ރައީސް އިބްރާހިމް މުހައްމަދު ސޯލިހް އާއި އެމްޑީޕީގެ ރައީސް މުހައްމަދު ނަޝީދާ ދެމެދު އުފެދިފައިވާ ހިޔާލުތަފާތުވުންތައް ނައްތާލައި، ސުލްހަކުރަން ދެ ރައީސުންނާ އެ ޕާޓީގެ ޗެއާޕާސަން ހަސަން ލަތީފް މަޝްވަރާ ކުރައްވައިފި އެވެ.
ރައީސް ސޯލިހާއި ނަޝީދާ ދެމެދު ސިޔާސީ ހިޔާލުތަފާތުވުން ބޮޑުވެފައިވާ ތަން ފެންނަން ފެށީ، ބަރުލަމާނީ ނިޒާމުގެ ވާހަކަތަކުންނެވެ. ނަޝީދު ވަނީ އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރައީސް ސޯލިހްގެ އަރިހުން އެދިވަޑައިގެންފަ އެވެ. އެކަމަކު ނިޒާމް ބަދަލުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ތަކުރާރުކޮށް ރައީސް ސޯލިހް ވަނީ ވިދާޅުވެފަ އެވެ.
އަދި އޭގެ ފަހުން ރައީސް ސޯލިހްއާ ދެމެދު އެއްވެސް މައްސަލައެއް ނެތް ނަމަވެސް އެމަނިކުފާނާ އެކު ސިޔާސީ ގޮތުން ދެން ހުންނެވެން ނެތް ކަމަށް ނަޝީދު ވަނީ ފާޅުގައި ވިދާޅުވެފަ އެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހަސަން ލަތީފް ވިދާޅުވީ ރައީސްް ސޯލިހާއި ނަޝީދާ ދެމެދުގައި ވާހަކަ ނުދެއްކެވޭނެ ނުވަތަ ހައްލު ނުކުރެއްވޭނެ ހިޔާލުތަފާތުވުންްތަކެއް ހުންނާނެ ކަމަށް އެމްޑީޕީން ގަބޫލުނުކުރާ ކަމަށެވެ. އެއާއެކު ވެސް އެންމެ މަސްލަހަތު ބޮޑު ގޮތަކީ އަވަހަށް އެކަން ހައްލުކުރުން ކަަމަށް ވާތީ އެ މަޝްވަރާތައް ކުރައްވަމުން އަންނަ ކަމަށް
ހަސަން ވިދާޅުވި އެވެ.
"އެ ދެބޭފުޅުންނާ ވެސް އަޅުގަނޑަށް އެއްްފަހަރު ބައްދަލުކުރެވުނީ ކަމަށް އަޅުގަނޑު ދެކޭނީ. ސީދާ އަޅުގަނޑު ގޮސްގެން ރައީސް ނަޝީދު އަރިހުގަ ބައްދަލު ނުވި ކަމުގައި ވިޔަސް، ގުޅުއްވާ އެކަމާ މަޝްވަރާތައް ކުރެވިފައި ވަނީ. އެ މައްްސަލައިގަ ހައްލުތަކެއް ލިބިގެން ދާނެ،" ހަސަންް ލަތީފްް ވިދާޅުވި އެވެ.
އޭނާ ވިދާޅުވި ގޮތުގައި އެ ވާހަކަތައް ދައްކަވަން ރައީސް ސޯލިހްއާ ވަނީ ބައްދަލުކުރައްވައިފަ އެވެ.
ދެ ރައީސުންގެ ހިޔާލުތަފާތުވުން ހައްލު ކުރައްވަން ހަސަން މަޝްވަރާ ކުރެއްވި އިރު، ރައީސް އޮފީހުގައި މި މަހުގެ 10ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ވަނީ ޕާޓީގެ ތެރޭގައި އުފެދިފައިވާ ބައިބައިވުމަކީ މުޅި ޕާޓީއަށް އޮތް ދެރައެއް ކަމަށް ދޭހަވާ ގޮތަށް ވާހަކަ ދައްކަވައިފަ އެވެ.
އެކަމުގައި، އެމަނިކުފާނު ބައްލަވަނީ މަސްލަހަތަށް ކަމަށާއި ކުރިއަށް ވަޑައިގަންނަވާނީ އެ މަގުން ކަމަށް ވާހަކަފުޅު ދެއްކެވި އެވެ.
