މެންޗެސްޓާ (އޮގަސްޓް 26) - މެންޗެސްޓާ ސިޓީއާ އެކު އޭނާ ހަދާފައިވާ ކޮންޓްރެކްޓް ހަމަވުމުން ފުޓްބޯޅައިން ބްރޭކެއް ނެގުމަށް ފަހު އަލުން އެނބުރި އައިސް ގައުމީ ޓީމަކާ ހަވާލުވުމުގެ ޝައުގުވެރިކަން ހުރި ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ މިހާތަނަށް މުޅިން ވެސް މަަސައްކަތް ކޮށްފައިވަނީ ކްލަބްތަކުގަ އެވެ.
ސިޓީގެ ކޯޗުކަމާ 2016 ވަނަ އަހަރު ހަވާލުވި ގާޑިއޯލާ އެންމެ ފަހުން އެ ޓީމާ އެކު ހެދި ކޮންޓްރެކްޓާ އެއްގޮތަށް 2023 ވަނަ އަހަރާ ހަމައަށް ސިޓީ އަށް ކޯޗުކޮށްދީފިނަމަ އޭނާ އެ ޓީމުގައި ޖުމްލަ ހަތް އަހަރު މަސައްކަތް ކުރާނެ އެވެ. ސިޓީ އަކީ މިހާރު ވެސް އޭނާ އެންމެ ގިނަ ދުވަހު ކޯޗުކޮށްދިން ޓީމެވެ. މީގެ ކުރިން ގާޑިއޯލާ މަސައްކަތްކުރި ބާސެލޯނާގައި ހޭދަވީ ހަތަރު އަހަރެވެ. އަދި ބަޔާންގައި ތިން އަހަރެވެ.
ސިޓީ އަށް ތިން ފަހަރު ޕްރިމިއާ ލީގުގެ ޗެމްޕިއަންކަން ހޯދައިދިން ގާޑިއޯލާ ބުނީ 2023 ވަނަ އަހަރަށް ފަހު ސިޓީން ދިއުމުގެ ވިސްނުން އެބަހުރި ކަމަށާއި ދެން އޮތް ޗެލެންޖަކީ ގައުމީ ޓީމެއް ކަމަށެވެ.
"ފުރުސަތެއް އޮތިއްޔާ ދެން އޮތް ޗެލެންޖަކީ ގައުމީ ޓީމެއް. މި ޓީމުގައި (ސިޓީގައި) ހަތް އަހަރު މަސައްކަތްކޮށްފައި އަހަރެން އެބަޖެހޭ ހުއްޓާލަން. އެއީ މި ވަގުތަށް ވިސްނުމަކީ. އަހަންނަށް މި ކްލަބްގައި ކުރެވުނު މަސައްކަތް އެބަޖެހޭ ރަނގަޅަށް ބަލާލަން،" ގާޑިއޯލާ ބުންޏެވެ.
ސްޕެއިންގެ މީޑިއާ އިން މީގެ ކުރިން ވަނީ މުސްތަގުބަލުގައި ގާޑިއޯލާ ސްޕެއިން ގައުމީ ޓީމުގެ ކޯޗެއްގެ ގޮތުގައި ފެނުމުގެ ފުރުސަތު ބޮޑު ކަމަށް ބުނެފަ އެވެ. އޭރު އެ ވާހަކަތަކަށް ގާޑިއޯލާ މާ ބޮޑު ސަމާލުކަމެއް ނުދެ އެވެ.
ގާޑިއޯލާ ބުނީ ގައުމީ ޓީމެއް ގޮވައިގެން ބޮޑު މުބާރާތެއްގައި ކޯޗުކޮށްދިނުމަކީ ތަފާތު ތަޖުރިބާއެއް ކަމަށް ވާނެ ކަމަށެވެ.
"އަހަރެންގެ ޝައުގުވެރިކަން އެބަހުރި ދެކުނު އެމެރިކާގެ ޓީމަކަށް ކޯޗުކޮށްދޭން ވެސް. ޔޫރަޕްގެ ޓީމަކާ ވެސް ހަވާލުވެދާނަން. ކޮޕަ އެމެރިކާ އާއި ވޯލްޑް ކަޕް ފަދަ މުބާރާތްތަކުގައި މަސައްކަތް ކޮށްލަން ބޭނުން،" ކޯޗިން ކެރިއަރުގައި މިހާތަނަށް 28 ތަށި އުފުލާލާފައިވާ ގާޑިއޯލާ ބުންޏެވެ.
އުމުރުން 50 އަހަރުގެ ގާޑިއޯލާ އެންމެ ފުރަތަމަ ބާސެލޯނާގައި ހޭދަކުރި ހަތަރު އަހަރަށް ފަހު 2012 ވަނަ އަހަރު އެ ޓީމާ ދުރަށްދިޔަ އެވެ. އޭނާ ބަޔާނުގެ ކޯޗުކަމާ ހަވާލުވީ އެއް އަހަރުގެ ބްރޭކެއް ނެގުމަށް ފަހު އެވެ. އެހެން ކަމުން އޭނާ ސިޓީ ދޫކޮށްލަން މި ދެއްކި ވާހަކަތަކާ އެއްގޮތަށް ކަންތައް ކުރުމުގެ ފުރުސަތު ބޮޑެވެ.
