މެޑްރިޑް (އޮގަސްޓް 27) - ސްޕެއިނުގެ ގަދަބާރު ރެއާލް މެޑްރިޑުން ފްރާންސް ތަރި ކީލިއަން އެމްބާޕޭ ގަންނަން ކުރި ދެ ވަނަ ބިޑާ އެކު އޭނާ ވިއްކާލުމާ މެދު އަވަހަށް ގޮތެއް ނިންމަން ޕީއެސްޖީން މަޝްވަރާކުރަން ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އަންނަ އަހަރުގެ ޖޫން މަހުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ލައްވައި އާ އެއްބަސްވުމެއްގައި ސޮއިކުރަން ޕީއެސްޖީން މިހާތަނަށް ކުރި އެއްވެސް މަސައްކަތެއް ކާމިޔާބުނުވި އެވެ. އެމްބާޕޭ ގަންނަން ދެ ދުވަސް ކުރިން ރެއާލުން ކުރި ފުރަތަމަ ބިޑަކީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. ޕީއެސްޖީން ވަނީ ރެއާލްގެ އެ ހުށަހެޅުން އަނބުރާ ފޮނުވާލައިފަ އެވެ.
ރެއާލްގެ ފުރަތަމަ ބިޑަށް ފަހު ޕީއެސްޖީގެ ސްޕޯޓިން ޑިރެކްޓަރު ލިއޮނާޑޯ ފްރާންސްގެ ލެކިއުޕޭ ނޫހަށް ދިން އިންޓަވިއުއެއްގައި ބުނީ އެމްބާޕޭ ޕީއެސްޖީ ދޫކޮށްލަން ބުނެފައިވީ ނަމަވެސް އޭނާ ވިއްކާނީ ޕީއެސްޖީން ބޭނުންވާ އަގު ލިބުމުން ކަމަށް ބުނެފަ އެވެ. ލިއޮނާޑޯ ވަނީ ރެއާލުން ފަހު ވަގުތު ކުއްލިއަކަށް އެމްބާޕޭ ގަންނަން ޓްރާންސްފާގެ ފަހު ހަފްތާގައި މަސައްކަތް ފެށުމަކީ ރާވައިގެން ކުރި ކަމެއް ކަމަށް ބުނެފަ އެވެ.
ފްރާންސްގެ ނޫސްތަކުން ރިޕޯޓްކުރާ ގޮތުގައި ރެއާލުން އެމްބާޕޭ ގަންނަން އިއްޔެ ކުރި ބިޑަކީ 226 މިލިއަން ޑޮލަރުގެ (180 މިލިއަން ޔޫރޯގެ) ހުށަހެޅުމެކެވެ. މިއީ ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި އަދަދެވެ.
ރެއާލްގެ ދެ ވަނަ ހުށަހެޅުމާ އެކު ޕީއެސްޖީން މިހާރު އަންނަނީ އެމްބާޕޭ ވިއްކާލުމާ މެދު އަވަހަށް ގޮތެއް ނިންމަން މަޝްވަރާ ކުރަމުންނެވެ. އެއީ ޓްރާންސްފާގެ ފަހު ދުވަހު އެމްބާޕޭ ގެއްލިގެން ބަދަލުގައި އިތުރު ކުޅުންތެރިއަކު ނުލިބި ދާން ބޭނުންނުވާތީ އެވެ. އެމްބާޕޭގެ މަގާމަށް ޕީއެސްޖީން ފާރަލާ އެއް ކުޅުންތެރިއަކީ އެވަޓަންގެ ރިޗާލިސަން އެވެ.
އެމްބާޕޭ ގޮސްފިނަމަ ޕީއެސްޖީން ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ގެނެސްފާނެ ކަމަށް މީޑިއާގައި މީގެ ކުރިން ވާހަކަ ދެކެވުނެވެ. އެކަމަކު ރޮނާލްޑޯ ޔުވެންޓަސް ދޫކޮށްލަން ނިންމިތާ މާ ގިނައިރެއް ނުވެ ގަަތަރުގެ މީޑިއާ ޗެނަލް ބީން ސްޕޯޓްސް އަށް ދެއްވި އިންޓަވިއުއެއްގައި ޕީއެސްޖީގެ ރައީސް ނާސިރު އަލް ހެއްލާފީ ވިދާޅުވީ އެ ކްލަބުން ރޮނާލްޑޯ އަށް ޝައުގުވެރިކަމެއް ނެތް ކަމަށެވެ.
ޕީއެސްޖީން އެންމެ ފުރަތަމަ އެމްބާޕޭ ގެނައީ 2017 ވަނަ އަހަރު ލޯން އެއްބަސްވުމެއްގެ ދަށުންނެވެ. އޭގެ އެއް އަހަރު ފަހުން ޕީއެސްޖީން ދާއިމީ ކޮންޓްރެކްޓެއްގައި އެމްބާޕޭ މަޑުކުރުވީ އެވެ. އެމްބާޕޭ ވަނީ މިހާތަނަށް ޕީއެސްޖީ އަށް ކުޅުނު 174 މެޗުން 133 ގޯލު ޖަހައި 63 ގޯލު ޖަހަން ފުރުސަތު ތަނަވަސްކޮށްދީފަ އެވެ.
