މީގެ ގާތްގަނޑަކަށް 30 އަހަރު ކުރިން ތިލަފުއްޓަށް ކުނި ޖަމާކުރަން ފަށައި އުފެދިފައިވާ ކުނީގެ ބޮޑު ފަރުބަދަ ހުސްކޮށް, ޒަމާނީ ބަދަލުތަކާ އެކު އެ ސަރަހައްދު ފެހިކޮށްލުމުގެ މަޝްރޫއު, ކާމިޔާބުކަމާ އެކު ބާރަށް ކުރިއަށް އެބަދާ ކަމަށް އެންވާރަމަންޓް މިނިސްޓަރު އައިމިނަތު ޝައުނާ އިއްޔެ ވިދާޅުވެއްޖެ އެވެ.
ކުނިވަޅުލައިގެން ހިއްކާފައިވާ ތިލަފުށި ރަށެއްގެ ގޮތުގައި ހަމަޖައްސައި އެތަނަށް ކުނި ގެންދަން ފެށީ 1992ގަ އެވެ. މާލެއިން އެތަނަށް ކުނި ބޭރުކޮށް ބޮޑު ފަރުބަދައެއް އުފެދިފައިވާ އިރު ކުނި ވަކި ނުކޮށް އެންދުމުގެ ސަބަބުން މާލެ ސަރަހައްދުގައި ދުންބޯވެ، ތިމާވެއްޓާއި ރައްޔިތުންނަށް އެތައް ގެއްލުންތަކެއް ދަނީ ކުރިމަތިވަމުންނެވެ.
ތިލަފުށީގެ ގޮނޑު ހާމައަށް އެންދުމާއި އެތަނުން އަރަމުންދާ ދުން ހުއްޓުވައި ރިހެބިލިޓޭޓް ކުރެވެންދެން ރަނގަޅު ގޮތުގައި މެނޭޖްކުރެވޭނެ ނިޒާމެއް ގާއިމުކުރުމުގެ މަސައްކަތް ބައްލަވާލައްވަން މިނިސްޓަރު ޝައުނާއާ އެކު އެ މިނިސްޓްރީގެ ބައެއް ބޭފުޅުންނާއި ތިލަފުށީގެ ކުނީގެ ފަރުބަދަ ނައްތާލުމުގައި މަސައްކަތް ކުރަމުން އަންނަ ވެމްކޯގެ އިސް ބޭފުޅުން އިއްޔެ ވަޑައިގަތެވެ.
ތިލަފުށީގެ ކުނީގެ ފަރުބަދަ މަތީގައި ވެމްކޯގެ އިސް ބޭފުޅުން މަޑުކޮށްލައިގެން.
ހުސްކުރަން ފަށާފައިވާ ކުނި ފަރުބަދައިގެ އެންމެ އުހުގައި ހުންނަވައި މިނިސްޓަރު ޝައުނާ މީޑިއާ އަށް ވިދާޅުވީ އެންމެ އިސްކަމެއް މި ވަގުތު ދެނީ ކުނި ފަރުބަދައިން ދޭތެރެ ދޭތެރެ އިން އަރާ ކަޅު ދުމުން އާއްމުންނަށް އުނދަގޫވުން ހުއްޓުވުން ކަމަށެވެ. އެކަން އޮކްޓޯބަރުގެ ނިޔަލަށް ކާމިޔާބުވާނެ ކަމުގެ އުއްމީދު އޮތް ކަމަށް ވިދާޅުވި އެވެ.
ތިލަފުށީގެ ކުނީގެ މައްސަލައަށް ސަރުކާރުން ހައްލު ހޯދަމުން އަންނަނީ އޭޝިއަން ޑިވެލޮޕްމަންޓް ބޭންކް (އޭޑީބީ)ގެ ފަންނީ އެހީތެރިކަމުގެ ދަށުން ބޭރުގެ ތަޖުރިބާކާރެއްގެ އިރުޝާދާ އެކު ވެމްކޯ އާއި އެންވާރަމެންޓް މިނިސްޓްރީ ގުޅިގެންނެވެ.
ކުނީގެ މައްސަލައަށް ހައްލެއް ހޯދަން ކުރާ މަސައްކަތުގެ ނަތީޖާ މިހާރު ވެސް ފެންނަމުން އަންނަ ކަން މިނިސްޓަރު ފާހަގަކުރެއްވި އެވެ. ދުން އެރުން ހުއްޓުވަން 20 ދުވަހުގެ ތެރޭގައި ކުރި މަސައްކަތުން ތިލަފުށި ސަރަހައްދަކީ މިނިސްޓްރާއި އެ މިނިސްޓްރީގެ މުއައްޒަފުންނަށް ދަތި އުނދަގުލެއް ނެތި، ހާލަތު ބަލައިލެވޭ ސަރަހައްދަކަށް ވަނީ ވެފަ އެވެ.
