ވެރިކަން ހިންގުން ބަރުލަމާނީ ނިޒާމަކަށް ބަދަލު ކުރުމަށް ރައްޔިތުންގެ އާންމު ވޯޓަކަށް އަވަހަށް ދިޔުމަށް ގޮވާލާ ޕެޓިޝަނުގައި ސޮއި ކުރަން އެމްޑީޕީގެ ހަރުގެ ބޭނުންކުރާތީ އުފައްދަމުންދާ ސުވާލުތަކަށް އެ ޕާޓީގެ ޗެއާޕާސަން ހަސަން ލަތީފް ޖަވާބު ދެއްވައިފި އެވެ.
ގާނޫނީ ވަކީލު މުހައްމަދު ނިޝާން އިބްރާހިމް އިސްކޮށް ހުންނަވާ ތާއީދު ހޯދަން މަސައްކަތް ކުރާ އެ ޕެޓިޝަނުގައި ބުނެފައި ވަނީ ވެރިކަން ހިންގުމުގެ ނިޒާމު އިސްލާހު ކުރުމަކީ ރައީސް އިބްރާހިމް މުހައްމަދު ސޯލިހުގެ ވައުދުފުޅެއްކަމުން އެ މަސައްކަތް ކުރުން އަވަސް ކުރަންޖެހޭ ކަމަށެވެ.
އެމްޑީޕީގެ ބައެއް މެމްބަރުންގެ އިސް ނެންގެވުމާ އެކު ކުރިއަށް ގެންދާ ޕެޓިޝަންގައި އަމާޒަކީ 100 ދުވަސް ތެރޭގައި 100،000 ސޮއި ހަމަކުރުމެވެ. އެ ޕެޓިޝަން ހުށަހަޅަން ނިންމާފައި ވަނީ ރައީސް ސޯލިހްގެ އިތުރުން ރައްޔިތުންގެ މަޖިލީހަށެވެ.
އެ ޕެޓިޝަނުގައި ސޮއި ކުރުން މި ހަފްތާގެ ތެރޭގައި އެމްޑީޕީގެ ހަރުގޭގައި ކުރިއަށް ގެންދާއިރު، އަތޮޅު ތެރޭގައި ވެސް އެ މަސައްކަތަށް ޕާޓީގެ ހަރުގެތައް ދަނީ ބޭނުންކުރަމުންނެވެ.
އެއާއެކު، މި ޕެޓިޝަނަކީ އެމްޑީޕީން ކުރިއަށް ގެންދާ ހަރަކާތެއްތޯ އެއް ބަޔަކު ދަނީ ސުވާލު އުފައްދަމުންނެވެ.
އެކަމާ ގުޅިގެން "އަދަދު"އިން ކުރި ސުވާލަކަށް ޖަވާބު ދެއްވަމުން ހަސަން ވިދާޅުވީ އެމްޑީޕީގެ ގުނަވަނަކުން ނުނިންމި ނަމަވެސް، އަމިއްލަ ފަރާތްތަކާއި ޖަމިއްޔާތަކުން ކުރިއަށް ގެންދާ ހަރަކާތްތަކުގައި ވެސް އެމްޑީޕީގެ ގިނަ މެމްބަރުންތަކެއް މީގެ ކުރިން ވެސް ބައިވެރިވެފައިވާނެ ކަމަށެވެ.
އަދި އެ ހަރާކަތްތަކަށް ބައެއް ފަހަރު ހަރުގެ ބޭނުންކުރަން އެމްޑީޕީގެ މެމްބަރުން އެދުމުން ދޫކޮށްފައި ހުންނާނެ ކަމަށް ހަސަން ފާހަގަކުރެއްވި އެވެ.
"މި ޕެޓިޝަނުގެ މަސައްކަތުގައި ވެސް އިސްކޮށް އެބައުޅުއްވާ ޕާޓީގެ ގިނަ މެމްބަރުންނާއި މަޖިލިސް މެމްބަރުން ވެސް. ދެން އެ މެމްބަރުންގެ އެދިވަޑައިގަތުމަށް ހަރުގެ ބޭނުންކުރަން ދިނީ. އެއީ ހަމަ ކުރިން ވެސް އަމަލުކުރާ އާންމު އުސޫލެއް،" އޭނާ ވިދާޅުވި އެވެ.
