަކަންޖީ އަށް ޑޯޓްމަންޑްގެ ލީޑުފުޅާކޮށްދޭން ލިބުނު ފުރުސަތުގެ ބޭނުން ނުހިފުނެވެ.
ހޮފެންހައިމުން ނަތީޖާ ހަމަހަަމަކުރީ 61 ވަނަ މިނިޓްގައި އޮސްޓްރިއާގެ މިޑްފީލްޑަރު ކްރިސްޓޮފް ބޯމްގާޓްނާ ޖެހި ގޯލުންނެވެ. އޭގެ އަށް މިނިޓް ފަހުން އޭރިއާތެރެއިން ލިބުނު ފުރުސަތަކުން ބެލިންހަމް ވަނީ ގޯލެއް ޖަހައި އަލުން ޑޯޓްމަންޑަށް ލީޑުނަގައިދީފަ އެވެ.
ދެ ވަނަ ފަހަރަށް ނަތީޖާ ހަމަހަމަކުރަން ހޮފެންހައިމް އިން ކުރަމުންދިޔަ މަސައްކަތް ކާމިޔާބުވީ މެޗުގެ 90 ވަނަ މިނިޓްގަ އެވެ. ކޯނަރެއްގައި އޭރިއާތެރެއިން ލިބުނު ބޯޅައެއް ހޮފެންހައިމްގެ މުނަސް ޑާބޯ ވަނީ ގޯލުގެ ތެރެއަށް ފޮނުވާލައިފަ އެވެ.
ހޮފެންހައިމް އިން އެއްވަރުކުރިތާ މިނިޓެއްގެ ތެރޭގައި މެޗުގެ އިތުރު ވަގުތުގައި އޭރިއާތެރެއިން ހާލަންޑަށް ލިބުނު ބޯޅަ އޭނާ ވަނީ ގޯލުގެ މަތީ ދާގަނޑަށް އަމާޒުކޮށްލައިފަ އެވެ. މިއީ މި ފަހަރު ލީގުގެ ތިން މެޗުން ހާލަންޑް ޖެހި ތިން ވަނަ ގޯލެވެ.
މި މޮޅާ އެކު ޑޯޓްމަންޑް ވަނީ ތިން މެޗުން ދެ މޮޅު ހޯދައި ލީގުގެ އެއް ވަނަ އަށް ޖެހިލައިފަ އެވެ. ދެ ވަނައިގައި އޮތް ވުލްފްސްބާގް ވަނީ ކުޅުނު ދެ މެޗުން ހަ ޕޮއިންޓް ހޯދައިފަ އެވެ. ޖަރުމަނު ލީގުގައި މި ހަފްތާގެ ބާކީ މެޗުތަކުގެ ނަތީޖާ ނުކުންނަ ގޮތަކުން ޑޯޓްމަންޑަށް އެ މަގާމު ގެއްލުމުގެ ފުރުސަތު ވަރަށް ބޮޑެވެ.