"އަމާޒަކީ މިތަނުން އަރާ ދުން އެއްކޮށް ނިވާލައި މިތަނަކީ ދުނިޔޭގެ އެހެން ތަންތަނުގައި ވެސް ޑަމްޕްސައިޓް ހުންނަ ގޮތަށް ރިމިޑިއެޓް ކުރެވި ގްރީން ސްޕޭސްއެއްގެ ގޮތަށް ފެނިގެން ދިއުން," ޝައުނާ ވިދާޅުވި އެވެ.
"ސަރުކާރުން އޭޑީބީއާ އެކު މި ކުރާ މަސައްކަތަކީ ތިލަފުއްޓަކީ ޒަމާނީ ޓެކްނޮލޮޖީއާ އެކު ކުނި މެނޭޖްކުރެވޭނެ ތަނަކަށް ހެދުން. ކުރިއަށް އޮތް އަހަރުތަކުގައި މި މަސައްކަތްކޮށް ނިންމާލެވޭނެ."
މިނިސްޓަރު ޝައުނާ ތިލަފުށީގައި: ކާމިޔާބު މަޝްރޫއެއްގެ ގޮތުގައި ނިންމާލެވޭނެ ކަމަށް ވިދާޅުވި.
މިނިސްޓަރު ވިދާޅުވި ގޮތުގައި މި މަޝްރޫއުން ފުރުސަތު ހުޅުވެނީ ރާއްޖޭގެ ކުނި ނައްތާލުން ޒަމާނީ ފެންވަރަށް ބަދަލު ވެގެން ދިއުމަށެވެ.
މި މަޝްރޫއުގައި މާލެ އާއި ހުޅުމާލޭގެ އިތުރުން ވިލިމާލޭގައި ވޭސްޓް ސެންޓަރުތަކެއް ގާއިމްކުރާނެ އެވެ. ތިލަފުއްޓަށް އެ ކުނި ގެންދާނީ ރައްކާތެރިކަމާ އެކުގައި އެވެ.
މާލޭގައި ވޭސްޓް ޓްރާންސްފާ ސްޓޭޝަނެއް ގާއިމްކުރަން މިހާރު ވަނީ ބަޔަކާ އެކު ސޮއިކޮށްފަ އެވެ.
"މި ސްޓޭޝަންތަކުން ތިލަފުއްޓަށް ކުނި ގެނެވޭނީ ކޮންޓެއިނަރުތަކުގައި ބަންދުކޮށްގެން އަދި ބަންދުކުރެވޭ އިރުގައި ޓްރާންސްޕޯޓް ކުރާއިރު ކުނި މޫދާއި އެއްގަމަށް ދިއުން އަދި ވަސްދުވުން ވެސް ހުއްޓުމަކަށް އަންނާނެ," މިނިސްޓަރު ވިދާޅުވި އެވެ.
ވެމްކޯގެ މެނޭޖިން ޑިރެކްޓަރު އާދަމް މުހައްމަދު ވިދާޅުވީ އެ މަޝްރޫއު ނިމުމުން މީހުންނަށް އެތަނަށް ގޮސް މަސައްކަތް ކުރެވޭވަރަށް ސާފު, ސަލާމަތް ސަރަހައްދަކަށް ވާނެ ކަަމަށެވެ.
"ގާތްގަނޑަކަށް 29 އަހަރު ވަންދެން އެއްތަނަކަށް ޖަމާކުރެވިފައި އޮތް ކުނި ފުނީގެ އެންމެ މަތީގައި އަޅުގަނޑާ މިނިސްޓަރަށް މި ތިބެވެނީ. ކަޅުދުން އަބަދު އަރާ ސަރަހައްދުގައި އަޅުގަނޑަށް މާސްކެއް ނާޅާއި މިއަދު ހުރެވޭ," މަޝްރޫއުގެ ކުރިއެރުންތަކާ ގުޅޭ ގޮތުން ވިދާޅުވި އެވެ.
ވެމްކޯގެ އިސްވެރިންނާ އެކު މިނިސްޓަރު ޝައުނާ ތިލަފުށީގައި.
އޭނާ ވެސް ވިދާޅުވި ގޮތުގައި އެންމެ ބޮޑު އިސްކަމެއް މިހާރު ދީފައި ވަނީ އެ ފަރުބަދައިން ކުނި އަނދައި ދުން އެރުން ހުއްޓުވުމެވެ.
"މިތަން ނިމޭއިރު އޮންނާނީ އިރާދަކުރެއްވިއްޔާ ދުނިޔޭގެ މިކަހަލަ ޑަމްޕްޔާޑުތަކުގައި އޮންނަ ފެންވަރަށް ރީތިކޮށް މީހުންނަށް މަސައްކަތްކޮށްލެވޭ ވަރަށް," އޭނާ ވިދާޅުވި އެވެ.
އެއާއެކު ތިލަފުށީގައި އެހެން މަސައްކަތްތައް ވެސް ކުރެވޭނެ ކަމަށް ވިދާޅުވި އެވެ.