މިސާލެއްގެ ގޮތުން ހަސަން ވިދާޅުވީ އެކި އިންތިހާބުތަކަށް އެމްޑީޕީގެ ޕްރައިމަރީތަކުގައި ވާދަކުރާ މެމްބަރުންނަށް ވެސް ހަރުގެ ދޫކޮށްފައި ހުންނާނެ ކަމަށެވެ. އެކަމަކު އެއީ ވެސް ސީދާ ޕާޓީގެ ކަމެއް ނޫން ކަން އޭނާ ފާހަގަކުރެއްވި އެވެ.
ނިޒާމުގެ ކޯޅުން ހޫނު
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ ސެޕްޓެމްބަރު މަހު އޮންނަ އެމްޑީޕީގެ އެތެރޭގެ އިންތިހާބުގައި އެމަނިކުފާނު ތާއީދު ކުރައްވާނީ ރާއްޖެއަށް ބަރުލަމާނީ ނިޒާމެއް ގެންނަން އެއްބާރުލުން ދެއްވަން ތިއްބެވި ކެންޑިޑޭޓުންނަށް ކަމަށް ވިދާޅުވެފަ އެވެ.
ނަޝީދު ބޭނުންފުޅު ވަނީ 2023 ގެ އިންތިހާބު ނުބާއްވައި ބަރުލަމާނީ ނިޒާމަކުން ވެރިކަން ހިންގަން ފެށުމަށެވެ. އެ ނިޒާމުގައި އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރަސްމީކޮށް ރައީސް ސޯލިހްގެ އަރިހުން އޮތީ އެދިވަޑައިގެންފަ އެވެ.
ރައީސަށް ފޮނުއްވި މެސެޖުގައި ނަޝީދު އެދިވަޑައިގެންގައި އޮތީ 2023ގެ ފެބުރުއަރީ މަހުގެ ތެރޭގައި ވެރިކަމުގެ ނިޒާމް ބަދަލުކޮށް މަޖިލީހުން ސަރުކާރު އެކުލަވާލުމަށެވެ. އަދި އާ ސަރުކާރެއް ހޮވުމުގެ ރިޔާސީ އިންތިހާބު އެ އަހަރު ނުބޭއްވުމަށް ވެސް އެދިވަޑައިގަތެވެ.
ޖެހިގެން އަންނަ 2024ގައި ރައްޔިތުންގެ މަޖިލީހުގެ އިންތިހާބަށް ދާ އިރު ގާނޫނުގައިވާ ގޮތުގެ މަތިން ރައްޔިތުންގެ މަޖިލީހުން ރައީސުލްޖުމްހޫރިއްޔާ ކަނޑައެޅުމަށް ވެސް އެމަނިކުފާނު ހުށަހެޅުއްވި އެވެ.
އެކަމަކު ރައީސް ސޯލިހް މިހާތަނަށް ތަކުރާރުކޮށް ދެއްވި ޖަވާބަކީ ނިޒާމުގެ ވޯޓުގައި ގޮތް ނިންމާނީ ރައްޔިތުން ކަމެވެ. ބަރުލަމާނީ ނިޒާމު ގެންނެވުމަށް ނަޝީދު ދައްކަވާ ވާހަކައިން ރެކިވަޑައިގަންނަވަމުން ރައީސް ސޯލިހް އެންމެ ފަހުން ވެސް ނޫސްވެރިންނަށް ވިދާޅުވެފައި ވަނީ ނިޒާމް ބަދަލު ކުރަން ވިސްނަވާކަށް އެމަނިކުފާނަށް ވަގުތެއް ނެތް ކަމަށެވެ. ހުރިހާ ވަގުތެއް ހުސްކުރައްވަން ބޭނުންފުޅު ވަނީ ފަސް އަހަރުގެ ދައުރަކަށް ރައްޔިތުންނަށް ވެވަޑައިގަތް ވައުދުތައް ފުއްދެވުމަށް ކަމަށެވެ.
ރާއްޖޭގައި ވެރިކަން ކުރާނެ ނިޒާމެއް ކަނޑައަޅަން 2007 ގައި ނެގި އިންތިހާބުގައި ގިނަ ރައްޔިތުން ވޯޓުދިނީ ރިޔާސީ ނިޒާމަށެވެ. އެއީ ސައްހަ 154،123 ވޯޓުގެ 62 ޕަސެންޓެވެ.
ބަރުލަމާނީ ވޯޓެއްގެ ކެމްޕޭން މި ފެށީ، ރައްޔިތުންގެ މަޖިލީހުގެ މެމްބަރުންގެ އަޣުލަބިއްޔަތު އޮތީ އެމަނިކުފާނުގެ އަތްޕުޅުގައި ކަަމަށް ރައީސް ސޯލިހް އިއުލާންކުރައްވާފައި ވަނިކޮށެވެ.
